တနင်္သာရီတိုင်းဒေသကြီး မြိတ်ခရိုင် ပုလောမြို့နယ်တွင် ကျောက္ကာကျေးရွာမှ မြိတ်မြို့သို့ ပြေးဆွဲနေသည့် စက်လှေတစ်စင်းမှာ အောက်တိုဘာ ၂၀ ရက်ညပိုင်းက ကျောက္ကာရွာမှ မြိတ်မြို့သို့ ထွက်ခွာစဉ် တိမ်းမှောက်ခဲ့သည်။

အဆိုပါစက်လှေတွင် ကျောင်းတက်မည့် ကျောင်းသားကျောင်းသူများအပါအဝင် လူ ၈၀ ကျော်ပါဝင်ခဲ့ပြီး ၆၀ ကျော်ကို အသက်ရှင်လျက် ပြန်လည်တွေ့ရှိခဲ့သည်။ အောက်တိုဘာ ၂၁ ရက် မွန်းလွဲ ၂ နာရီအထိ အမျိုးသမီး အလောင်း ခုနစ်လောင်းနှင့် သုံးလအရွယ် ကလေးငယ်တစ်ဦး၏ အလောင်း စုစုပေါင်း ရှစ်ဦးကို ရှာဖွေတွေ့ရှိထားပြီး ကျန်ရှိသူများမှာ ဆက်လက်ပျောက်ဆုံးနေဆဲဖြစ်ကာ ရှာဖွေရေးလုပ်ငန်းများ ဆက်လက်လုပ်ဆောင်နေဆဲဖြစ်သည်။

ဖြစ်စဉ်နှင့် ပတ်သက်ပြီး လူမှုကယ်ဆယ်ရေးလုပ်ငန်းများ ဆောင်ရွက်နေသည့် မြိတ်မြို့ရှိ ပရဟိတအသင်းအချို့မှ တာဝန်ရှိသူအချို့ကို မေးမြန်းထားချက်များမှ အချို့ကို ကောက်နုတ်ဖော်ပြလိုက်ပါသည်။

■ ရွှေရောင်နေ့သစ်ပရဟိတအသင်းဥက္ကဌ ကိုအောင်သော်စံ

“လှေက ရွာကနေထွက်ပြီး ၁၅ မီနစ်ပဲ ကြာပါသေးတယ်၊ အိုဗာဝိတ်ဖြစ်နေတာရယ်၊ လေပြင်းတွေတိုက်၊ လျှပ်စီးလက်ပြီး ရာသီဥတုအနေထားတွေကြောင့် နစ်မြုပ်သွားတာလို့သိရတယ်၊ အခု ၉ တန်းကျောင်းသူနှင့် ၃ တန်းကျောင်းသူနှစ်ဦးပျောက်ဆုံးတဲ့ အထဲပါနေတယ်၊ လိုက်ရှာဖွေနေပါတယ်၊ ကုန်းလမ်းကနေကူညီ ဆောင်ရွက်ပေးဖို့ ပရဟိတ အသင်းတွေသွားဖို့ ကြိုးစားနေတယ်၊ ဒါပေမယ့် တိုက်ပွဲအနေထားကြောင့် ဘယ်လိုမှတိုးမပေါက်ဘူးဖြစ်နေတယ်၊ သေဆုံးတာက အမျိုးသမီးတွေချည်းဖြစ်နေတယ်၊ ၃ လအရွယ်ကလေးတစ်ဦးပါတယ်”

■ ချမ်းမြေ့နာရေးကူညီမှုအသင်းဥက္ကဌ ဦးအင်စွမ်

“ကျွန်တော်တို့အခု မြိတ်ပြန်ရောက်ပါတယ်၊ အလောင်း ၈ လောင်းရှာဖွေတွေ့ရှိထားတယ်၊ လှေမှာကခရီးသည် ၈၅ ဦးလိုက်ပါသွားတယ်လို့ သိရတယ်၊ အခု ၆၀ ကျော် အသက်ရှင်ပြန်တွေ့ထားတယ်၊ ၁၀ ကျော်ပျောက်နေတဲ့အနေထားပါ၊ ဒေသခံတွေပဲအဓိကရှာဖွေကယ်ဆယ်ပေးနေကြတယ်”