ဘန်လေအသင်း ပရီးမီးယားလိဂ်သို့ (၃) ကြိမ်မြောက် တန်းတက်ခွင့်ရရှိ

Published 3 May 2016

ဘန်လေအသင်းသည် မေလ(၂)ရက်နေ့က ယှဉ်ပြိုင်ကစားခဲ့သည့် ပွဲစဉ် (၄၅) တွင် QPR အသင်းကို (၁-ဝ) ဂိုးဖြင့် အနိုင်ကစားပြီး (၃) ကြိမ်မြောက် တန်းတက်ခွင့် ရရှိခဲ့ကြောင်း သိရသည်။ အနီးကပ် ပြိုင်ဘက်များဖြစ်သည့် မစ်ဒယ်ဘရော့၊ ဘရိုက်တန် အသင်းများမှ ယခုတစ်ပတ်တွင် သရေပွဲများနှင့် ကြုံတွေ့ခဲ့ရသည့်အပြင် ၎င်းတို့နှစ်သင်းမှာ နောက်ဆုံးပွဲစဉ် (၄၆)တွင် ထိပ်တိုက်တွေ့ဆုံ နေသောကြောင့် (၂) မှတ်အသာ ရထားသည့် ဘန်လေအသင်းက ပွဲစဉ်မကုန်မီမှာပင် တိုက်ရိုက်တန်းတက်ခွင့် ရရှိခဲ့ခြင်းဖြစ်သည်။လက်ရှိတွင် (၈၈) မှတ်စီ တူညီနေသော်လည်း မစ်ဒယ်ဘရော့မှာ ဂိုးကွာခြားချက် အသာရထားသောကြောင့် ဘရိုက်တန်ကို သရေကစားရုံဖြင့် တိုက်ရိုက်တန်းတက်ခွင့် ရမည်ဖြစ်ကြောင်း သိရသည်။ ပြီးခဲ့သည့်ရာသီကမှ တန်းဆင်းခဲ့ရသည့် ဘန်လေအနေဖြင့် ချက်ချင်းတန်းပြန်တက်ခဲ့ပြီး ၂၀၁၀၊ ၂၀၁၅ ခုနှစ်များတွင် (၂) ကြိမ်သာ တန်းတက် ခဲ့သော်လည်း ပရီးမီးယားလိဂ်တွင် (၁) နှစ်သာ ခံခဲ့သည်။