ဖွဲ့စည်းပုံအခြေခံဥပဒေပြင်ဆင်ရေးအတွက် အဆိုပြုချက် ၃၇၆၅ ချက်အနက်မှ ဥပဒေမူကြမ်းတွင် ထည့်သွင်းဆောင်ရွက်မည့် အချက်များကို မဲပေးရွေးချယ်၍ အတည်ပြုခြင်းများ ဆောင်ရွက်ရာတွင် အခန်း ၂ အထိ ဆောင်ရွက်ပြီးစီးနေပြီဖြစ်ကြောင်း ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီထံမှ သိရသည်။
ဖွဲ့စည်းပုံ အခြေခံဥပဒေနှင့်ပတ်သက်၍ ဖွဲ့စည်းပုံအခြေခံဥပဒေပြင်ဆင်ရေးပူးပေါင်းကော်မတီက ပြည်ထောင်စုလွှတ်တော်သို့ တင်ပြထားသည့် ပြင်ဆင်၊ ဖြည့်စွက်၊ ပယ်ဖျက်ရန် တင်ပြချက်ပေါင်း ၃၇၆၅ အား ပြည်ထောင်စုလွှတ်တော်က အတည်ပြုခဲ့ပြီး နောက်ဆက်တွဲအနေဖြင့် ဥပဒေမူကြမ်းရေးဆွဲနိုင် ရေးအတွက် ဆောင်ရွက်နေခြင်းဖြစ်သည်။
“ပြင်ဆင်ရေး ပူးပေါင်းကော်မတီရဲ့ အစီရင်ခံစာပါ တင်ပြချက်ပေါင်း ၃၇၀၀ ကျော် နဲ့ ပတ်သက်ပြီး နောက်ဆက်တွဲအနေနဲ့ ဥပဒေမူကြမ်းရေးဆွဲရေးအတွက် ဆောင်ရွက်တာ ဖြစ်တယ်။ ဆောင်ရွက်တဲ့အခါမှာ ဥပဒေမှာ က ပုဒ်မတစ်ခုကို ပြင်ဆင်ချက်တစ်ခုပဲ ပါရ မှာဖြစ်တယ်။ အခု အခန်း (၂) ပြီးသွားပြီ။ ပုဒ်မ ၅၆(စ)အထိ ပြီးသွားပြီပေ့ါနော်” ဟု အဆိုပါ ပြင်ဆင်ရေးပူးပေါင်းကော်မတီတွင် ပါဝင်သူတစ်ဦးက ပြောကြားသည်။
ဖွဲ့စည်းပုံအခြေခံဥပဒေနှင့်ပတ်သက်၍ ပြင်ဆင်ရန်၊ ဖြည့်စွက်ပယ်ဖျက်ရန် အချက်ပေါင်း ၃၇၆၅ ချက်ပါဝင်သော အစီရင်ခံစာကို ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီက ဇူလိုင် ၁၅ ရက်က ပြုလုပ်သော ပြည်ထောင်စုလွှတ်တော်အစည်းအဝေးတွင် တင်သွင်းခဲ့ခြင်းဖြစ်ပြီး သြဂုတ် ၉ ရက်က ပြုလုပ်သော လွှတ်တော်အစည်းအဝေးတွင် မဲခွဲ အတည်ပြုခဲ့ခြင်းဖြစ်သည်။
ပြီးခဲ့သည့် ဇန်နဝါရီ ၂၉ ရက်တွင် မကွေးတိုင်းဒေသကြီး မဲဆန္ဒနယ်အမှတ်(၄)မှ ပြည်ထောင်စုလွှတ်တော်ကိုယ်စားလှယ် ဦးအောင်ကြည်ညွန့် တင်သွင်းခဲ့သော ဖွဲ့စည်း ပုံအခြေခံဥပဒေပြင်ဆင်ရေး လုပ်ငန်းများ ဆောလျင်စွာဆောင်ရွက်နိုင်ရေးအတွက် ပြင်ဆင်ရေး ပူးပေါင်းကော်မတီတစ်ရပ်ဖွဲ့စည်းရန် အဆိုအား ဖေဖော်ဝါရီ ၆ ရက်တွင် လွှတ်တော်က ဆွေးနွေးအတည်ပြုခဲ့ခြင်းဖြစ်သည်။
ယင်းသို့ အတည်ပြုချက်အရ ကော်မတီဥက္ကဋ္ဌအဖြစ် ပြည်ထောင်စုလွှတ်တော်ဒုတိယ နာယက ဦးထွန်းထွန်းဟိန်၊ ဒုတိယဥက္ကဋ္ဌအဖြစ် အမျိုးသားလွှတ်တော်ဒုတိယဥက္ကဋ္ဌ ဦးအေးသာအောင်၊ အတွင်းရေးမှူးအဖြစ် ရန်ကုန်တိုင်းဒေသကြီး မဲဆန္ဒနယ်အမှတ် (၃)မှ အမျိုးသားလွှတ်တော်ကိုယ်စားလှယ် ဒေါက်တာမြတ်ဉာဏစိုး၊ တွဲဖက်အတွင်းရေးမှူးအဖြစ် ဒေါပုံမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဌေးဝင်းအောင်(ခ) ဦးပြုံးချိုတို့ကို တာဝန်ပေးအပ်ခဲ့ပြီး အမျိုးသား ဒီမိုကရေစီအဖွဲ့ချုပ်ပါတီမှ လွှတ်တော်ကိုယ်စားလှယ် ၁၈ ဦး၊ တပ်မတော်သားလွှတ်တော် ကိုယ်စားလှယ်ရှစ်ဦး၊ ပြည်ခိုင်ဖြိုးပါတီ၊ ရခိုင် အမျိုးသားပါတီနှင့် ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီမှ နှစ်ဦးစီ၊ တအောင်း (ပလောင်)အမျိုးသားပါတီ၊ ဇိုမီးဒီမိုကရေစီ အဖွဲ့ချုပ်ပါတီ၊ ပအိုဝ်းအမျိုးသားဒီမိုကရေစီအဖွဲ့ချုပ်ပါတီ၊ လီဆူအမျိုးသားဖွံ့ဖြိုးတိုးတက်ရေးပါတီ(ဒူးလေးပါတီ)၊ ကချင်ပြည်နယ် ဒီမိုကရေစီပါတီ၊ ကိုးကန့်ဒီမိုကရေစီနှင့်ညီညွတ်ရေးပါတီ၊ တိုင်းရင်းသားစည်းလုံးညီညွတ် ရေးပါတီ၊ မွန်အမျိုးသားပါတီ၊ “၀” ဒီမိုက ရက်တစ်ပါတီနှင့် အမျိုးသားညီညွတ်သောဒီမိုကရက်တစ်ပါတီတို့မှ လွှတ်တော်ကိုယ်စား လှယ် တစ်ဦးစီနှင့် တစ်သီးပုဂ္ဂလလွှတ်တော် ကိုယ်စားလှယ်တစ်ဦးတို့ဖြင့် ၄၅ ဦးပါ ပြင် ဆင်ရေး ပူးပေါင်းကော်မတီကို ဖွဲ့စည်းခဲ့ခြင်း ဖြစ်သည်။
အဆိုပါ ၄၅ ဦးကော်မတီထဲမှ အမျိုးသားညီညွတ်သော ဒီမိုကရက်တစ်ပါတီမှ ကိုယ်စားလှယ်ဖြစ်သူ မအူပင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးစိန်ဝင်းနှင့် ရခိုင်အမျိုးသားပါတီမှ ကိုယ်စားလှယ်နှစ်ဦးတို့ နုတ်ထွက်စာတင်ထားပြီး လီဆူအမျိုးသားဖွံ့ဖြိုးတိုးတက်ရေးပါတီ(ဒူးလေးပါတီ)မှ ကိုယ်စားလှယ်ဖြစ်သူကလည်း ပါတီဝင်အဖြစ်မှ နုတ်ထွက်လိုက်ခြင်းကြောင့် ကော်မတီတွင် ကိုယ်စားပြုမှုမရှိတော့ကြောင်း သိရသည်။
လက်ရှိတွင် ဖွဲ့စည်းပုံအခြေခံဥပဒေနှင့် ပတ်သက်၍ ဒုတိယအကြိမ်ပြင်ဆင်သည့် ဥပဒေမူကြမ်း သုံးခုကို ပြည်ခိုင်ဖြိုးပါတီက ပြည်ထောင်စုလွှတ်တော်သို့ တင်သွင်းထားပြီး တပ်မတော်ကလည်း ဥပဒေမူကြမ်း နှစ်ခုကို တင်သွင်းထားကြောင်း သတင်းရရှိသည်။
