ဘာစီလိုနာအသင်း၏ ဥက္ကဋ္ဌဖြစ်သူ ဘာတိုမူက လာမည့်ရာသီတွင် လူငယ်အသင်းမှ ကစားသမားများအပါအဝင် ကစားသမားသစ် (၇)ဦးရှိနေပြီးဖြစ်ကြောင်း အတည်ပြုပြောကြားခဲ့သည်။
ဘာစီလိုနာအသင်းသည် ကိုရိုနာဗိုင်းရပ်စ်ပြဿနာကြောင့် ဘဏ္ဍာရေးပိုင်းဆိုင်ရာ အခက်အခဲရှိနေသည့်အတွက် ထိပ်တန်းအပြောင်းအရွှေ့များကို အများအပြားပြုလုပ်နိုင်မည် မဟုတ်ဘဲ လူငယ်အသင်းမှ ကစားသမားများကိုသာ အဓိကထားဖွယ်ရှိနေသည်။
ပြောင်းရွှေ့ကြေးမြင့်မားသည့် ကစားသမားများအတွက်မူ ကစားသမားအလဲအထပ်နှင့် ကစားသမားရောင်းချရငွေတို့မှသာ ပြန်လည်အသုံးပြုလိမ့်မည်ဟုလည်း မီဒီယာများက သုံးသပ်ခဲ့ကြသည်။
ဘာတိုမူကလည်း "ကျွန်တော်တို့အသင်းမှာ ကစားသမားသစ် (၇)ဦးရှိပြီးသားပါ။ အားလုံးက ဘာစီလိုနာအသင်းအဆင့်အတန်းနဲ့ ကိုက်ညီတဲ့အရည်အသွေးရှိသူတွေလည်းဖြစ်ပါတယ်။ ဇန်နဝါရီလကတည်းက ဘာစီလိုနာအသင်းရဲ့အနာဂတ်အတွက် ကစားသမားတွေရှိနေပြီး လာမယ့်ရာသီမှာ အသုံးပြုသွားမှာပါ။ ပတ်ဒရီက မယုံနိုင်လောက်တဲ့အရည်အသွေးတွေနဲ့ ပြည့်စုံနေသူဖြစ်ပြီး ထရင်ကာအိုကိုတော့ ဂျူဗင်တပ်စ်ကနေ ကျွန်တော်တို့ ခေါ်ယူခဲ့ပါတယ်။ အခု အချိန်မှာတော့ သူက ဥရောပရဲ့ အသက်(၂၁)နှစ်အောက်ကစားသမားတွေထဲမှာ အကောင်းဆုံးဖြစ်နေပါပြီ။ ဖာနန်ဒက်စ် ပွဲကစားချိန်နည်းခဲ့တာက စာချုပ်စာတမ်းကိစ္စကြောင့်ဖြစ်ပြီး ဒါကိုဖြေရှင်းပြီးပါပြီ။ ပြီးတော့ ဝါရင့် ကစားသမားတစ်ဦးဖြစ်တဲ့ ယာနစ်ကလည်း အသင်းကြီးအတွက် ပထမဆုံးမိနစ်ကတည်းက စကစားနိုင်တဲ့ သူပါ" ဟု ဆိုခဲ့သည်။
