လွိုင်ကော် နည်းပညာတက္ကသိုလ်၊ ကွန်ပျူတာတက္ကသိုလ်မှ ပါမောက္ခချုပ် နှစ်ဦး နှင့် အစိုးရစက်မှုလက်မှုသိပ္ပံ ကျောင်းအုပ်ကြီးတို့အား ဖမ်းဆီးပြီး ပုဒ်မ ၅၀၅ (က) ဖြင့် တရားစွဲဆိုထားကြောင်း သိရသည်။
လွိုင်ကော် နည်းပညာတက္ကသိုလ် ပါမောက္ခချုပ် ဒေါက်တာဇော်ဝင်းအောင် ၊ ကွန်ပျူတာတက္ကသိုလ် ပါမောက္ခချုပ် ဒေါက်တာအောင်မြင့်အေးနှင့် အစိုးရစက်မှုလက်မှုသိပ္ပံကျောင်းအုပ်ကြီး ဒေါက်တာဇော်လင်းထွန်းတို့အား တက္ကသိုလ်ကျောင်းဝန်းများအတွင်း မတ် ၇ ရက်မှစ ကျောင်းများတွင် တပ်မတော်နှင့် ရဲတပ်ဖွဲ့ဝင်များ လာရောက် ခေတ္တစခန်းချမည်ကို လူထုထောင်ချီ လာရောက်ဝန်းရံမှု ဖြစ်ခဲ့ပြီးနောက် ထိုကဲ့သို့ တရားစွဲဆိုခဲ့ခြင်း ဖြစ်ကြောင်း သိရသည်။
"မတ် ၁၀ ရက်က ဆရာကြီးတို့ကို ၂ နာရီခွဲ စည်းဝေးရှိတယ်လို့ ခေါ်သွားတာ၊ ညထိ အိမ်ပြန်ရောက်မလာတော့ စုံစမ်းကြည့်မှ ဖမ်းထားတယ်လို့ သိရတယ် ၊ မတ် ၁၁ ရက်မှာ လွိုင်ကော်ထောင်ထဲ ရှိနေတယ် သိရတယ်၊ ဒီရက် မတ် ၁၂ ကျတော့ကာ ရှေ့နေ့တွေနဲ့ တိုင်ပင်ပြီး ဆရာကြီးတို့ကို အာမခံရအောင် ကြိုးစားပေးနေပါတယ် ၊ ဆရာကြီးတို့က အသက်လည်းကြီး ရောဂါတွေလည်း စုံနေကောလေ ၊ ကျောင်းတွေထဲ စခန်းချမှာကို အရပ်သားတွေက လာဝန်းရံတာကို အားပေးအားမြောက် သဘောမျိုးဖြစ်လို့ တရားစွဲတယ်လို့ သိရတယ် " ဟု နီးစပ်သည့် အသိုင်းအဝိုင်းမှ ဆရာတစ်ဦးက ပြောဆိုသည်။
ထိုသို့ တရားစွဲဆို ဖမ်းဆီးထားမှုအား နည်းပညာဆိုင်ရာဆရာများအဖွဲ့ချုပ် (TTF) မှ ကန့်ကွက်ကြောင်းနှင့် ပြည်သူလူထုများမှ ဝန်းရံကူညီပေးကြပါရန် မေတ္တာရပ်ခံစာ ထုတ်ပြန်ထားကြောင်းလည်း သိရသည်။
