ရန်ကုန်-မန္တလေးရထားလမ်းပိုင်း ညောင်ခြေထောက်နှင့် ကျွဲပွဲဘူတာအကြားတွင် ယနေ့ (မတ် ၂၇ ရက်) နံနက်ပိုင်း၌ရထားလမ်း မိုင်းထောင်ဖောက်ခွဲခံရပြီး လုံခြုံရေးကင်းလှည့် RGC ရထား လက်နက်ငယ်ဖြင့်ပစ်ခတ်ခံရကြောင်း သိရသည်။
အဆိုပါ ရန်ကုန်-မန္တလေးရထားလမ်းပိုင်းတွင် ဖြူး- တောင်ငူလမ်းပိုင်း လုံခြုံရေးစစ်ဆေးသည့် RGC-125 သည် ညောင်ခြေထောက် ဘူတာမှ မတ် ၂၇ ရက်နံနက် ၇ နာရီ ၃၆ မိနစ် ထွက်ခွာလာပြီး ညောင်ခြေထောက်နှင့် ကျွဲပွဲ ဘူတာအကြား မိုင် ၁၄၄/၁၀-၁၁ ခန့်အရောက် နံနက် ၇ နာရီ မိနစ် ၅၀ တွင် သံလမ်းအနောက်ဘက် ရန်ကုန်-မန္တလေး ကားလမ်းဘက်မှ လက်နက်ငယ်ဖြင့် ပစ်ခတ်သဖြင့် RGC 125 စက်ခေါင်း၏ အနောက်ဖက်မှန် တစ်ချပ်ကွဲပြီး အနောက်ဖက်သံဘောင်တွင် ကျဉ်ထိမှန်ခဲ့ကြောင်းနှင့် အဆိုပါပစ်ခတ်မှုကြောင့် စက်ခေါင်းမောင်းနှင့် လုံခြုံရေးတပ်ဖွဲ့များ ထိခိုက်မှု မရှိကြောင်းသိရသည်
ထို့အတူ မတ် ၂၇ ရက် နံနက် ၉ နာရီ ၁၅ မိနစ်အချိန်တွင် ရန်ကုန်-မန္တလေး ရထားလမ်းပိုင်းရှိ ပဲခူးတိုင်းဒေသကြီး၊ အုတ်တွင်းမြို့နယ်၊ ညောင်ခြေထောက်ဘူတာနှင့် ကျွဲပွဲဘူတာအကြား၊ မိုင်တိုင် အမှတ် ၁၄၄/၁၀-၁၁ နေရာရှိ အဆန်ရထားလမ်းပေါ်တွင် သောင်းကျန်းသူအဖွဲ့က ထောင်ထားသည့် မိုင်းပေါက်ကွဲမှုကြောင့် အဆန်ရထားလမ်း ထိခိုက်ပျက်စီးခဲ့သဖြင့် ညောင်ခြေထောက်ဘူတာနှင့် ကျွဲပွဲ ရထားလမ်းပိုင်းအား ဧကလမ်းစနစ်အသုံးပြု၍ အစုန်လမ်းမှ နံနက် ၉ နာရီ ၁၈ မိနစ်အချိန်တွင် ရထားများအား ဖြတ်သန်းခွင့်ပြုခဲ့ကြောင်း သိရသည်။
ထို့နောက် မိုင်းပေါက်ကွဲမှု ဖြစ်စဉ်ဖြစ်ပွားရာနေရာသို့ နယ်မြေဒေသတာဝန်ရှိသူများ၊ နယ်မြေခံ လုံခြုံရေးတပ်ဖွဲ့ဝင်များက နယ်မြေရှင်းလင်းစစ်ဆေးဆောင်ရွက်ခဲ့ရာ မိုင်းခွဲခံရမှု ကြောင့် အဆန်လမ်းရှိ အနောက်ဘက်သံလမ်း(၁၀)ပေခန့် တွန့်ခေါက်သွားပြီး လမ်းခင်းကျောက်နှင့် ကွန်ကရစ်ဇလီဖားတုံးအချို့ ပျက်စီးခဲ့ကြောင်း သိရသည်။
မြန်မာ့မီးရထား ဝန်ထမ်းများအနေဖြင့် လမ်းပိုင်းအား ပြန်လည်ဖွင့်လှစ်နိုင်ရေးဆောင်ရွက်ခဲ့ပြီး အဆန်လမ်း၏ သံလမ်းအား လဲလှယ်ခြင်း၊ လမ်းပြုပြင်ခြင်းများကို မတ် ၂၇ ရက် ညနေ ၆ နာရီအချိန် အပြီးဆောင်ရွက်နိုင်ခဲ့ပြီး အဆန်ရထားလမ်းပိုင်းအားပြန်လည်ဖွင့်လှစ်၍ ရထားများ ပုံမှန်အတိုင်းပြေးဆွဲပေးလျက်ရှိကြောင်းသိရသည်။
၂၀၂၁ ခုနှစ်၊ ဖေဖော်ဝါရီလမှစ၍ ယခုအချိန် အထိ မြန်မာ့မီးရထားလမ်းကွန်ရက်တစ်ခုလုံးတွင် ရထားလမ်းနှင့် ရထားဘူတာနယ်မြေအတွင်း မိုင်းထောင်ဖောက်ခွဲဖျက်ဆီးခံရမှု အကြိမ် ၈၀၊ ရထားတံတား/သံလမ်းများအားမိုင်းထောင်ဖောက်ခွဲဖျက်ဆီးခံရမှု ၁၇၅ ကြိမ်၊ ဘူတာအဆောက်အဦနှင့် ဝန်ထမ်းနေအိမ်များအား မီးရှို့ ဖျက်ဆီးခံရမှု ၁၆ ကြိမ်ရှိပြီဖြစ်ကြောင်း သိရသည်။
