မိုးရွာသွန်မှုများနှင့် လေပြင်းတိုက်ခတ်မှုကြောင့် ဇွန်လ(၁၀)ရက်နေ့၊ နံနက်(၇)နာရီခန့်က မွန်ပြည်နယ်၊ ကျိုက်ထိုမြို့နယ်၊ ကျိုက်ထီရိုးတောင်ခြေ ကင်မွန်းစခန်း ဂေါပကအဖွဲ့ရုံးအရှေ့ရှိ ညောင်ပင်ကြီးမှာ အမြစ်မှကြွတက်၍ လဲကျမှုဖြစ်ပွားခဲ့ရာမှ ဈေးဆိုင်ခန်းတစ်ခန်းနှင့် လျှပ်စစ်မီးတိုင်များ ပြိုကျပျက်ဆီးမှုဖြစ်ပွားခဲ့ကြောင်း ဒေသခံများထံမှ သိရသည်။
မိုးရွာသွန်းမှုများကြောင့် လဲပြိုကျခဲ့သည့် ညောင်ပင်ကြီးမှာအပင်လုံးပတ်(၂၀)ပေခန့်၊ အမြင့် (၅၀) ပေခန့်ရှိ ညောင်ပင်ကြီးမှာ လဲပြိုကျခဲ့ခြင်းဖြစ်ကြောင်း ဒေသခံတစ်ဦးက ပြောကြားသည်။
၎င်းကဆက်လက်ပြီး “ ညောင်ကိုင်းတွေက၊ ညောင်ပင်ရဲ့ဘေးမှာရှိတဲ့ ဖူးဖူးလေး ယိုစုံဆိုင်ပေါ်ကို ပိကျတယ်။ နောက်ပြီးတော့ ကင်မွန်းစခန်းကနေ ကျိုက်ထီးရိုးရင်ပြင်တော်စခန်းပေါ်သို့ သွယ်တန်းထားတဲ့ လျှပ်စစ်ဓါတ်မီးတိုင် (၄) တိုင်လောက် ပြိုကျပျက်ဆီးကုန်တယ်။ အဲ့ဒီအပြင်ကို ထရန်စဖော်မာတစ်ခုလည်း ထိခိုက်ပျက်ဆီးမှုတွေရှိခဲ့ပါတယ်။ လူထိခိုက်မှုတော့မရှိဘူး” ဟု ပြောကြားသည်။
ထိုညောင်ပင်ကြီးလဲပြိုကျမှုကြောင့် ထိခိုက်ပျက်ဆီးမှုများနှင့် ညောင်ကိုင်းများအား ကျိုက်ထိုမြို့နယ် နှင့် အရန်မီးသတ်စခန်းများမှ မီးသတ်တပ်ဖွဲ့ဝင်များနှင့် ဒေသခံပြည်သူများ ဝိုင်းဝန်းရှင်းလင်း ဆောင်ရွက်ခဲ့ကြကြောင်း သိရသည်။
