PSG အသင်းအားပေးသူ ပရိသတ်များသည် မန်ယူအသင်းထံမှ ပေါ့ဘာအား ကလပ်အသင်းက ခေါ်ယူရန် ကြိုးစားနေသော်လည်း ၎င်းတို့က အလိုမရှိကြောင်း လူသိရှင်ကြား ဆန္ဒထုတ်ဖော်ခဲ့ကြသည်။
လက်ရှိအချိန်တွင် မန်ယူအသင်းထံ ကမ်းလှမ်းမှုုပြုလုပ်ရန် PSG အသင်းတာဝန်ရှိသူများက ပြင်ဆင်နေပြီး PSG ပရိသတ်အချို့က ကမ်းလှမ်းမှု မပြုလုပ်မီ အချိန်မီ ဆန့်ကျင်ကန့်ကွက်ခဲ့ကြခြင်းဖြစ်သည်။
PSG အသင်း၏ အိမ်ကွင်းဖြစ်သော Parc Des Princes ကွင်းပြင်ပတွင် ပေါ့ဘာကို အလိုမရှိကြောင်း ရေးသားထားသည့် ကြီးမားသောစာတန်းကြီးကို ချိတ်ဆွဲခဲ့ကြသည်။
ယင်းစာတန်း၌ '' ပေါ့ဘာ ။ မင်းက မင်းအမေရဲ့စကားကို နားမထောင်ဘူး။ မင်းအမေက မင်း ဒီမှာ (PSG အသင်းမှာ) ကစားတာ အလိုမရှိဘူး။ ငါတို့လည်း မင်း ဒီမှာကစားတာ အလိုမရှိဘူး'' ဟု ရေးသားထားကြောင်း သိရသည်။
ပြင်သစ်လီဂူးတွင် လုံးဝမကစားဖူးသေးသူပေါ့ဘာသည် PSG အသင်းသို့ ပြောင်းရွှေ့လိုနေကြောင်း သိရသည်။
ပေါ့ဘာအား ခေါ်ယူရန် သူ၏အသင်းဟောင်းတစ်သင်းဖြစ်သည့် ဂျူဗင်တပ်စ်အသင်းက ပစ်မှတ်ထားခဲ့သော်လည်း ကိုရိုနာဗိုင်းရပ်စ်ရောဂါ ကပ်ဆိုးကာလ(Pandemic) ကြောင့်ဖြစ်ပေါ်ခဲ့သော ငွေကြေးအကျပ်အတည်းပြဿနာကြောင့် ၎င်းအားခေါ်ယူမည့်အစီအစဉ်ကို စွန့်လွှတ်ခဲ့ကြောင်း သိရှိရသည်။
