ကမ္ဘာ့ဘောလုံးအဖွဲ့ချုပ် (FIFA) ၏ ကျင့်ဝတ်ကော်မတီက ဆွစ်ဇာလန်တရားရုံးတော်၏ စွပ်စွဲမှုများနှင့် ပတ်သက်ပြီး ပဏာမစုံစမ်းစစ်ဆေးမှုများပြုလုပ်ခဲ့ရာ ဖီဖာဥက္ကဋ္ဌ အင်ဖန်တီနိုအနေဖြင့် မည်သည့် အမှားအယွင်းကိုမျှ ပြုလုပ်ထားခြင်းမရှိကြောင်း ထုတ်ပြန်ကြေညာခဲ့သည်။
ဖီဖာဥက္ကဋ္ဌဖြစ်သူ အင်ဖန်တီနိုသည် ရာထူးမှ ဖြုတ်ချခံခဲ့ရပြီး ပြစ်မှုဆိုင်ရာ စုံစမ်းစစ်ဆေးမှုနှင့် ရင်ဆိုင်နေရသည့် ဆွစ်ဇာလန်ရှေ့နေချုပ် မိုက်ကယ်လော်ဘာနှင့် လျှို့ဝှက်တွေ့ဆုံမှုများ ပြုလုပ်ခဲ့ခြင်းကြောင့် ဆွစ်ဇာလန်တရားရုံးချုပ်က စုံစမ်းစစ်ဆေးမှုများ ပြုလုပ်ရန် စီစဉ်နေခြင်းဖြစ်ပြီး အင်ဖန်တီနိုနှင့် လော်ဘာတို့ နှစ်ဦးစလုံးကမူ ယင်းတွေ့ဆုံမှုများတွင် မည်သည့်စည်းမျဉ်းချိုးဖောက်မှုမျှ မရှိခဲ့ကြောင်း ထုတ်ပြန်ထားသည်။
ယခုအခါ ဖီဖာကျင့်ဝတ်ကော်မတီကလည်း ဆွစ်ဇာလန်တရားရုံးချုပ်က ပေးပို့လာသည့် စာရွက်စာတမ်းများအပေါ် မူတည်ကာ စုံစမ်းစစ်ဆေးမှုပြုလုပ်ခဲ့ခြင်းဖြစ်ပြီး "ဖီဖာရဲ့ စည်းမျဉ်းတွေကို ချိုးဖောက်တဲ့ ဘယ်လုပ်ရပ်ကိုမှ မတွေ့ရှိခဲ့ရပါဘူး။ တချို့ကိစ္စတွေက ဖီဖာရဲ့ကျင့်ဝတ်ကို ဖောက်ဖျက်တဲ့ ကိစ္စမျိုးနဲ့ စစ်ဆေးလို့တောင်မရတာတွေပါ။ အင်ဖန်တီနိုကို ရာထူးကနေ ဆိုင်းငံ့ဖို့ အပါအဝင် တခြားဘယ်လို အရေးယူမှုကိုမှ ပြုလုပ်လို့မရပါဘူး"ဟု ထုတ်ပြန်ကြေညာခဲ့သည်။
အင်ဖန်တီနိုကမူ ဆွစ်ဇာလန် တရားရုံးချုပ်၏ စုံစမ်းစစ်ဆေးခံရ ခြင်းနှင့်ပတ်သက်ပြီး ဖီဖာကဲ့သို့ အဖွဲ့အစည်းကြီးတစ်ခု၏ ဂုဏ်သိက္ခာကို ကျဆင်းစေသလို ဖီဖာ၏ ဥက္ကဋ္ဌတစ်ဦးအနေဖြင့် မိမိအတွက်လည်း ထိခိုက်နစ်နာမှုများရှိသည်ဟု ပြောကြားခဲ့သည်။
