တာမွေမြို့နယ် မြန်မာ့ဂုဏ်ရောင်အိမ်ရာဝန်းအတွင်းရှိ မြို့ဦးပရိယတ္တိစာသင်တိုက်တွင် လက်လုပ်လက်ပစ်ဗုံး တစ်လုံး ပေါက်ကွဲမှုကြောင့် ဆရာတော်တစ်ပါး ပျံလွန်တော်မူခဲ့ရကြောင်း သိရသည်။
ယနေ့(နိုဝင်ဘာ ၁၈ ရက်) နံနက်တွင် တာမွေမြို့နယ်၊ မေတ္တာညွန့်ရပ်ကွက်၊ မြို့ဦးကျောင်းတိုက် ဘုန်းကြီးကျောင်းဝင်းအတွင်း ပေါက်ကွဲမှုဖြစ်ပွားခဲ့ပြီး ကျောင်းထိုင်ဆရာတော်မှာ ပျံလွန်တော်မူသွားကြောင်း သိရသည်။
ယင်းဖြစ်စဉ်နှင့်ပတ်သက်၍ သတင်းဌာနတစ်ခု၏ မေးမြန်းမှုအပေါ် " ၂၀၂၄ ခုနှစ်၊ နိုဝင်ဘာ ၁၈ ရက် နံနက် ၈ နာရီ ၁၀ မိနစ်ခန့်တွင် တာမွေမြို့နယ်၊ မေတ္တာညွန့်ရပ်ကွက်၊ သံသုမာလမ်း၊ မြန်မာ့ဂုဏ်ရောင်အိမ်ရာဝန်းအတွင်းရှိ မြို့ဦးပရိယတ္တိစာသင် တိုက်တွင် လက်လုပ်လက်ပစ်ဗုံးတစ်လုံး ပေါက်ကွဲခဲ့ပါသည်" ဟု နစက သတင်းထုတ်ပြန်ရေးအဖွဲ့က ပြောကြားသည်။
အဆိုပါ ပေါက်ကွဲမှုကြောင့် မြို့ဦး ပရိယတ္တိစာသင်တိုက် သုံးထပ်ကျောင်းဆောင်အောက်ထပ်၊ ခြံစည်းရိုးဘေးကပ်လျက်အခန်းတွင် သီတင်းသုံးနေသည့် ရပ်ကွက်သံဃာနာယကဥက္ကဋ္ဌ ဆရာတော် ဦးဉာဏဝံသ သက်တော် (၅၇)နှစ်၊ ဝါတော်(၃၇)နှစ် ပျံလွန်တော်မူခဲ့ကြောင်း သိရသည်။
အဆိုပါဖောက်ခွဲမှုကို ကျူးလွန်ခဲ့သူများအား ဖမ်းဆီးရမိရေး စုံစမ်းစစ်ဆေးရှာဖွေမှုများ လုပ်ဆောင်လျက်ရှိကြောင်း နစက သတင်းထုတ်ပြန်ရေးအဖွဲ့က ပြောကြားထားသည်။
