လိဒ်စ်အသင်းနည်းပြ ဘီယဲလ်ဆာသည် သူ၏အသင်းမှ ကစားသမားများအား အနားမပေးဘဲ လေ့ကျင့်ခန်း ပုံမှန်ဆင်းစေလျက်ရှိရာ လိဒ်စ်ကစားသမားအချို့မှာ သူ၏ဆုံးဖြတ်ချက်အတွက် စိတ်ပျက်နေကြကြောင်း သိရှိ ရသည်။
လက်ရှိတွင် အင်္ဂလန်နိုင်ငံ၌ ကိုရိုနာဗိုင်းရပ်စ်ရောဂါပိုး ပြန့်ပွားမှုပြဿနာကြောင့် ဘောလုံးပွဲများကို ရပ်ဆိုင်းထားသလို၊ ကလပ်အသင်းအတော်များများမှာလည်း ကစားသမား များအား ရက်အပိုင်းအခြားဖြင့်အနားပေးလျက်ရှိသည်။
အင်္ဂလန်လိဂ်ပြိုင် ပွဲ (၄)ခုစလုံးကို ဧပြီ (၃)ရက်နေ့မတိုင်မီအ ထိ ရပ်နားထားပြီး ကစားသမားအများစုမှာ အနားရလျက်ရှိနေသည်။ သို့သော် ဘီယဲလ်ဆာသည် သူ၏လိဒ်စ်အသင်းမှ ကစားသမားများအား အရင်ပုံစံတိုင်းပင် လေ့ကျင့်ခန်းဆင်း စေလျက်ရှိရာ အသင်းအတွင်း နည်းပြ ဖြစ်သူ၏လုပ်ရပ်အပေါ် အချင်းချင်း မေးခွန်းထုတ်လျက်ရှိနေကြကြောင်း သိရသည်။
လိဒ်စ်ယူနိုက်တက်သည် လက်ရှိလိဂ်ချန်ပီယံရှစ်ပွဲစဉ် (၃၇)အပြီးတွင် ရမှတ် (၇၁)မှတ်ဖြင့် အမှတ်ပေးဇယားထိပ်ဆုံး၌ ဦးဆောင်နေပြီး ဘီယဲလ်ဆာမှာ လိဒ်စ်အသင်းကို ပရီးမီးယားလိဂ်သို့ ပြန်လည်တန်း တက်အောင် ပြုလုပ်ပေးရန် ဆန္ဒပြင်းပြနေကြောင်း သိရှိရသည်။
လိဒ်စ်ယူနိုက်တက်အသင်း သည် ၂၀၀၃-၀၄ ရာသီနောက်ပိုင်း ပရီးမီးယားလိဂ်နှင့် (၁၆)နှစ်ကြာတိုင် ဝေးကွာနေသည့် အသင်းတစ်သင်းဖြစ်သည်။
