ဒီတစ်ပတ်မှာ FA ဖလား ဆီမီးဖိုင်နယ်ပွဲစဉ်တွေ ရှိနေတာကြောင့် ပရီးမီးယားလိဂ် ၇ ပွဲသာ ယှဉ်ပြိုင် ကစားသွားမှာပါ။ ချန်ပီယံပြေးလမ်းပေါ်က လက်စတာနဲ့ စပါးအသင်းတို့ဟာ အိမ်ကွင်းမှာ ကစားရမှာဖြစ်ပြီး ပြိုင်ဘက်တွေကလည်း အမှတ်လိုအပ်ချက်နည်းတဲ့ ဆွမ်ဆီး၊ ဝက်စ်ဘရွန်းတို့ ဖြစ်နေပါတယ်။ ထူးခြားတဲ့ပွဲစဉ်တစ်ခုကတော့ လီဗာပူးလ် - နယူးကာဆယ်ပွဲဖြစ်ပြီး နယူးကာဆယ်နည်းပြ ဘင်နီတက်ဇ်က အသင်းဟောင်း လီဗာပူးလ်ကွင်း အန်ဖီးလ်ကို ပြန်လာရမှာပါ။ လီဗာပူးလ်က ပရီးမီးယားလိဂ်ထက် ယူရိုပါလိဂ်ကို အာရုံစိုက်နေချိန်ဖြစ်ပြီး တန်းဆင်းဇုန်ထဲက ဘင်နီတက်ဇ်ရဲ့ နယူးကာဆယ်ကတော့ အမှတ်အသည်းအသန် လိုအပ်နေပါတယ်။ အသင်းဟောင်းဆီက ဘင်နီတက်ဇ် အမှတ် ပြန်ယူနိုင်မလားဆိုတာ . . .
■ မန်စီးတီး နှင့် စတုတ်စီးတီး
(၂၃-၄-၂၀၁၆ စနေ ည ၆း၁၅)
ပ-ကျော့ရလဒ် - စတုတ်စီးတီး ၂-၀ မန်စီးတီး
ကြားရက်မှာ မန်စီးတီး အမှတ်ပြည့်မရခဲ့တာကြောင့် ချန်ပီယံလိဂ်ဝင်ခွင့်တစ်ဖက်၊ ချန်ပီယံလိဂ်ပွဲတစ်ဖက်နဲ့ ဗျာများရတော့မယ်။ ဒါပေမဲ့ ကွန်ပနီ၊ စတာလင်တို့ ပြန်ကစားနိုင်ပြီဖြစ်လို့ လူစာရင်း အလှည့်အပြောင်း လုပ်ရင်တောင်တောင့်တင်းတဲ့ လူစာရင်းနဲ့ ကစားနိုင်မှာပါ။ နောက်ဆုံးသုံးပွဲမှာ ပေးဂိုး ၁၀ ဂိုးရှိခဲ့တဲ့ စတုတ် ဂိုးပြတ်ရှုံးဖို့ များတယ်။
■ ဘုန်းမောက် နှင့် ချယ်လ်ဆီး
(၂၃-၄-၂၀၁၆ စနေ ည ၈း၃၀)
ပ-ကျော့ရလဒ် - ချယ်လ်ဆီး ဝ-၁ ဘုန်းမောက်
ပထမအကျော့က စတမ်းဖို့ဒ်ဘရစ်ချ်မှာ ဘုန်းမောက်အနိုင်ရခဲ့သလို၊ လက်ရှိအချိန်မှာလည်း ချယ်လ်ဆီး ခြေကျနေလို့ ဘုန်းမောက် အခွင့်အရေး ရနိုင်ပါတယ်။ ဒါပေမဲ့ ချယ်လ်ဆီးက ၂၀၀၀-၀၁ ရာသီနောက်ပိုင်းမှာ တန်းတက်အသင်းတွေကို နှစ်ကျော့စလုံး မရှုံးတဲ့ အစဉ်အလာကို ပိုင်ဆိုင်ထားပါတယ်။ သရေကျဖို့ပါတယ်။
■လီဗာပူးလ် နှင့် နယူးကာဆယ်
(၂၃-၄-၂၀၁၆ စနေ ည ၈း၃၀)
ပ-ကျော့ရလဒ် - နယူးကာဆယ် ၂-၀ လီဗာပူးလ်
လီဗာပူးလ်က အလှည့်ကျ လူထုတ်ပြီး ကစားနေပေမယ့် လူငယ်တွေနဲ့ ကစားတဲ့ပွဲတွေမှာတောင် ခြေစွမ်းပိုင်း၊ ရလဒ်ပိုင်း ယိမ်းယိုင်မသွားဘူး။ ဒါပေမဲ့ နယူးကာဆယ်က သေရေးရှင်ရေး ရုန်းကန်နေတဲ့ အသင်းဖြစ်ပြီး ဘင်နီတက်ဇ်ကလည်း အန်ဖီးလ်အကြောင်း ကောင်းကောင်းသိတဲ့သူ ဖြစ်နေတယ်။ နယူးကာဆယ် အမှတ်ခွဲယူနိုင်ခြေ ရှိတယ်။
■ အက်စတွန်ဗီလာ နှင့် ဆောက်သမ်တန်
(၂၃-၄-၂၀၁၆ စနေ ည ၈း၃၀ )
ပ-ကျော့ရလဒ် - ဆောက်သမ်တန် ၁-၁ ဗီလာ
တန်းဆင်းသွားတဲ့ အက်စတွန်ဗီလာ အရှုံးနွံထဲက မထွက်နိုင်သေးဘူး။ အိမ်ကွင်းမှာတောင် ငါးပွဲဆက် ရှုံးထားပြီး ပရိသတ်ကို နှစ်သိမ့်နိုင်ပွဲယူပေးဖို့ ခက်ခဲနေတယ်။ ဆောက်သမ်တန်ကတော့ ဥရောပဝင်ခွင့်နဲ့ အလှမ်းဝေးနေပေမယ့် ပုံမှန်ခြေစွမ်းထိန်းထားတယ်။ ပယ်လေ၊ မာနေတို့လည်း ခြေစွမ်းပြနေလို့ ဆောက်သမ်တန်ကိုပဲ ရွေးရမှာပါ။
■ ဆန်းဒါးလန်း နှင့် အာဆင်နယ်
(၂၄-၄-၁၆ တနင်္ဂနွေ ည ရး၃၅ )
ပ-ကျော့ရလဒ် - အာဆင်နယ် ၃-၁ ဆန်းဒါးလန်း
အာဆင်နယ်က အဝေးကွင်းပွဲတွေမှာ ခံစစ်ပိုင်း စိတ်မချရဘူး။ အဝေးကွင်းနောက်ဆုံး လေးပွဲမှာ ပွဲတိုင်း နှစ်ဂိုးနဲ့ထက် သွင်းနိုင်ခဲ့ပေမယ့် တစ်ပွဲပဲ နိုင်ခဲ့တာကိုကြည့်ရင် သိနိုင်တယ်။ ဒါပေမဲ့ ဆန်းဒါးလန်းနဲ့ ကစားခဲ့တဲ့ ပရီးမီးယားလိဂ် နောက်ဆုံး ၁၂ ပွဲမှာ အာဆင်နယ် ရှုံးပွဲမရှိခဲ့ဘဲ ရှစ်ပွဲအထိ အနိုင်ရခဲ့တယ်။ အာဆင်နယ် ကပ်နိုင်သွားမယ်ထင်တယ်။
■ လက်စတာ နှင့် ဆွမ်ဆီး
(၂၄-၄-၁၆ တနင်္ဂနွေ ည ၉း၄၅ )
ပ-ကျော့ရလဒ် -  ဆွမ်ဆီး ဝ-၃ လက်စတာ
အဓိက တိုက်စစ်မှူး ဗာဒီ ပွဲပယ်ခံထားရတာက လက်စတာကို ရုပ်ပိုင်း၊ စိတ်ပိုင်း ထိခိုက်စေပါတယ်။ ခံစစ်ပိုင်းမာကျောမှုကို အားပြုပြီး ဆွမ်ဆီးရဲ့အမှားကို စိတ်ရှည်ရှည်စောင့်နိုင်ရင်တော့ လိုချင်တဲ့ရလဒ် ရနိုင်ပါတယ်။ ဆွမ်ဆီးက မာကျောပေမယ့် အဝေးကွင်းမှာလည်း အမှားများတဲ့အသင်းပါ။ သရေကျနိုင်ခြေရှိပေမယ့် လက်စတာကိုပဲ ရွေးထားတယ်။
■ စပါး နှင့် ဝက်စ်ဘရွန်း
(၂၆-၄-၂၀၁၆ အင်္ဂါ နံနက် ၁း၃၀ )
 ပ-ကျော့ရလဒ် - ဝက်စ်ဘရွန်း ၁-၁ စပါး
လက်ကျန် လေးပွဲမှာ ဒီပွဲက စပါးအတွက် အချောင်ဆုံးပွဲလို့ ဆိုနိုင်ပါတယ်။ ဝက်စ်ဘရွန်းက တစ်ဦးချင်းကောင်းတဲ့ ကစားသမားတွေ ရှိပေမယ့် စုစည်းမှုကင်းမဲ့နေပြီး တိုနီပူးလစ် ကိုင်တွယ်တဲ့အသင်းလို့ မထင်ရလောက်အောင် ခံစစ်ပိုင်း လျော့ရဲနေတယ်။ ဟာရီကိန်း၊ အယ်လီ၊ အဲရစ်ဆင်တို့ တိုက်စစ်ဂိုးမြူးပြီး စပါးနိုင်ပွဲ ရယူသွားမှာပါ။