ဘိုင်ယန်မြူးနစ်အသင်း၏နည်းပြ ကွန်ပနီက ယခုရာသီ ချန်ပီယံလိဂ်ဗိုလ်လုပွဲကို ဘိုင်ယန်မြူးနစ်အသင်း၏ အိမ်ကွင်းတွင် ကျင်းပမည်ဖြစ်သည့်အတွက် ထူးခြားသည့်ခံစားမှု ရှိနေသည်ဟု ပြောကြားခဲ့သည်။
အသွင်သစ်ဖြင့် ပြောင်းလဲကျင်းပမည့် ၂၀၂၄-၂၅ ရာသီ ချန်ပီယံလိဂ်ပြိုင်ပွဲ၏ နောက်ဆုံးဗိုလ်လုပွဲကို ဘိုင်ယန်မြူးနစ်အသင်း၏ အိမ်ကွင်းဖြစ်သော Allianz Arena ကွင်းတွင် ၂၀၂၅ ခုနှစ် မေလ(၃၁)ရက်၌ ကျင်းပပြုလုပ်သွားမည်ဖြစ် သည်။
လက်ရှိအချိန်တွင် ချန်ပီယံလိဂ်ပြိုင်ပွဲမှာ လိဂ်အဆင့် ပွဲစဉ်(၁)ကို စတင်ယှဉ်ပြိုင်ကစားရမည်ဖြစ်ပြီး ဘိုင်ယန်မြူးနစ်အသင်းသည် ခရိုအေးရှားကလပ် ဒိုင်နမိုဇာဂရက်အသင်းနှင့် ရင်ဆိုင်ရမည်ဖြစ်သည်။
ဘိုင်ယန်မြူးနစ်အသင်းသည် ချန်ပီယံလိဂ်ပြိုင်ပွဲ၌ ဆုဖလား(၆)ကြိမ်ရရှိထားသည့် တတိယအအောင်မြင်ဆုံးအသင်းဖြစ်သော်လည်း ယခုရာသီအတွက် ဗိုလ်စွဲရန်ရေပန်းစားမှုတွင်မူ အဆင့်(၈)နေရာတွင်သာ ရပ်တည်နေသည်။
ဘိုင်ယန်မြူးနစ်အသင်းသည် ယခုရာသီ ချန်ပီယံလိဂ်ပြိုင်ပွဲ၌ ဒိုင်နမိုဇာဂရက်၊ အက်စတွန်ဗီလာ၊ ဘာစီလိုနာ၊ ဘင်ဖီကာ၊ PSG၊ ရှက်တာဒိုးနက်၊ ဖီယင်နု၊ ဆလိုဗန် စသည့်အသင်းများနှင့် ယှဉ်ပြိုင်ရမည်ဖြစ်သောကြောင့် ပွဲကျပ်သည့်အနေအထားမဟုတ်သော်လည်း နည်းပြသစ် ကွန်ပနီနှင့် စတင်လက်တွဲသည့် ရာသီဖြစ်သောကြောင့် ဥရောပအဆင့်တွင် အောင်မြင်မှုရရှိရန် မလွယ်ကူဟု သုံးသပ်ခြင်းခံထားရကြောင်း သိရသည်။
သို့သော် ဘိုင်ယန်မြူးနစ်အသင်းသည် ဘွန်ဒစ်လီဂါပြိုင်ပွဲ၌ ရာနှုန်းပြည့်နိုင်ပွဲဆက်နေသည့်အတွက် ကွန်ပနီ၏ ဦးဆောင်မှုကို ချီးကျူးမှုများလည်း ရှိနေသည်။
ယင်းအခြေ အနေတွင် ကွန်ပနီအား UEFA က တွေ့ ဆုံမေးမြန်းမှုပြုလုပ်ခဲ့ရာ ချန်ပီယံလိဂ်ပြိုင်ပွဲနှင့်ပတ်သက်၍ ၎င်းက ''ရည်မှန်းချက်တွေကတော့ ရိုးရှင်းပါတယ်။ ကျွန်တော်တို့က ပြိုင်ပွဲတိုင်းမှာ ဆုဖလားရယူနိုင်ဖို့ ကြိုးစားသွားမှာပါ။ ချန်ပီယံလိဂ်ဆိုတာ အခက်ခဲဆုံးပြိုင်ပွဲတစ်ခုဖြစ်ပေမဲ့ ကျွန်တော်တို့က လတ်တလော ရယူထားနိုင်တဲ့ အသင်းတစ်သင်းဖြစ်ပါတယ်။ ချန်ပီယံဆုကို မျှော်လင့်နိုင်တဲ့ အသင်းအနည်းစုထဲမှာ ကျွန်တော်တို့လည်း ပါဝင်ပါတယ်။ ဗိုလ်လုပွဲက ထူးခြားတဲ့ကွင်းမှာ ကျင်းပမှာဖြစ်ပြီး အဲဒီအတွက် ထူးခြားတဲ့ ခံစားမှုရှိနေပါတယ်''ဟု ပြောကြားခဲ့သည်။
ကွန်ပနီက ချန်ပီယံလိဂ်တွင် ပြိုင်ဘက်တိုင်းကို အလေးထားယှဉ်ပြိုင်သွားမည်ဟုလည်း ပြောကြားခဲ့သည်။
