ဖက်ဒရယ်ဒီမိုကရေစီပြည်ထောင်စုတည်ဆောက်ရေး လမ်းခရီးကြမ်းတွင် မွန်အမျိုးသားများ မဆုတ်မနစ် ချီတက်သွားမည်ဟု ယုံကြည်ကြောင်း ဖေဖော်ဝါရီ ၁၆ ရက်တွင် ကျရောက်သည့် (၇၅) နှစ်မြောက် စိန်ရတုမွန်အမျိုးသားနေ့သို့ ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) က သဝဏ်လွှာ ပေးပို့သည်။
ယနေ့ထက်တိုင် မပြီးဆုံးသေးဘဲ စိန်ခေါ်မှုများနှင့် ရင်ဆိုင်နေရဆဲဖြစ်သည့် ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး လမ်းခရီးကြမ်းတွင် မွန်အမျိုးသားများအနေဖြင့် ညီနောင်တိုင်းရင်းသားများနှင့် အတူတကွ တွဲလက်မြဲမြံစွာဖြင့် မဆုတ်မနစ်ကြိုးပမ်းချီတက်သွားမည်ဟု ခြွင်းချက်မရှိ ယုံကြည်ကြောင်း စိန်ရတုမွန်အမျိုးသားနေ့သို့ PPST က ဂုဏ်ပြုသဝဏ်လွှာ ပေးပို့ခြင်းဖြစ်သည်။
သမိုင်းတစ်လျှောက်တွင် မွန်အမျိုးသားများသည် ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် တိုင်းရင်းသားမဟာမိတ်တပ်ပေါင်းစုများနှင့် ပူးပေါင်း၍လည်းကောင်း၊ ဖက်ဒရယ်လမ်းညွှန် အခြေခံမူများ ရေးဆွဲရာတွင် ဦးဆောင်သည့် အခန်းကဏ္ဍမှ ပါဝင်၍လည်းကောင်း ဘဝတူညီနောင်တိုင်းရင်းသားများနှင့် လက်တွဲကာ အင်တိုက်အားတိုက်ဆောင်ရွက်ခဲ့သကဲ့သို့ ယနေ့ထိတိုင်လည်း ဆောင်ရွက်နေဆဲပင်ဖြစ်ကြောင်း PPST ၏ ဂုဏ်ပြုသဝဏ်လွှာတွင် ဖော်ပြထားသည်။
၁၉၄၇ ခုနှစ်တွင် မွန်ခေါင်းဆောင်များက ဦးဆောင်ပြီးချမှတ်ခဲ့သည့် အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ဆိုင်ရာ ရပိုင်ခွင့်များကို ထင်ဟပ်ထားသည့် တောင်းဆိုချက်ခုနစ်ရပ်သည် မွန်အမျိုးသားရေးလှုပ်ရှားမှုသမိုင်း၌ အထင်ကရနိုင်ငံရေးမှတ်တိုင်တစ်ခုဖြစ်ခဲ့ကြောင်း PPST ၏ ဂုဏ်ပြုသဝဏ် လွှာတွင် ဖော်ပြပါရှိသည်။
ယခုအခါတွင် မွန်အမျိုးသား လွတ်မြောက်မှုတော်လှန်ရေးကို မွန်ပြည်သစ်ပါတီ (NMSP) က ဦးဆောင်၍ ငြိမ်းချမ်းရေးလုပ်ငန်းစဉ်တွင် ဦးဆောင်ဦးရွက်ပြုနေခြင်းကို PPST က မှတ်တမ်းတင်ကြောင်း အဆိုပါသဝဏ်လွှာတွင် ပါရှိသည်။
ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) ကို တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့ (၁၀) ဖွဲ့မှ ထိပ်ပိုင်းခေါင်းဆောင်များဖြင့် ဖွဲ့စည်းထားပြီး ယင်းအဖွဲ့၏ဦးဆောင်မှုအလုပ်အဖွဲ့ခေါင်းဆောင်မှာ မွန်ပြည်သစ်ပါတီ၏ ဒုတိယဥက္ကဋ္ဌ နိုင်အောင်မင်း ဖြစ်သည်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) ကို ကရင်အမျိုးသားအစည်းအရုံး (KNU)၊ ရှမ်းပြည်ပြန်လည်ထူထောင်ရေးကောင်စီ (RCSS)၊ ချင်းအမျိုးသားတပ်ဦး (CNF)၊ ပအိုဝ့်အမျိုး သားလွတ်မြောက်ရေးအဖွဲ့ချုပ် (PNLO)၊ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ABSDF)၊ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးအဖွဲ့- ငြိမ်းချမ်းရေးကောင်စီ (KNU/KNLA-PC)၊ ဒီမိုကရေစီအကျိုးပြု ကရင်တပ်မတော် (ADKBA)၊ ရခိုင်ပြည်လွတ်မြောက်ရေးပါတီ (ALP)၊ မွန်ပြည်သစ်ပါတီ (NMSP) နှင့် လားဟူဒီမိုကရက်တစ်အစည်းအရုံး (LDU) တို့က လက်မှတ်ရေးထိုးထားသည်။
