ရေကြီးမှုကြောင့် နေပြည်တော်ကောင်စီနယ်မြေတွင် မိုးသီးနှံဧက ၄၇၀၀၀ ကျော် ရေနစ်မြုပ်ခဲ့ကာ လက်ရှိအထိ ဧက ၃၉၀၀ ကျော် သီးနှံပျက်စီးခဲ့ကြောင်း ပန်ကြားရေးဝန်ကြီးဌာန၏ သတင်းထုတ်ပြန်မှုအရ သိရသည်။
ရေကြီးမှုကြောင့် နေပြည်တော်ကောင်စီနယ်မြေ စုစုပေါင်းမိုးသီးနှံ ဧက ၃၄၅၀၀၀ စိုက်ပျိုးခဲ့ပြီး ဧက ၄၇၀၀၀ ကျော် ရေကြီးနစ်မြုပ်ခဲ့ကာ လက်ရှိအချိန်ထိ ဧက ၂၈၀၀၀ ပြန်ပေါ်ခဲ့ပြီး ထိခိုက်မှုဧက ၁၇၀၀၀ ကျော်တွင် ဧက ၃၉၀၀ ကျော် သီးနှံပျက်စီးခဲ့ကြောင်း၊ ပျက်စီးခဲ့သည့် စိုက်ပျိုးမြေများတွင် ရာသီအချိန်မီ ပြန်လည်စိုက်ပျိုးနိုင်ရေးနှင့် ထိခိုက်ခဲ့သည့် သီးနှံစိုက်ခင်းများကို အထွက်နှုန်းနှင့် သီးနှံအရည်အသွေးထိခိုက်မှုသက်သာစေရေး၊ ရေကြီးရေလွှမ်းပြီးနောက် သီးနှံစိုက်ခင်းများတွင် ကျရောက်တတ်သည့် သီးနှံပိုးမွှားရောဂါများ ကာကွယ်နှိမ်နင်းရေးအတွက် နည်းပညာနှင့် အကူအညီများ ပံ့ပိုးပေးနိုင်ရန် စီမံဆောင်ရွက်လျက်ရှိကြောင်း သိရသည်။
စက်တင်ဘာ ၁၅ ရက်က စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် ဒုတိယဝန်ကြီး ဦးဗိုလ်ဗိုလ်ကျော်၊ တာဝန်ရှိသူများနှင့်အတူ ရေကြီးရေလျှံမှုကြောင့် မိုးသီးနှံများ ထိခိုက်ပျက်စီးခဲ့သည့် ပုဗ္ဗသီရိမြို့နယ်နှင့် ဇေယျာသီရိမြို့နယ်တို့မှ တောင်သူများနှင့်တွေ့ဆုံခဲ့ကြောင်း သိရသည်။
ထိုသို့တွေ့ဆုံစဉ် ပြည်ထောင်စုဝန်ကြီးက မတ်ပဲသီးနှံစိုက်ပျိုးမည့် တောင်သူများအနေဖြင့် ဆီထွက်နေကြာသီးနှံကို လျာထားဧကအတိုင်း တွဲဖက်စိုက်ပျိုးရန် လိုအပ်ပြီး နေကြာသီးနှံ အစေ့အဆန်အောင်မြင်စေရန် ဝတ်မှုန်ကူးပျား မွေးမြူခြင်းအတွက် မွေးမြူရေးနှင့်ကုသရေးဦးစီးဌာနက စီမံဆောင်ရွက်ပေးသွားမည်ဖြစ်ကြောင်း၊ မတ်ပဲနှင့် နေကြာသီးနှံ တွဲဖက်စိုက်ပျိုးရာတွင် အဓိကကြုံတွေ့ရသည့် မတ်ပဲစိုက်ခင်းကို ပိုးသတ်ဆေးသုံးစွဲခြင်းနှင့် နေကြာပန်းပွင့်ချိန် ဝတ်မှုန် ကူးကာလတွင် ပိုးသတ်ဆေးအသုံးမပြုရန်ကိစ္စအပါအဝင် စိုက်ပျိုးရေးနည်းပညာရပ်များကို စိုက်ပျိုးရေးဦးစီးဌာန ပညာရှင်များက ကွင်းဆင်းဆွေးနွေးကူညီပေးသွားမည်ဖြစ်၍ သီးနှံများ ပန်းတိုင်အထွက်နှုန်းရရှိရေး ကြိုးပမ်းပေးကြရန် ပြောကြားသည်။
ထို့နောက် ဒုတိယဝန်ကြီးက ရေကြီးရေလျှံမှုများ ဖြစ်ပေါ်ရသည့်အခြေအနေနှင့် နွေသီးနှံအတွက် နွေစပါးတိုးချဲ့စိုက်ပျိုးရန် လျာထားဆောင်ရွက်နေမှုကိုလည်းကောင်း၊ ညွှန်ကြားရေးမှူးချုပ် ဒေါက်တာရဲတင့်ထွန်းနှင့် ဒေါက်တာရဲထွန်းဝင်းတို့က ရာသီချိန်မီ စိုက်ပျိုးနိုင်ရေးနှင့် သီးနှံများဖြစ်ထွန်းအောင်မြင်ရေး ပျားမွေးမြူရေးကိစ္စရပ်များအပါအဝင် ကူညီဆောင်ရွက်ပေးသွားမည့်လုပ်ငန်းစဉ်များကိုလည်းကောင်း ရှင်းလင်းဆွေးနွေးကြကြောင်း သိရသည်။
ထို့နောက် ပြည်ထောင်စုဝန်ကြီးသည် နေပြည်တော်ကောင်စီဥက္ကဋ္ဌနှင့်အတူ ဇေယျာသီရိမြို့နယ်ရှိ ပေါင်းလောင်းရေလှောင်တမံအတွင်း ရေဝင်ရောက်မှု၊ တမံကြံ့ခိုင်မှုနှင့် ရေပိုလွှဲမှ ရေကျော်မှုအခြေအနေကို ကြည့်ရှုစစ်ဆေးပြီး ပြည်ထောင်စုဝန်ကြီးက တမံဘေးကင်းလုံခြုံရေး ဂရုပြုဆောင်ရွက်ရန်နှင့် ဆည်တမံများနှင့်ပတ်သက်သည့် ကောလဟာလများကြောင့် ပြည်သူများစိုးရိမ် ထိတ်လန့်မှုမဖြစ်ပေါ်စေရေးအတွက် လိုအပ်သော အသိပေးထုတ်ပြန်ချက်များ၊ အသိပညာ ပေးဆွေးနွေးခြင်းများ ဆောင်ရွက်ပေးရန် မှာကြားခဲ့သည်။
ဆက်လက်၍ ပြည်ထောင်စုဝန်ကြီးသည် ပေါင်းလောင်းရေလွှဲဆည် (အဝေရာဆည်) သို့ သွားရောက်ပြီး ရေဖြတ်သန်းစီးဆင်းမှုအခြေအနေကိုလည်းကောင်း၊ ဥတ္တရသီရိမြို့နယ်ရှိ ငလိုက်ရေလှောင်တမံအတွင်း ရေဝင်ရောက်မှု၊ တမံကြံ့ခိုင်မှုနှင့် ဘဲနှုတ်သီးသဏ္ဌာန် ရေပိုလွှဲမှ ရေကျော်မှုအခြေအနေများကိုလည်းကောင်း ကြည့်ရှုစစ်ဆေးကာ လုပ်ငန်းဆိုင်ရာ လိုအပ်ချက်များ မှာကြားခဲ့သည်။
