မြေနီကုန်း၊ စမ်ချောင်းမြို့နယ်၊ ရှင်စောပုရပ်ကွက်၊ ပြည်လမ်းနှင့် ရှင်စောပုလမ်းထောင့်ရှိ City Mart အတွင်း မြေညီထပ်၌ ဖွင့်ထားသည့် Happy cafe & Noodle ဆိုင်တွင် မတ်လ ၁၀ ရက်နေ့ နံနက် ၉ နာရီ ကျော်ခန့်တွင် ဖြစ်ပွားခဲ့ကြောင်း သိရသည်။“ဖြစ်တာက နံနက် ၉ နာရီကျော်လောက်မှာ ဖြစ်တာပါ၊ City Mart အောက်မှာဖွင့်ထားတဲ့ ကော်ဖီဆိုင်မှာပါ၊ ဂတ်စ်အိုးလဲှနေရင်း ခေါင်းပြုတ်ထွက်ပြီး မီးနဲ့ထိပီး ထပေါက်တာပါ၊ မီးလောင်မှုတော့ မဖြစ်သွားပါဘူး၊ ဂတ်စ်အိုးတွေ အသုံးပြုမယ်ဆိုရင်တော့ သေသေချာချာ ဂရုစိုက်ပြီး သုံးဖို့လိုပါတယ်၊ ပေါ့ဆလို့ မရပါဘူး ” ဟု မီးသတ်ဦးစီးဌာနမှ တာဝန်ရှိတစ်ဦး ကပြောသည်။ဂတ်စ်အိုးပေါက်ရသည့် အကြောင်းအရင်းမှာ ဆိုင်ကောင်တာ အနီးတွင်ထားရှိသည့် အရှည်လေးပေခန့်ရှိ ဂတ်စ်အိုးအား လှဲလယ်နေစဉ် ဂတ်စ်အိုးအဟောင်းမှ ခေါင်းပြုတ်ထွက်ကာ ဂတ်စ်အိုး ယိုစိမ့်ပြီး မီးဖိုမီးနှင့် ထိတွေ့ရမှ ပေါက်ကွဲခဲ့ကြောင်း၊ မှန်များ ကာရံထားသည့် အခန်းဖြစ်သောကြောင့် မှန်များကွဲသွားကြောင်း သိရသည်။ပေါက်ကွဲမှုကြောင့် Happy cafe & Noodle ကော်ဖီဆိုင်ရှိ အလုပ်သမား အမျိုးသားနှစ်ဦးနှင့် အမျိုးသမီးနှစ်ဦး ထိခိုက်ဒဏ်ရာများ ရရှိခဲ့ကာ မစိုးရိမ်ရကြောင်း၊ ဒဏ်ရာရှိခဲ့သူ လေးဦးအား ရန်ကုန်အနောက်ပိုင်း ဆေးရုံကြီးသို့ ရဲစာနှင့်တကွ ပို့ဆောင်ထားကြောင်း၊ ပေါက်ကွဲမှုကြောင့် အခြားပစ္စည်းများသို့ မီးကူးစက်လောင်ကျွမ်းခဲ့ခြင်း မရှိကြောင်း စမ်းချောင်မြို့နယ် မီးသတ်စခန်းမှ သိရသည်။