မကြာမီက အမေရိကန်ပြည်ထောင်စု နက်ရှ်ဗီးလ်မြို့တွင် ပြုလုပ်ခဲ့သည့် တေလာဆွစ်၏ရှိုးပွဲကို နာရီများစွာ နောက်ကျကျင်းပခဲ့သဖြင့် ပရိသတ်များထဲ မူးဝေအော့အန်သူများ ရှိခဲ့သည်။

မေ ၇ ရက်က နက်ရှ်ဗီးလ်မြိို့ရှိ နစ်ဆန်းအားကစားရုံတွင် တေလာဆွစ်၏ Eras Tour နယ်လှည့်ဖျော်ဖြေပွဲပြုလုပ်မည့်အချိန် မိုးလေထန်ခဲ့မှုကြောင့် ပွဲချိန်ကို လေးနာရီနီးပါး နောက်ဆုတ်ကျင်းပလိုက်ရပြီး  ပရိသတ်အုပ်ကလည်း မိုးလွတ်ရာ ရှောင်နေလိုက်ရသည်။

ရှိုးပွဲသွားကြည့်ခဲ့သူတစ်ဦးက ယင်းနေ့ ညနေ ၅ နာရီ မိနစ် ၄၀ ဝန်းကျင်တွင် ၎င်းတို့ မိုးခိုလိုက်ရပြီး ည ၉ နာရီခွဲတိုင်သည်အထိ နေခဲ့ရသည်ဟု Page Six မီဒီယာသို့ ပြောသည်။

ကံကောင်းသည့် ပရိသတ်အနည်းစုကမိုးကာများ ဝတ်ထားသော်လည်း အများစုက နာရီနှင့်ချီ အဆင်မပြေစွာဖြင့် နီးနီးကပ်ကပ်ရပ်နေခဲ့ကြရသဖြင့် မူးသူက မူး၊ အန်သူက အန် ဖြစ်ခဲ့ကြသည်။

ထိုနေ့ကရှိုးပွဲကို တေလာဆွစ်က နောက်နေ့နံနက် ၂ နာရီအထိ ဖျော်ဖြေခဲ့သည်။

နက်ရှ်ဗီးလ်ဖျော်ဖြေပွဲတွင် တေလာဆွစ်အတွက် အရေးကြီးပုဂ္ဂိုလ်တစ်ဦးလည်း လာရောက်အားပေးခဲ့သည်။ ၎င်းက လက်ရှိဆွစ်နှင့် သတင်းထွက်နေသည့် ဗြိတိန်ပေါ့ပ်၊ ရော့ခ်ဂီအဖွဲ့ The 1975 မှ ခေါင်းဆောင် မက်တီဟီလီ ဖြစ်သည်။ ၎င်းတို့နှစ်ဦး တွဲခုတ်နေသည်မှာ နှစ်လပင်မရှိသေးသော်လည်း သတင်းရင်းမြစ်အချို့က ၎င်းတို့အ တော်လေးနီးစပ်နေကြပြီဟု The Sun သို့ ပြောသည်။

သတင်းပေးတစ်ဦးအဆိုအရ  ၎င်းတို့နှစ်ဦး လွန်ခဲ့သည့် ၁၀ နှစ်ခန့်ကတည်းက ဒိတ်ဖူးခဲ့ပြီး သူငယ်ချင်းဆက်ဆံရေးကို ဆက်ထိန်းထားခဲ့သည်။ ရှိုးပွဲမတိုင်မီကတည်းက ဆွစ်က အချစ်သစ်ကို ယင်းပွဲတွင် ချပြလိမ့်မည်ဆိုသည့် သတင်းများ ထွက်နေခဲ့သည်။

ဆွစ်သည် ဗြိတိန်သရုပ်ဆောင် ဂျိုးအယ်လ်ဝင်နှင့် နောက်ဆုံးတွဲခဲ့ပြီး မက်တီနှင့် သတင်းမထွက်မီ ဖော်မြူလာဝမ်းပြိုင်ကား မောင်းသူ ဖာနန်ဒိုအလန်ဆိုနှင့် အသံထွက် လိုက်သေးသည်။

ရှေ့တွင်ဆွစ်က ဂျိုးဂျိုးနက်စ်၊ ဂျွန်မေယာ၊ ဟယ်ရီစတိုင်၊ ကယ်လ်ဗင်ဟားရစ်၊ တွမ်ဟစ်ဒယ်စတင်တို့နှင့်လည်း ဇာတ်လမ်း များ ရှိခဲ့သည်။