ယခုနှစ်အတိုင်းပင် ရှေ့နှစ်အော်စကာ ထူးချွန်ဆုပေးအပ်ပွဲအခမ်းအနားတွင် အစီအစဉ်မှူးအဖြစ် ဆောင်ရွက်ပေးရန် အမေရိကန်ဟာသသရုပ်ဆောင်ခရစ္စရော့ခ်ကို ဖိတ်ခေါ်ကမ်းလှမ်းထားသော်လည်း ထိုကမ်းလှမ်းချက်ကို ခရစ္စရော့ခ်က ငြင်းဆန်ခဲ့သည်။
ထိုကမ်းလှမ်းချက်ကို လက်ခံလိုက်လျှင် အခင်းဖြစ်နေရာတစ်ခုကို ပြန်သွားသည်နှင့် တူမည်ဟုလည်း အသက် ၅၇ နှစ်ရှိသူ ခရစ္စရော့ခ်က ခိုင်းနှိုင်းပြောခဲ့သည်။
မတ်လကပြုလုပ်သည့် အော်စကာဆုပေးပွဲတွင် သရုပ်ဆောင် ဝယ်လ်စမစ်၏ဇနီး ဂျာဒါစမစ်၏ ကတုံးကေနှင့်ပတ်သက်ပြီး ခရစ္စရော့ခ်က ဟာသလုပ်သရော်ခဲ့သည့်အတွက် ဝယ်လ်စမစ်က စင်ပေါ်ထိတက်ကာ ရော့ခ်ကို ပါးရိုက်လိုက်သည့်ဖြစ်ရပ်သည် အနုပညာလောကတွင် ဟိုးလေးတကျော်ဖြစ်ခဲ့ရသည်။
သြဂုတ် ၂၈ ရက်က အရီဇိုးနားပြည်နယ်တွင်ပြုလုပ်သည့် ရှိုးတစ်ခုတွင် ရော့ခ်က၂၀၂၃ အော်စကာပွဲအတွက် ကမ်းလှမ်းချက်ကို သူငြင်းထားကြောင်း အသိပေးပြီး စမစ်၏ရိုက်ချက်က နာသည်ဟုလည်း ပြောသွားသည်။
ရော့ခ်သည် ၂၀၀၅ ခုနှစ်နှင့် ၂၀၁၆ ခုနှစ်တွင် အော်စကာဆုပေးပွဲ၏ အစီအစဉ်မှူးအဖြစ် နှစ်ကြိမ်ဆောင်ရွက်ပေးဖူးသည်။
ပြီးခဲ့သည့်ဆုပေးပွဲတွင် ဝယ်လ်စမစ်က King Richard ဇာတ်ကားဖြင့် အကောင်းဆုံး ဇာတ်ဆောင်မင်းသားဆုကို ဆွတ်ခူးခဲ့သည်။
အဆင်ခြင်မဲ့ သူ့လုပ်ရပ်အတွက် ပြန်တောင်းပန်ခဲ့ပြီး အော်စကာကြီးမှူးရေး အကယ်ဒမီအဖွဲ့မှ နုတ်ထွက်ခဲ့သော်လည်း သူသည် အော်စကာဆုပေးပွဲတက်ရောက်ခွင့် ၁၀ နှစ်အပိတ်ခံလိုက်ရသည်။ အကယ်ဒမီအဖွဲ့မှ နုတ်ထွက်ထားခြင်းကြောင့် စမစ်သည် ရှေ့လျှောက်အော်စကာဆုများအတွက် မဲပေးခွင့်မရှိတော့ပေ။
