ဘာစီလိုနာအသင်းသည် မက်ဆီအား အသင်းတွင် ဆက်ရှိနေရန် အစွမ်းကုန်ကြိုးစားသွားမည်ဖြစ်ပြီး မည်သို့မျှတားမရပါကလည်း ပေါင်သန်း (၂၀၀)ရရှိမှ လက်လွှတ်သွားဖွယ်ရှိကြောင်း စပိန်အားကစားသတင်းစာ ASက ဖော်ပြခဲ့သည်။
မက်ဆီသည် ဘာစီလိုနာအသင်းနှင့်ချုပ်ဆိုထားသည့် စာချုပ်လျော်ကြေးမှာ ယူရိုသန်း (၇၀၀) ဖြစ်ပြီး ယင်းစာချုပ်တွင် မက်ဆီအနေဖြင့် အသင်းနှင့်လမ်းခွဲရန်ဆန္ဒရှိပါက ပြောင်းရွှေ့ကြေးအလွတ်ဖြင့် ထွက်ခွာရန် ဇွန်(၁၀)ရက်မတိုင်မီ တောင်းဆိုခွင့်ရှိသည်ဆိုသော အချက်ပါဝင်ကြောင်း သိရသည်။
သို့သော် ကပ်ဘေးကြောင့် ၂၀၁၉-၂၀ ရာသီမှာ သြဂုတ်လတွင်မှ အဆုံးသတ်ခဲ့သဖြင့် မက်ဆီအနေဖြင့် ယင်းအချက်ကိုတိုးမြှင့်ကာ ပြောင်းရွှေ့ကြေးအလွတ်ဖြင့် ထွက်ခွာခွင့်ပေးရန် တောင်းဆိုခဲ့ခြင်းဖြစ်သည်။
သို့သော် ဘာစီလိုနာအသင်းသည် မက်ဆီအားအသင်းတွင် ဆက်နေရန်ကြိုးစားမှု အဆင်မပြေပါက ၎င်းအား ပြောင်းရွှေ့ကြေးအလွတ်ဖြင့် လက်လွှတ်မည် မဟုတ်ကြောင်း သိရသည်။
ထို့ပြင် ဘာစီလိုနာအသင်းသည် မက်ဆီနှင့် တရားရင်ဆိုင်လိုခြင်းမရှိဘဲ ပေါင်သန်း (၂၀၀)ရပါက ၎င်းကို အသင်းမှထွက်ခွာခွင့်ပေးဖွယ်ရှိနေကြောင်း AS က ဖော်ပြခဲ့သည်။
