၂၀၂၁ ခုနှစ် ဖေဖော်ဝါရီ ၁ ရက်မှ ၂၀၂၂ ခုနှစ် ဇန်နဝါရီ ၃ ရက်အထိ မြန်မာနိုင်ငံအရှေ့တောင်ပိုင်းနှင့် အနောက်မြောက်ပိုင်းတွင် လူဦးရေ ၃၄၉၈၀၀ ခန့် စစ်ဘေးရှောင်နေရပြီး လူသားချင်းစာနာမှုအကူအညီများ လိုအပ်နေကြောင်း ကုလသမဂ္ဂလူသားချင်းစာနာမှုဆိုင်ရာ ပေါင်းစပ်ညှိနှိုင်းရေးရုံး(OCHA) က ထုတ်ပြန်သည်။
အဆိုပါထုတ်ပြန်ချက်တွင် မြန်မာနိုင်ငံအရှေ့တောင်ပိုင်းနှင့် အနောက်မြောက်ပိုင်းတို့တွင် တပ်မတော်နှင့် ပြည်သူ့ကာကွယ်ရေးတပ်ဖွဲ့များအကြား တိုက်ပွဲများပြင်းထန်လာနေကြောင်း ဖော်ပြထားသည်။
အဆိုပါတိုက်ပွဲများကြောင့် ပြည်သူ့အိုးအိမ်များ ပျက်စီးခဲ့ရပြီး နိုင်ငံတွင်းနှင့် နိုင်ငံပြင်ပသို့ နေရပ်စွန့်ခွာ ထွက်ပြေးရမှုများ တိုးပွားလာလျက်ရှိကြောင်း OCHA က ဆိုသည်။
၂၀၂၂ ခုနှစ် ဇန်နဝါရီ ၃ ရက် ကိန်းဂဏန်း များအရ ကယားပြည်နယ်တွင် လူဦးရေ ၈၇၈၀၀၊ ကရင်ပြည်နယ်တွင် လူဦးရေ ၇၄၂၀၀၊ မွန်ပြည်နယ်တွင် လူဦးရေ ၇၂၀၀ နှင့် တနင်္သာရီတိုင်းတွင် လူဦးရေ ၁၃၀၀ အပါအဝင် မြန်မာနိုင်ငံအရှေ့တောင်ပိုင်း၌ လူဦးရေ ၁၉၂၃၀၀ ခန့် အိုးအိမ်စွန့်ခွာထွက်ပြေးခဲ့ရကြောင်း OCHA ၏ ထုတ်ပြန်ချက်တွင် ဖော်ပြထားသည်။
ထိုင်းအစိုးရ၏ ထုတ်ပြန်သည့် ကိန်းဂဏန်းများအရ လူဦးရေ ၄၇၀၀ ကျော်မှာ ထိုင်းနိုင်ငံအတွင်းရှိ ယာယီစခန်းများတွင် နေထိုင်ရလျက်ရှိကြောင်း ပါရှိသည်။
ထို့ပြင် မြန်မာနိုင်ငံအနောက်မြောက်ပိုင်းတွင် ဖေဖော်ဝါရီ ၁ ရက်နောက်ပိုင်းမှစပြီး ၂၀၂၂ ခုနှစ် ဇန်နဝါရီ ၃ ရက်အထိ ကိန်းဂဏန်းများအရ စစ်ကိုင်းတိုင်းတွင် လူဦးရေ ၁၀၃၂၀၀၊ မကွေးတိုင်းတွင် လူဦးရေ ၂၀၁၀၀ နှင့် ချင်းပြည်နယ်တွင် လူဦးရေ ၃၃၈၀၀ အပါအဝင် လူဦးရေ ၁၅၇၅၀၀ ခန့် တိုက်ပွဲရှောင်ထွက်ပြေးလာခဲ့ရပြီး သတင်းများအရ ခရစ်ယာန်ဘုရားကျောင်းများ၊ စာသင်ကျောင်းများအပါအဝင် အိမ်အလုံးပေါင်း ၁၅၅၀ ကျော် မီးလောင်ပျက်စီးဆုံးရှုံးသွားကြောင်း OCHA ၏ ထုတ်ပြန်ချက်တွင် ဖော်ပြထားသည်။
လုံခြုံရေးအခြေအနေ၊ စစ်ဆေးရေးဂိတ်၊ သွားလာခွင့်ပြုမိန့်ရရှိမှုမရခြင်းတို့ကြောင့် လူသားချင်းစာနာမှုလုပ်ငန်းဆောင်ရွက်သူများအနေဖြင့် အဆိုပါနေရာများမှ အကူအညီလိုအပ်နေသူများထံ သွားရောက်ရန် ခဲယဉ်းလျက်ရှိကြောင်း OCHA က ဆိုသည်။
မြန်မာနိုင်ငံအရှေ့တောင်ပိုင်းတွင် ဒီဇင်ဘာလက ကယားပြည်နယ်၌ တိုက်ပွဲပြင်းထန်မှုကြောင့် အချို့မိတ်ဖက်များအနေဖြင့် လုပ်ငန်းများရပ်နားထားရကြောင်းနှင့် ဒေသခံမိတ်ဖက်များမှာ ထပ်မံတိုက်ပွဲရှောင်လာသူများထံ အကူအညီများ အခွင့်ရသလောက် ပေးအပ်လျက်ရှိသော်လည်း လိုအပ်ချက်များကို လုံလောက်စွာ ဖြည့်ဆည်းပေးနိုင်ရန် ခက်ခဲလျက်ရှိကြောင်း OCHA က ဆိုသည်။
ကမ္ဘာ့စားနပ်ရိက္ခာအစီအစဉ် (WFP) သည် ၂၀၂၁ ခုနှစ် ဒီဇင်ဘာလကုန်ပိုင်းတွင် ချင်းပြည်နယ် မင်းတပ်မြို့နယ်မှ နေရပ်စွန့်ခွာလာသူ ၁၀၀ ခန့်ကို နှစ်လစာ အစားအစာများ ပေးနိုင်ခဲ့သော်လည်း နိုင်ငံတစ်ဝှမ်းက လူထောင်သောင်းများစွာမှာ လုံလောက်သည့် အစားအစာ၊ ဆေးဝါးနှင့် အဝတ်အထည်များ လိုအပ်ဆဲဖြစ်ကြောင်း OCHA ၏ ထုတ်ပြန်ချက်တွင် ဖော်ပြထားသည်။
