နိုင်ငံတကာဘောလုံးသမိုင်းနှင့်အချက်အလက်ဆိုင်ရာအဖွဲ့အစည်း (IFFHS) က ရွေးချယ်သည့် ၂၀၂၀ ပြည့်နှစ်အတွက် အကောင်းဆုံးအသင်းတွင် ဘိုင်ယန်မြူးနစ်အသင်းမှ လေးဦးဖြင့် အများဆုံးပါဝင်ခဲ့ကြောင်း သိရသည်။
IFFHS သည် ၂၀၂၀ ပြည့်နှစ်အတွက် အကောင်းဆုံးအသင်းကို (၄-၃-၃) ကစားကွက်ဖြင့် ရွေးချယ်ထားပြီး ဘိုင်ယန်မြူးနစ်အသင်းမှ ဂိုး- နော်ယာ၊ နောက်တန်း-အယ်လ် ဖွန်ဆိုဒေးဗီးစ်၊ အလယ်တန်း-ကင်မစ်ချ်၊ ရှေ့တန်း-လီဝန်ဒေါစကီးတို့ ရွေးချယ်ခံခဲ့ရသည်။
ဘိုင်ယန်မြူးနစ်အသင်းသည် ပြီးခဲ့သည့် ၂၀၁၉-၂၀၂၀ ရာသီတွင် ဘွန်ဒစ်လီဂါ၊ ဂျာမန်ဖလား၊ ချန်ပီယံလိဂ်စသည့် အဓိကဆုဖလားသုံးခုစလုံး ဆွတ်ခူးရယူနိုင်ခဲ့သလို ဂျာမန်စူပါဖလားနှင့် ဥရောပစူပါဖလားပြိုင်ပွဲတွင်လည်း ဗိုလ်စွဲထားသဖြင့် အရေအတွက်အများဆုံး ရွေးချယ်ခံရခြင်းဖြစ်သည်။
ပရီးမီးယားလိဂ်ချန်ပီယံ လီဗာပူးလ်အသင်းက သုံးဦးဖြင့် ဒုတိယအများဆုံး ရွေးချယ်ခံရပြီး နောက်တန်း- ဗန်ဒိုက်၊ အာနိုးလ်၊ အလယ်တန်း- သီယာဂိုတို့ ပါဝင်ကြောင်း သိရသည်။
သီယာဂိုသည် ပြီးခဲ့သည့်နွေရာသီတွင် ဘိုင်ယန်မြူးနစ်အသင်းမှ လီဗာပူးလ်အသင်းသို့ ပြောင်းရွှေ့လာသူဖြစ်သည်။
ကျန်လေးဦးမှာမူ တစ်သင်းစီမှဖြစ်ပြီး ဘာစီလိုနာအသင်းခေါင်းဆောင် မက်ဆီ၊ ဂျူဗင်တပ်စ်အသင်းတိုက်စစ်မှူး စီရော်နယ်လ်ဒို၊ မန်စီးတီးအသင်းကွင်းလယ်လူ ဒီဘရိုင်းနားနှင့် ရီးယဲလ်မက်ဒရစ်အသင်းခေါင်းဆောင် ရာမို့စ်တို့ဖြစ်ကြောင်း သိရသည်။
ထို့ပြင် အကောင်းဆုံးနည်းပြအဖြစ် ဘိုင်ယန်မြူးနစ်အသင်းအား နည်းပြသက်တမ်း လပိုင်းအတွင်း ဆုဖလားငါးလုံးအထိ ဆွတ်ခူးရယူပေးထားသည့် ဟန်ဆီဖလစ်ခ်က ရွေးချယ်ခံခဲ့ရ သည်။
