ရုရှားက ယူကရိန်းကို ကျူးကျော်ဝင်ရောက်ခဲ့ချိန်မှစပြီး အာတယွန်ကတ်ကျန်ကာ၏ ဘဝသည်လည်း ပြိုလဲခဲ့ရတော့သည်။ သူ့ကို ယူကရိန်းနိုင်ငံ ဇာပိုရီဇာဇီယာမြို့တွင်မွေးဖွားခဲ့ပြီး ဖခင်မှာ ယူကရိန်းလူမျိုး၊ မိခင်မှာ ရုရှားလူမျိုးဖြစ်သည်။ သူသည် ယူကရိန်းတွင် မွေးဖွားခဲ့သော်လည်း ရုရှားတွင်သာ အနေများခဲ့သည်။

“ကျွန်တော့်ဘဝ ပျက်စီးခဲ့ပါတယ်။ ကျွန်တော်ရှင်သန်ဖို့ ဒါမှမဟုတ် အသက်ရှူဖို့တောင် ခက်ခဲခဲ့ပါတယ်”ဟု ရုရှားနိုင်ငံသား အဖြစ်ခံယူထားသည့်  အသက် ၅၀ အရွယ် ဂရပ်ဖစ်ဒီဇိုင်နာတစ်ဦးဖြစ်သူ ကတ်ကျန်ကာက ပြင်သစ်နိုင်ငံ ပါရီမြို့တော်တွင် အေအက်ဖ်ပီသတင်းဌာနကို ပြောကြားခဲ့သည်။

ရုရှားသမ္မတ ဗလာဒီမာပူတင်က အနောက်အုပ်စုလိုလားသည့် ယူကရိန်းနိုင်ငံထဲသို့ စစ်သားများစေလွှတ်ခဲ့ပြီး သီတင်းတစ်ပတ်အကြာတွင် ကတ်ကျန်ကာသည် စိန့်ပီတာစဘတ်ချ်မြို့ရှိ ၎င်း၏ဘဝဟောင်းကို စွန့် ခွာပြီး ဘဝသစ်စတင်ရန် ဖင်လန်နိုင်ငံ ဟယ်လ်ဆင်ကီးမြို့တော်သို့ ထွက်ခွာခဲ့သည်။ ထိုမှတစ်ဆင့် ပါရီမြို့တော်ကို သွားရောက်ခဲ့ပြီး သူ၏ စိတ်ဒဏ်ရာများကို ကုစားခဲ့ရသည်ဟု ဆိုသည်။

“အသက်ရှူကျပ်နေသလိုမျိုး ခံစားချက်တွေ၊ နေ့တိုင်းနေ့တိုင်း သေလုမြောပါး အခြေအနေမျိုးခံစားနေရတာတွေ ရပ်တန့် သွားခဲ့ပါတယ်။ ကျွန်တော် နောက်တစ်ကြိမ် အသက်ဝဝပြန်ရှူနိုင်စွမ်းရှိခဲ့ပါတယ်”ဟု လမ်းများပေါ်တွင် ယူကရိန်းလိုလားသည့် နံရံဆေးရေးပန်းချီများရေးဆွဲထားသည့် ပါရီမြို့တော်၏ အမှတ် ၁၃  မြို့တော်နယ်နိမိတ်တွင်နေထိုင်ခဲ့သည့် ကတ်ကျန်ကာက ပြောကြားခဲ့သည်။

သို့သော်လည်း ကတ်ကျန်ကာအတွက် စိတ်ပျက်ရသည့်အချက်မှာ ပါရီမြို့တော်သည် ၎င်း၏အတိဒုက္ခကို ဂရုမစိုက်သည့်ပုံစံမျိုးဖြစ်နေခြင်းကြောင့်ပင်။ ကတ်ကျန်ကာသည် စိန့်ပီတာစဘတ်ချ်မြို့ရှိ State Hermitage ပြတိုက်၊ Tovstonogov Bolshio Drama ကဇာတ်ရုံနှင့် အဆင့်မြင့်စီးပွားရေးတက္ကသိုလ်တို့တွင် ဝင်ရောက်လုပ်ကိုင်ခဲ့ဖူးသူဖြစ်သော်လည်း ပြင်သစ်တွင်မူ အလုပ်တစ်ခုရရှိရန် မလွယ်ကူကြောင်း နားလည်သဘောပေါက်ခဲ့ရသည်။

သူ့တွင် စာသင်ကြားသည့်အတွေ့အကြုံများရှိသဖြင့် ယူကရိန်းဒုက္ခသည်များ၏ ကလေးငယ်များကို စာသင်ပေးလိုသည့် ဆန္ဒရှိသော်လည်း ယင်းအလုပ်များအတွက် ဥရောပသမဂ္ဂအဖွဲ့ဝင်နိုင်ငံသားများကိုသာ လျာထားခန့်အပ်မည်ဖြစ်သည်။

“ဒါဟာ တော်တော်ထူးဆန်းပါတယ်။ ကျွန်တော်တို့ လုပ်နိုင်တဲ့အလုပ်တွေအများကြီးရှိပြီး ကျွန်တော့်လို လူမျိုးတွေလည်း အများကြီးရှိနေပါတယ်”ဟု ၎င်းက ပြောကြားခဲ့သည်။

■ နိုင်ငံရေးပြည်ပြေးများ

ယူကရိန်းပဋိပက္ခနှင့်ပတ်သက်ပြီး ရုရှား နှင့် သံတမန်ရေးအရ အဖြေရှာသည့် အားထုတ်ကြိုးပမ်းမှုများကို ဦးဆောင်ခဲ့သူမှာ ပြင်သစ်သမ္မတ အီမန်နျူရယ် မက်ခရွန်ဖြစ်ပြီး နေရပ်စွန့်ခွာထွက်ပြေးခဲ့သည့် ယူကရိန်းစစ်ဘေးဒုက္ခသည်များကိုလည်း ပြင်သစ်နိုင်ငံက နွေးထွေးစွာကြိုဆိုခဲ့သည်။

သို့သော်လည်း မိမိတို့၏ ဘဝရှေ့ရေးအတွက် ပူတင်၏လက်အောက်မှ ထွက်ပြေးပြီး ဥရောပသမဂ္ဂ၏ အချမ်းသာဆုံးနိုင်ငံများသို့ ရောက်ရှိလာကြသည့် ရုရှားနိုင်ငံသားများလည်း ရှိနေသည်။ ယူကရိန်းကို ရုရှားက ကျူးကျော်ခဲ့ချိန်ကတည်းက မိမိတို့ ကလေးငယ်များ၏ ရှေ့ရေးအတွက်သာမက ပူတင်၏ မူဝါဒကို ဆန့်ကျင်ကြောင်းဖော်ပြသည့်အနေဖြင့် သောင်းနှင့်ချီသည့် ရုရှားနိုင်ငံသားများသည် ပြည်ပနိုင်ငံများသို့ ထွက်ပြေးတိမ်းရှောင်ခဲ့ကြသည်။

ရုရားပြည်ပြေးအများစုမှာ လစ်ဘရယ် ၀ါဒဘက်ကို ယိမ်းသည့် ပညာတတ် ပရော်ဖက်ရှင်နယ်များဖြစ်သည်ဟု လေ့လာသူများက ထောက်ပြကြသည်။ လေ့လာသူအချို့ဆိုလျှင် လက်ရှိ ရုရှားပြည်ပြေးများကို Philosopher’s Ships  ဖြစ်စဉ်ဟု လူသိများထင်ရှားခဲ့သည့် ၁၉၂၂ ခုနှစ်က ဆိုဗီယက်ရုရှားမှ နှင်ထုတ်ခံခဲ့ရသည့် ပညာတတ်အသိုင်းအဝိုင်းနှင့်ပင် နှိုင်းယှဉ်ခဲ့ကြသည်။

ဂျာမနီ ဒုတိယဝန်ကြီးချုပ် ရောဘတ် ဟာဘက်ကမူ ပူတင်၏ အစိုးရလက်အောက်မှ ထွက်ပြေးလာခဲ့သည့် ရုရှားနိုင်ငံသားများအတွက် ဗီဇာလျှောက်ထားမှုလွယ်ကူစေမည့် လုပ်ထုံးလုပ်နည်းများကို စီစဉ်ပေးမည်ဖြစ်ပြီး အလုပ်အကိုင်များရရှိရန် ကူညီပေးမည်ဟု မေလအစောပိုင်းက ပြောကြားခဲ့ဖူးသည်။

“သူတို့ကို သိစေချင်တာက ကျွန်တော်တို့ဟာ သူတို့ကို အလုပ်အကိုင်ရှာဖွေပေးမယ် ဆိုတဲ့အချက်ပဲ ဖြစ်ပါတယ်”ဟု ရောဘတ်ဟာဘက်က သတင်းထောက်များကို ပြောကြားခဲ့သည်။ အမေရိကန်အရာရှိများကလည်း ရုရှားအစိုးရကိုဆန့်ကျင်သည့် အဆင့်မြင့်ပညာတတ် ရုရှားနိုင်ငံသားများကို စည်းရုံးရန် စဉ်းစားနေသည်။ လက်ရှိ ပြင်သစ်တွင် ရောက်ရှိနေသည့် ရုရှားပြည်ပြေးများနှင့် ပတ်သက်ပြီး ပြင်သစ်ပြည်ထဲရေးဝန်ကြီးဌာနကမူ မှတ်ချက်ပေးခြင်းမရှိသေးပေ။

■ ကူညီထောက်ပံ့ပေးရေး

နိုင်ငံရေးပြည်ပြေးအများစုကမူ ပြင်သစ် အနေဖြင့် ဂျာမနီနှင့် အမေရိကန်တို့ကဲ့သို့ ရုရှားပြည်ပြေးများကို ကူညီထောက်ပံ့ပေးသင့်သည်ဟု ပြောကြားခဲ့သည်။

“လူတွေက ဒီနိုင်ငံကို ပြောင်းဖို့ အခွင့် အလမ်းတစ်ရပ်ကို ရှာဖွေနေတယ်ဆိုရင် ဒီနိုင်ငံကလည်း အဲဒီလူတွေကို ကူညီထောက်ပံ့ပေးဖို့ လိုအပ်ပါတယ်”ဟု အသက် ၄၁ နှစ်အရွယ် ရုရှားပြည်ပြေးတစ်ဦးဖြစ်သည့် ဒန်နီ ယယ်ကက်ရှ်နစ်စကီးက ပြောကြားခဲ့ပြီး ပြင်သစ်၏ နာမည်ဆိုးနှင့်ကျော်ကြားသည့် ဗျူရိုကရက်တစ် အကျပ်အတည်းကို ထောက်ပြခဲ့သည်။

သူသည် သူ၏ဇနီးသည်၊ ကလေး လေး ဦး (နှစ်ဦးမှာ မွေးစားကလေးများဖြစ်) နှင့်အတူ ဧပြီလကတည်းက ပြင်သစ်နိုင်ငံတွင် ခိုလှုံခွင့်တောင်းခံခဲ့ပြီး ပါရီမြို့တော်၏ အမှတ် ၁၈ မြို့တော်နယ်နိမိတ်တွင် အေအက်ဖ်ပီသတင်းဌာနနှင့် တွေ့ဆုံခဲ့သည်။ ပါရီတွင် ရက်ပေါင်းများစွာကြာနေထိုင်ခဲ့ပြီးနောက် ကလေးငယ်များမှာ စိတ်ပျက်အားငယ်လာခဲ့ပုံ ပေါ်သည်ဟု ၎င်းက ပြောကြားခဲ့သည်။

“ကျွန်မတို့ နေစရာနေရာ မရှိပါဘူး။ တော်တော်စိတ်ဖိစီးရပါတယ်”ဟု ကက်ရှ်နစ်စကီး၏ဇနီးသည်ဖြစ်သည့် အသက် ၃၈ နှစ် အရွယ် နာတာယာက ပြောကြားခဲ့သည်။

သူတို့မိသားစုသည် ယူကရိန်းစစ်ပွဲဖြစ်ပွားခဲ့ပြီးနောက် တစ်လကျော်အကြာတွင် ပါရီသို့ ရောက်ရှိခဲ့သည်။ ဆွီဒင်၊ လစ်သူယေးနီးယား၊ အစ္စရေးနိုင်ငံတို့တွင် ပြည်သူ့ကျန်းမာရေးအထူးကုအဖြစ် အလုပ်လုပ်ခဲ့ဖူးသည့် ကက်ရှ်နစ်စကီးက သူသည် သူ၏ချစ်လှစွာသော မော်စကိုမြို့တော်ကို ခွဲခွာချင်စိတ် မရှိခဲ့ကြောင်း ပြောကြားခဲ့သည်။

သို့သော်လည်း စစ်ပွဲကြောင့် အရာရာ ပြောင်းလဲသွားခဲ့သည်ဟု ဆိုသည်။ ပထမတွင် သူသည် မော်စကိုမြို့တော်တွင် စစ်ဆန့်ကျင်ရေးဆန္ဒပြပွဲတွင် ပါဝင်ခဲ့သဖြင့် ထောင်ထဲတွင် တစ်ညအိပ်ခဲ့ရသည်ဟု ဆိုသည်။ ထို့နောက် ဆွီဒင်မီဒီယာနှင့် အင်တာဗျူးများပြုလုပ်ခဲ့ပြီး ရုရှားမှ ထွက်ခွာရန် ဆုံးဖြတ်ခဲ့ခြင်းဖြစ်သည်ဟု ကက်ရှ်နစ်စကီးက ပြောကြားခဲ့သည်။

သူတို့မိသားစုသည် ပါရီမြို့တော်သို့ ရောက်ရှိချိန်တွင် သွားစရာနေရာမရှိခဲ့ဘဲ လေဆိပ်မှ တာဝန်ရှိသူများက သူတို့ကို ယူကရိန်းဒုက္ခသည်များ နေထိုင်သည့် စင်တာတစ်ခုကို ခေါ်ဆောင်သွားခဲ့သည်ဟု ဆိုသည်။

ယင်းဒုက္ခသည်စခန်းတွင် မနေနိုင်တော့သဖြင့် တန်ဖိုးနည်း ဟိုတယ်တစ်ခုတွင် ကိုယ့်စရိတ်နှင့်ကိုယ်ငှားနေခဲ့ရသည်ဟု ကက်ရှ်နစ်စကီးက ဆိုသည်။ ပြင်သစ်သို့ရောက်ရှိပြီးနောက် သီတင်းနှစ်ပတ်အကြာတွင် သူတို့ မိသားစုသည် အဲလ်စ်မြို့တွင် ယာယီနေထိုင်ရမည့် နေအိမ်တစ်လုံးရရှိခဲ့သည်ဟု ဆိုသည်။ သူတို့အနာဂတ်မှာ မရေရာသော်လည်း ကက်ရှ်နစ်စကီးသည် အကောင်းမြင်ဝါဒီတစ်ဦးဖြစ်သည်။

“ကျွန်တော် မကြာခင်မှာ အလုပ်ရလိမ့်မယ်လို့ မျှော်လင့်ထားပါတယ်”ဟု သူက ပြောသည်။

■ ဆိုးရွားနေသည့် အခြေအနေ

ယူကရိန်းစစ်ပွဲ စတင်ဖြစ်ပွားခဲ့ပြီးနောက် ပြင်သစ်တက္ကသိုလ် ကထိကတစ်ဦးဖြစ်သည့် အန်တိုနီ နီကိုလီသည် ပူတင်၏လက်အောက်မှ ထွက်ပြေးလာသည့် ရုရှားနိုင်ငံသားများကိုကူညီရန် ပရဟိတအဖွဲ့တစ်ဖွဲ့ ထူထောင်ခဲ့ သည်။

“ရုရှားနိုင်ငံသားတွေအတွက် ဘာအကူအညီမှ လုပ်မပေးတာကို သိရတာကြောင့် ကျွန်တော်တို့က ပရဟိတအဖွဲ့ထူထောင်ခဲ့တာပါ”ဟု နီကိုလီက အေအက်ဖ်ပီသတင်းဌာနကို ပြောကြားခဲ့သည်။

၎င်းတို့အဖွဲ့သည် ရုရှားပြည်ပြေးများအတွက် ရန်ပုံငွေကောက်ခံပြီး ကူညီသွားမည် ဖြစ်သော်လည်း အနောက်နိုင်ငံများ၏ ပိတ်ဆို့မှုများကြောင့် ရုရှားနိုင်ငံသားများသည် ရုရှားလူမျိုးဟူသည့်အမည်ဖြင့် ဘဏ်အကောင့်များ ဖွင့်နိုင်မည်မဟုတ်ကြောင်း နီကိုလီက ပြောကြားခဲ့သည်။ “ဒါကလည်း ပြဿနာတစ်ခုဖြစ်နေပါတယ်”ဟု ၎င်းက ဆိုသည်။

ပါရီတွင် တစ်လကျော်ကြာနေထိုင်ခဲ့ပြီးနောက် ကတ်ကျန်ကာသည် စပိန်နိုင်ငံ ဆီးဗီးလားမြို့ကို ပြောင်းရွှေ့ခဲ့သည်။ ယင်းမြို့တွင် သူ၏စပိန်လူမျိုး ချစ်သူနှင့် အခြေချနေထိုင်ရန် မျှော်မှန်းထားသည်။

ယူကရိန်းဒုက္ခသည်များသည် လိုအပ်သည့်ကူညီထောက်ပံ့မှုများ ရရှိနေသကဲ့သို့ ရုရှားအစိုးရဆန့်ကျင်သည့် ရုရှားပြည်ပြေးများကိုလည်း ကူညီထောက်ပ့ံမှုများပေးရန် လျစ်လျူရှုမထားသင့်ကြောင်း ကတ်ကျန်ကာ က ပြောကြားခဲ့သည်။

“ကျွန်တော့်လိုလူတွေ အများကြီးရှိပြီး ကျွန်တော်တို့ကို ဘဝသစ်စတင်နိုင်ဖို့အတွက် အခွင့်အရေးပေးဖို့ လိုအပ်ပါတယ်။ အခုအခြေအနေက ဆိုးဝါးနေတာကြောင့် တစ်ခုခု လုပ်ပေးဖို့ လိုပါတယ်။ ဒီလိုမှမဟုတ်ဘူးဆို ရင်တော့ ရုရှားပြည်ပြေးတွေဟာ တရားမဝင် ရွှေ့ပြောင်းနေထိုင်သူတွေလို ဖြစ်လာနိုင်ပါတယ်”ဟု ကတ်ကျန်ကာက ပြောကြားခဲ့သည်။ Ref : AFP