မန်စီးတီးအသင်းနည်းပြ ဂွါဒီယိုလာက အသင်းအင်အားပိုတောင့်တင်းရန် လာမည့်နွေရာသီတွင် (၃)နေရာ သို့မဟုတ် (၄)နေရာကို ဖြည့်တင်းနိုင်ရေး မျှော်လင့်နေလျက်ရှိကြောင်း ပြောကြားခဲ့သည်။
လက်ရှိပရီးမီးယားလိဂ်ချန်ပီယံအသင်းသည် ယခုရာသီတွင် ဖလား(၄)လုံးလမ်းကြောင်းပေါ်၌ရှိနေပြီး နည်းပြ ဂွါဒီယိုလာကလည်း သူ၏အသင်းအနေအထားကို ကျေနပ်အားရမှုရှိကြောင်း မကြာခဏဖွင့်ဟခဲ့သည်။
သို့သော် ဂွါဒီယိုလာမှာ ပြီးခဲ့သည့်သောကြာနေ့က သတင်းထောက်များသို့ ပြောကြားမှုတွင်မူ ယခုကဲ့သို့ အံ့အားသင့်ဖွယ် ဖွင့်ဟခဲ့ခြင်းဖြစ်သည်။
'' ကျွန်တော်တို့ Holding Midfielder တစ်ယောက်ခေါ်ဖို့ ကြိုးပမ်းနေတာ သိကြပါတယ်။ ပြီးတော့ တခြားနေရာတွေလည်း တွေးနေပါတယ်။ နှစ်ရာသီအတွင်း ပြန်ကြည့်ရင် (၃)နေရာလည်း ဖြစ်နိုင်ပါတယ်။ အမှန်တရားက ကျွန်တော်တို့ မန်ဒီကို ပွဲအနည်းငယ်လောက်ပဲ သုံးခဲ့ရတယ်။ ဘာတွေဖြစ်လာမလဲ ကျွန်တော် မသိပါဘူး။ ဒါပေမဲ့ ဒီနေရာအတွက် ကစားသမားသစ်ရှာဖို့ ကျွန်တော်တို့ တွေးနေပါတယ်။ ကျွန်တော်တို့ လုပ်ဆောင်ဖို့က (၃)နေရာ သို့မဟုတ် (၄)နေရာလောက်ရှိနိုင်ပါတယ်။ ပြီးတော့ ကျွန်တော်တို့မှာ တခြားစိတ်ကူးတွေလည်း ရှိပါတယ်'' ဟု ဂွါဒီယိုလာက ပြောကြားခဲ့သည်။
(၂၄)နှစ်အရွယ်ရှိ မန်ဒီမှာ ၂၀၁၇ နွေရာသီက မန်စီးတီးအသင်းသို့ ရောက်ရှိလာသော်လည်း ဒဏ်ရာကြောင့် မကြာခဏ အနားယူနေရပြီး ပရီးမီးယားလိဂ် (၁၆)ပွဲသာ ပါဝင်ကစားထားနိုင်ခဲ့သည်။
ထို့ပြင် ဂွါဒီယိုလာက ကွင်းလယ်လူ ဂွန်ဒိုဂန်၏အနာဂတ်နှင့်ပတ်သက်ပြီး အသင်းတွင် ကာလကြာရှည်ဆက်ရှိနိုင်သည်ဟု မှတ်ချက်ပြုခဲ့သည်။
ဂွန်ဒိုဂန်သည် မန်စီးတီးအသင်းနှင့်စာချုပ်မှာ ၂၀၂၀ ပြည့်နှစ်တွင် သက်တမ်းကုန်ဆုံးမည်ဖြစ်ပြီး
