ဆော်ဒီကလပ် အယ်လ်ဟီလာအသင်းသည် ပြိုင်ဘက် အယ်လ်နာဆာအသင်းမှ နာမည်ကျော်တိုက်စစ်မှူး စီရော်နယ်လ်ဒိုကို ခေါ်ယူရန် ဆန္ဒရှိနေကြောင်း သိရသည်။
အယ်လ်ဟီလာအသင်းသည် ဒဏ်ရာပြဿနာနှင့် ရင်ဆိုင်နေရသည့် နေမာကို စာချုပ်ဖျက်သိမ်းရန် စီစဉ်နေရာ ၎င်း၏နေရာတွင် စီရော်နယ်လ်ဒိုကို ပြန်လည်အစားထိုးရန် ဆန္ဒရှိလာခြင်းဖြစ်ကြောင်း သိရသည်။
စီရော်နယ်လ်ဒိုသည် လာမည့်ရာသီကုန်၌ အယ်လ်နာဆာနှင့် စာချုပ်သက်တမ်းကုန်ဆုံးမည်ဖြစ်၍ အယ်လ်ဟီလာအသင်းက ခေါ်ယူရန် ပစ်မှတ်ထားလာခြင်းဖြစ်ကြောင်းလည်း သိရသည်။
အသက် (၃၉)နှစ်ကျော်ပြီဖြစ်သည့် စီရော်နယ်လ်ဒိုသည် အယ်လ်နာဆာအသင်းတွင် ခြေစွမ်းပြနေသူဖြစ်ပြီး (၂) ရာသီကျော်ကာလအတွင်း ပြိုင်ပွဲစုံ (၈၄) ပွဲတွင် (၇၄) ဂိုးအထိ သွင်းယူထားသည်။
စီရော်နယ်လ်ဒိုသည် ပရော်ဖက်ရှင်နယ်ကစားသမားဘဝတစ်လျှောက် ကလပ်အသင်းများနှင့် နိုင်ငံအသင်းအတွက် (၉၀၈) ဂိုးအထိ သွင်းယူထားပြီး ဘောလုံးသမိုင်းတွင် ဂိုးသွင်းအများဆုံးအဖြစ် ရပ်တည်နေသည်။
စီရော်နယ်လ်ဒိုသည် အသက် (၃၉) နှစ်ကျော်ပြီဖြစ်သော်လည်း ပရိုကစားသမားဘဝ သွင်းဂိုး (၁၀၀၀) ပြည့်မြောက်ရန် ရည်မှန်းနေသည့်အတွက် ကစားသမားဘဝမှ အနားယူဖွယ်မရှိသေးကြောင်း သိရသည်။
