မြန်မာနိုင်ငံသားများဘဏ်က ဘဏ်ခွဲ ငါးဘဏ်အား ပိတ်သိမ်းပြီးဖြစ်ကြောင်း ဘဏ်ခွဲအသစ်သုံးဘဏ်ကို ဖွင့်လှစ်ခဲ့ကြောင်း ဒီဇင်ဘာ ၂၉ ရက်တွင်သတင်းထုတ်ပြန်ကြေညာသည်။
မြန်မာနိုင်ငံတော်ဗဟိုဘဏ်၏ ခွင့်ပြုချက်ဖြင့် ပိတ်သိမ်းခြင်း၊ အသစ်ဖွင့်လှစ်ခြင်းတို့ကို ပြုလုပ်ခဲ့ခြင်းဖြစ်ပြီး ရင်းနှီးမြှုပ်နှံသူများနှင့် အစုရှယ်ယာရှင်တို့အား အသိပေးအပ် ကြောင်း ယင်းဘဏ်၏ ထုတ်ပြန်ချက်တွင် ဖော်ပြထားသည်။
မြန်မာနိုင်ငံတော်ဗဟိုဘဏ်၏ ခွင့်ပြုချက်အရ ပိတ်သိမ်းခဲ့သည့် ဘဏ်ငါးဘဏ်မှာ စစ်ကိုင်းတိုင်းဒေသကြီး ၊ မုံရွာမြို့ရှိ မုံရွာ ဘဏ်ခွဲငယ်၊ ရှမ်းပြည်နယ်(မြောက်ပိုင်း) ၊ မူ ဆယ် ၁၀၅ မိုင် ၊ ကုန်သွယ်ရေးဇုံမှ မူဆယ် ဘဏ်ခွဲ(၁) ၊ မန္တလေးမြို့၊ မဟာအောင်မြေ မြို့နယ်မှ မန္တလေးဘဏ်ခွဲ(၄) ၊ စစ်ကိုင်းတိုင်း ဒေသကြီး ၊ တန့်ဆည်မြို့နယ်မှ တန်ဆည် ဘဏ်ခွဲ၊ စစ်ကိုင်းတိုင်းဒေသကြီး ၊ ကန့်ဘလူ ခရိုင်၊ ကန့်ဘလူမြို့နယ် ၊ ဇီးကုန်းမြို့မှဇီးကုန်း ဘဏ်ခွဲတို့ဖြစ်ကြောင်း သိရသည်။
မြန်မာနိုင်ငံသားများဘဏ်က မုံရွာ ဘဏ်ခွဲငယ်နှင့်မူဆယ်ဘဏ် ခွဲ(၁) တို့ကို ၂၀၂၀ ပြည့်နှစ် အောက်တိုဘာ ၉ ရက်တွင် ပိတ်သိမ်းခဲ့ကြောင်း သိရသည်။
ထို့နည်းတူ မန္တလေးဘဏ်ခွဲ(၄) အား ယခုနှစ် မတ် ၂၅ ရက်တွင်လည်းကောင်း၊ တန့်ဆည်ဘဏ်ခွဲ၊ ဇီးကုန်းဘဏ်ခွဲတို့အား ယခုနှစ် ဒီဇင်ဘာ ၇ ရက်တွင်လည်းကောင်း ပိတ်သိမ်းခဲ့ကြောင်း သိရသည်။
အသစ်ဖွင့်လှစ်ခဲ့သည့် ဘဏ်ခွဲများမှာ မန္တလေးတိုင်းဒေသကြီး ၊ ပြင်ဦးလွင်မြို့မှ ပြင်ဦးလွင်ဘဏ်ခွဲ ၊ ရန်ကုန်တိုင်းဒေသကြီး ၊ သင်္ဃန်းကျွန်းမြို့နယ်မှ ကမာကြည်ဘဏ်ခွဲ ၊ ဧရာဝတီတိုင်းဒေသကြီး ၊ ဟင်္သာတမြို့နယ်မှ ဟင်္သာတဘဏ်ခွဲတို့ဖြစ်ကြောင်း သိရသည်။
ပြင်ဦးလွင်ဘဏ်ခွဲကို ၂၀၂၂ ခုနှစ် သြဂုတ် ၁၉ ရက်တွင်လည်းကောင်း၊ ရန်ကုန်တိုင်းဒေသကြီးအတွင်းရှိ ကမာကြည်ဘဏ်ခွဲကို နိုဝင်ဘာ ၁ ရက်တွင်လည်းကောင်း၊ ဧ ရာဝတီတိုင်းဒေသကြီး၊ ဟင်္သာတဘဏ်ခွဲကို ဒီဇင်ဘာ ၂၆ ရက်တွင်လည်းကောင်း ဖွင့်လှစ်ခဲ့ခြင်းဖြစ်ကြောင်း မြန်မာနိုင်ငံသားများဘဏ် (MCB) က ထုတ်ပြန်ထားသည်။
