နယူးပို့တ် - နယူးကာဆယ် (မြန်မာစံတော်ချိန် စက်တင်ဘာ ၃၀ ရက်၊ ည ၁၁:၀၀ နာရီ)

ပုံမှန်အားဖြင့်တော့ နယူးကာဆယ်အသင်းက လိဂ်ဖလားကို ဦးစားပေးလေ့မရှိပေမယ့် အသင်းငယ်တွေနဲ့သာ တွေ့နေလို့ အမှားလုပ်ဖို့တော့မရှိပါဘူး။ League Two ကလပ်ကို နယူး ကာဆယ် ဂိုးပြတ်သွင်းဖို့များတယ်။

ဘန်လေ - မန်စီးတီး (မြန်မာစံတော်ချိန် အောက်တိုဘာ ၁ ရက်၊ နံနက် ၀၀:၃၀ နာရီ)

 

လက်စတာအသင်းကို အိမ်ကွင်းမှာ အရှက်တကွဲဂိုးပြတ်ရှုံးနိမ့်ခဲ့မှုကနေ မန်စီးတီးအသင်း ပြန်ရုန်းထွက်ပြဖို့လိုနေတယ်။ မန်စီးတီးအသင်းက လိဂ်ဖလား(၃)နှစ်ဆက် ဗိုလ်စွဲထားပေမယ့် အစောပိုင်းအဆင့်တွေမှာ ရလဒ်ပိုင်းက မပြတ်သားတာ များပါတယ်။ ဒါပေမဲ့ အခုပွဲမှာတော့ မန်စီးတီးအသင်း ယုံကြည်မှု ပြန်တည်ဆောက်ရမှာဖြစ်လို့ ဘုန်းမောက်နဲ့ကစားတုန်းကထက် ပိုမိုတောင့်တင်းတဲ့လူစာရင်းနဲ့ ရင်ဆိုင်ဖို့ရှိပါတယ်။ ဘန်လေကတော့ လိဂ်ဖလားကို အလေးထားယှဉ်ပြိုင်လေ့ မရှိပါဘူး။ မန်စီးတီးဘက်ကပဲ ရပ်တည်သင့်တယ်။

ဘရိုက်တန် - မန်ယူ (မြန်မာစံတော်ချိန် အောက်တိုဘာ ၁ ရက်၊ နံနက် ၁:၁၅ နာရီ)

 

ဘရိုက်တန်နဲ့ပရီးမီးယားလိဂ်ပွဲမှာ မန်ယူအသင်း ဒီရာသီ ပထမဆုံးနိုင်ပွဲစရခဲ့ပေမယ့် ခြေစွမ်းပိုင်းကြောင့် ဝေဖန်ခံနေရတယ်။ ပြီးခဲ့တဲ့ လူတန်နဲ့ပွဲတုန်းကလည်း ရပ်ရှ်ဖို့ဒ်၊ ဘရူနိုဖာနန်ဒက်စ်၊ ဂရင်းဝုဒ်တို့ဝင်လာမှသာ မန်ယူအသင်း ဂိုးပြတ်ခဲ့တာ ဖြစ်တယ်။ ဒါပေမဲ့ ဒီပွဲပြီးရင် မန်ယူက စပါးအသင်းနဲ့ ပရီးမီးယားလိဂ် ပွဲကျပ်ကစားဖို့ရှိနေလို့ လူစုံထုတ်ဖို့တော့ မရှိလောက်ဘူး။ ဘရိုက်တန်အနေနဲ့ ပရီးမီးယားလိဂ်ရှုံးကြွေးကို ပူပူနွေးနွေး ဆပ်နိုင်တဲ့အခွင့်အရေးရှိပေမယ့် လိဂ်ဖလားမှာ စတုတ္ထအဆင့် မကျော်တာ အတော်ကြာပါပြီ။ မန်ယူပဲ နိုင်ဖို့များတယ်။

အဲဗာတန် - ဝက်စ်ဟမ်း (မြန်မာစံတော်ချိန် အောက်တိုဘာ ၁ ရက်၊ နံနက် ၁:၁၅ နာရီ)

 

အဲဗာတန်အသင်းအနေနဲ့ ရာသီအဖွင့် နိုင်ပွဲဆက်နေတဲ့ အရှိန်ကို ဆက်ထိန်းနိုင်ဖို့ ကြိုးပမ်းရလိမ့်မယ်။ ဝက်စ်ဟမ်းကတော့ လက်ရှိပုံစံအတိုင်းဆို လိဂ်ဖလားကို စောစောစီးစီးလက် လွှတ်တာ ပိုကောင်းလိမ့်မယ်ထင်တယ်။ အဲဗာတန် နိုင်မှာပါ။