လက်ရှိအချိန်မှာ ဆောက်လုပ်ရေး လုပ်ငန်းများအနေနဲ့ အရောင်းအဝယ်ကျဆင်းမှု၊ လုပ်ငန်းများ ဆက်လက်လုပ်ဆောင်ရန် ငွေကြေးလည်ပတ်စီးဆင်းမှုဆိုင်ရာတွေမှာ အခက်အခဲများနဲ့ ရင်ဆိုင်နေရပါတယ်။ တစ်ဖက်မှာလည်း နိုင်ငံတော်အပိုင်းက ပြည်သူလူထု အလွှာပေါင်းစုံအသီးသီး လူနေမှုဘ၀ တိုးတက်မြင့်မားစေဖို့အတွက် တန်ဖိုးသင့်၊ တန်ဖိုးနည်းအိမ်ရာ စီမံကိန်းများကို ဖော်ဆောင်လျက်ရှိရာ ယင်းစီမံကိန်းများမှာ ပုဂ္ဂလိကဆောက်လုပ်ရေး လုပ်ငန်းရှင်များအနေဖြင့် ဝင်ရောက်လုပ်ကိုင်လာခြင်းက နည်းပါးနေပါတယ်။ ဒါကြောင့် ပြည်တွင်းဆောက်လုပ်ရေးလုပ်ငန်းများ လက်ရှိကြုံတွေ့နေရတဲ့ အခက်အခဲများနဲ့ အနာဂတ်တွင် မည်ကဲ့သို့ အလားအလာကောင်းများ ရှိနေသလဲဆိုတာကို မြန်မာနိုင်ငံ ဆောက်လုပ်ရေးလုပ်ငန်းရှင်များအသင်း၏ အလုပ်အမှုဆောင်နှင့် Young Developer Association (YDA) ၏ ဥက္ကဋ္ဌဖြစ်သူ ဦးမျိုးမြင့်နှင့် တွေ့ဆုံမေးမြန်းထားသည်များကို ဖော်ပြလိုက်ပါတယ်။

နိုင်ငံတော်က စိုက်ထုတ်ပေးတဲ့ဟာတောင် သိန်း ၃၀ ပဲ အရင်သွင်းပါဆိုတာတောင် ပြည်သူအများစုက မဝယ်နိုင်သေးဘူး။ ပြည်သူတွေ ပြန်ပြီးငွေသွင်းမယ့်စနစ်ကို ဘယ်သူက အာမခံပေးမှာလဲ။ အဲဒီတစ်ခုကလည်း ကျွန်တော်တို့အတွက် စိုးရိမ်စရာ ဖြစ်တယ်ပေါ့နော် . . .

■ မေး - လက်ရှိမှာ ရန်ကုန်မြို့က ဆောက်လုပ်ရေး လုပ်ငန်းတွေ အကျပ်အတည်း အခက်အခဲများ ရှိနေတယ်လို့ သိရပါတယ်။ ဒီအကြောင်းနဲ့ ပတ်သက်ပြီးရှင်းပြပေးပါ။

■ ဖြေ ။ ကျွန်တော်တို့ရဲ့ လက်ရှိ ရန်ကုန်မြို့ရဲ့ ဆောက်လုပ်ရေးအတွက် အကျပ်အတည်းကတော့ ပထမဆုံး အရောင်းအဝယ် ကျဆင်းလာတဲ့ အခက်အခဲပေါ့နော်။ ဒါပေမဲ့ ကျွန်တော်ခုနက ပြောသလိုလာမယ့် ၂၀၁၈ မှာတော့ ကျွန်တော်တို့ အများကြီး မျှော်လင့်ထားပါတယ်။ လက်ရှိအခြေအနေက အရောင်းအဝယ် ကျဆင်းတယ်။ ကျဆင်းပြီး ခက်ခဲတဲ့အတွက် ဘာဖြစ်လဲဆိုတော့ ငွေကြေးလည်ပတ်မှု ခက်ခဲတယ်။ နောက်ပြီးတော့လဲ အတိုးနှုန်းတွေ မြင့်မားတဲ့အတွက်လည်း ဒီအတိုးတွေကိုလဲ ထမ်းဆောင်နေရတယ်။ နောက်တစ်ခါကျတော့ ကျွန်တော်တို့ ဝန်ထမ်းတွေကို ထိန်းသိမ်းရတဲ့ အခက်အခဲပေါ့။ နောက်တစ်ခါ ကျန်ရှိနေတဲ့ နဂိုစာချုပ်ချုပ် ဆိုပြီးတော့ တည်ဆောက်မယ့် အဆောက်အအုံတွေတောင်မှ ခွင့်ပြုမိန့် တောင်းခံတဲ့အခါမှာ၊ စည်ပင်သာယာမှာ ခွင့်ပြုမိန့်တောင်းခံတာ အင်မတန် အခက်အခဲ ဖြစ်ပါတယ်။ နောက်တစ်ခု အခက်အခဲကတော့ လျှပ်စစ်နဲ့ပတ်သက်တဲ့ အခက်အခဲတွေ ဖြစ်ပါတယ်။ နောက်တစ်ခါ အခွန်အခနဲ့ ပတ်သက်တဲ့ အခက်အခဲတွေ ဖြစ်ပါတယ်။ လက်ရှိမှာ ကျွန်တော်တို့က တကယ့်ကို ဘက်ပေါင်းစုံရဲ့ ထိုးနှက်ခြင်းခံနေရတဲ့ အနေအထားမျိုးမှာ ကျွန်တော်တို့က ရုန်းကန်လှုပ်ရှားနေရတာပါ။ ဒါကြောင့်မို့ ကျွန်တော်တို့ လက်ရှိရုန်းကန် လှုပ်ရှားရင်းနဲ့ ကျန်ခဲ့တဲ့ ကုမ္ပဏီတွေကတော့ တကယ့်လူစွမ်းကောင်း တွေပဲလို့ပြောရမှာ ဖြစ်ပါတယ်။

■ မေး - ဆောက်လုပ်ရေးလုပ်ငန်းတွေက ဒီအတိုင်းဆက်သွားမယ်ဆိုရင် လုပ်ငန်းကဏ္ဍ တစ်ခုလုံး ပြိုလဲသွားနိုင်တယ်လို့ သုံးသပ်မှုတွေရှိတယ်။ အဲဒီအခြေအနေကို သုံးသပ်ပေးပါ။

■ ဖြေ ။ ကျွန်တော်တို့ အိမ်ခြံမြေက အခွန်တွေ ဒီအတိုင်းနှုန်းထားတွေ တက်နေမယ်။ ဒီထဲမှာမှ တချို့လုပ်ငန်းတွေဆိုရင် ရင်းနှီးမြှုပ်နှံတဲ့ ပမာဏက အရမ်းကြီးတယ်။ အဲဒီတော့ ဘယ်နိုင်ငံပဲဖြစ်ဖြစ် ယေဘုယျပြောမယ်ဆိုရင် အမေရိကန်နိုင်ငံဆို ကမ္ဘာမှာ အချမ်းသာဆုံးဖြစ်ပြီးတော့ သူသည်ကမ္ဘာမှာ ကြွေးမြီအထူထပ်ဆုံးနိုင်ငံပဲ။ ဒီလိုပဲ Contruction Industry မှာလဲ ဒီလိုပဲ  Developer တွေကလဲ ကြီးလာတာနဲ့အမျှ သူတို့ရဲ့ ရင်းနှီးမြှုပ်နှံတဲ့ ပမာဏများလာတယ်။ ရင်းနှီးမြှုပ်နှံမှု ပမာဏများတာ သူတို့ငွေနဲ့ချည်းပဲ ရင်းနှီးမမြှုပ်နှံနိုင်ဘူး။ အဲဒီအချိန်မှာ ဘဏ်ကို အားကိုးအားထားလုပ်ရတယ်။ အဲဒီချိန်မှာ သူတို့ပြန်လည် လည်ပတ်တဲ့ငွေသည် ရင်းနှီးမြှုပ်နှံတယ်။ တည်ဆောက်တယ်။ ပြီးရင် ပြန်ရောင်းချတယ်။ ရောင်းတဲ့ငွေနဲ့ ပြန်ထည့်တယ်။ အဲဒီချိန်မှာ ရောင်းတဲ့ငွေက မရောင်းရဘူး။ အကယ်၍ ရင်းနှီးမြှုပ်နှံထားတဲ့ ငွေတွေက ကိုယ့်ငွေတွေတင် မဟုတ်ဘဲနဲ့ ဘဏ်တွေက ယူထားတဲ့ဟာတွေဆိုရင် ဘဏ်တွေကို အတိုးနှုန်းပေးရမယ်။ ဘဏ်တွေကို အတိုးနှုန်း မပေးနိုင်ခဲ့ရင် နောက်ပြီးတော့ ဘဏ်တွေလည်း သူတို့ထုတ်ပေးထားတဲ့ ငွေတွေကို ပြန်တောင်းခဲ့ရင်ပေါ့။ ပထမက ဒီနှစ်ကုန် ဇန်နဝါရီလောက်မှာ ဒီခြောက်လပြည့်သွားတဲ့ဟာတွေကို အားလုံးမြေကွက်တွေကို ဘဏ်တွေကို အကြွေးဆပ်ရတော့မယ်ဆိုပြီး သတင်းထွက်ပေါ်လာပါတယ်။ အခုရက်ထဲမှာတော့ ဒါတွေကိုပြန် မဆပ်ဘဲနဲ့ သုံးနှစ်ပေါ့နော်။ ပြန်ဆပ်ပြီးတော့ ချေးယူလို့ရမယ်လို့ ဗဟိုဘဏ်က ပြန်လည်ပြင်ဆင် သတ်မှတ်ပေးလိုက်တယ်လို့ သိရပါတယ်။ အကယ်၍များ အဲဒီလိုသာ ဖြစ်ခဲ့မယ်ဆိုရင် ကျွန်တော်က အစောကြီးတုန်းက ပြောထားတုန်းက အဲဒီလိုအခြေအနေ ဖြစ်နေတဲ့အတွက် တကယ်လို့ပြန်ဆပ်ရမယ်။ ပြန်လည်းမဆပ်နိုင်ဘူးဆိုရင် ဘဏ်တွေက ဘာလုပ်မလဲ ဒီမြေကွက်တွေကို လေလံတင် ရောင်းချတာတွေ၊ လျှော့ဈေးနဲ့ရောင်းချတာတွေ ဖြစ်ပြီးတော့နော်။ အကယ်၍မှ အဲဒီလိုရောင်းချတဲ့အချိန်မှာ လူကပေါရင် မဝယ်ဘူး။ စီးပွားရေး သဘောတရားအရ ကျွန်တော်တို့ ဈေးတက်ပြီဆိုဝယ်တယ်။ စီးပွားရေးလုပ်တဲ့သူက ကျမယ်ဆိုရင် ထပ်များကျမလားဆိုတဲ့ စိတ်ရှိတယ်။ အဲဒီသဘော တရားရှိတဲ့အတွက် ကျွန်တော်တို့က တကယ်များ အဲဒီလိုမျိုးဖြစ်ခဲ့ရင် ဘဏ်တွေမှာကလည်း ငွေမရှိတော့ဘူး။ မြေကွက်တွေပဲရှိနေမယ် အတိုးတွေလဲ မရတော့ဘူး။ အဲဒီအခါမှာ ပြည်သူလူထုကလည်း အပ်ထားတဲ့ငွေတွေကို ဘဏ်တွေကို စိုးရိမ်ပြီးထုတ်ယူမယ်ဆိုရင် ဘဏ်တွေဖြစ်မယ်။ ဘဏ်တွေဖြစ်ရင်ဘာနဲ့ တူလဲဆိုရင် နိုင်ငံရဲ့ စီးပွားရေးဖြစ်တာနဲ့ အတူတူပဲ။ ဖြစ်လာမယ်လို့ ပြောတာမဟုတ်ဘူး။ အကယ်၍များ ခုနကလို ဒီလဆန်းဒီနှစ်ဆန်းမှာသာ တကယ်အပ်ခိုင်းရင် ဖြစ်လာနိုင်တယ်ပေါ့နော်။

■ မေး - လက်ရှိ ဆောက်လုပ်ရေးလုပ်ငန်းတွေ ပြန်ပြီးကောင်းလာဖို့ဆိုရင် ဘာတွေလုပ်ဆောင် သင့်ပါသလဲ။

■ ဖြေ - နံပါတ် (၁) ကတော့ နိုင်ငံတော်အနေနဲ့ သက်မှတ်တဲ့ အခွန်နှုန်းထားတွေ လျှော့သင့်တယ်။ အခုက သိန်း ၁၀၀၀ ကျော်ရင် ၃၀ ရာခိုင်နှုန်းကောက်တော့ ဝယ်မယ့်သူက မဝယ်နိုင်ဘူး။ နောက်နံပါတ် (၂) တောင်းဆိုတာက ကွန်ဒို Law မြန် မြန်ထွက်ဖို့ ကွန်ဒို Law ကလဲ ထွက်တော့မယ်ဆိုတော့ ဒါကတော်တော်လေး အခြေအနေတစ်ခု ရသွားတယ်ပေါ့နော်။ ကွန်ဒို Law ထွက်ရင် ကျွန်တော်တို့က နိုင်ငံခြားသားကို ရာခိုင်နှုန်း ၄၀ ရောင်းလို့ရမယ်။ ကြားထဲမှာတော့ သူ့လုပ်ငန်းစဉ်တွေ ရှိတာပေါ့။ နံပါတ် (၃) အချက်ကတော့ ဘဏ်အတိုးနှုန်းတွေ လျော့ချပေးဖို့။ အဲဒီတော့ ကျွန်တော်တို့ က ၁၃ ရာခိုင်နှုန်း ဘဏ်အတိုးနှုန်းက သာမန်ငွေနည်းတဲ့သူချေးတာ မသိတာပေမယ့်ငွေကို ဘီလျံနဲ့ချီ ချေးပြီးတော့ ဆောင်ရွက်ရတဲ့ သူတွေမှာကျတော့ ဘာဖြစ်လဲဆိုရင်သူ့ရဲ့ ဝန်ထုပ်ဝန်ပိုးကိုက မနည်းဘူး။ တစ်လတစ်လကို သိန်းထောင်နဲ့ချီပြီးတော့ ဒီဘဏ်တွေကို Interest Rate ပေးနေရတယ်။ အဲဒီလိုပေးနေရတဲ့အတွက် ဒီ Interest က ကြာရင်ကြာသလို နှစ်နဲ့ချီလာရင် အတိုးလဲမဆပ်နိုင်၊ အရင်းလဲမဆပ်နိုင် အခြေအနေမျိုး ရောက်သွားနိုင်တယ်။ ဒါကြောင့်မို့ ဘဏ်အတိုးနှုန်းတွေကို နိုင်ငံတော်က ပြန်ကြည့် ရှုပေးဖို့လိုတယ်။ နောက်တစ်ခု နံပါတ် (၄) အချက် ကျွန်တော်ပြောချင်တာက ဘာလုပ်ဖို့လိုလဲဆိုရင် သူတို့အစိုးရရဲ့ဥပဒေတွေ နည်းဥပဒေတွေကို ဆောက်လုပ်ရေးနဲ့ ပတ်သက်တဲ့ ဥပဒေတွေ နည်းဥပဒေတွေ တင်ဒါနဲ့ပတ်သက်တဲ့ဥပဒေတွေ နည်းဥပဒေတွေ ဒါတွေကိုလုပ်သာကိုင်သာရှိအောင် တကယ်မြေပြင်မှာ တစ်ခါတလေကျရင် ဥပဒေက စာအုပ်ထဲမှာရှိတယ်။ မြေပြင်မှာ တကယ်လုပ်လို့ မလွယ်ဘူး။ မြေပြင်မှာ တကယ်လုပ်လို့လွယ်တဲ့ ဥပဒေတွေ။ ဥပဒေတွေတင်မဟုတ်ဘူး လုပ်ထုံးလုပ်နည်းပေါ့။ တကယ့်လုပ်တဲ့ Process တွေမှာ အဲဒီလုပ်ကိုင်တဲ့ ဝန်ကြီးဌာနအသီးသီးရဲ့ ဝန်ထမ်းတွေရဲ့ တကယ့် Mind - set တွေကို Change ပေးဖို့က နည်းနည်းကြန့်ကြာမယ်။ Change ပေးနိုင်ရင်တော့ အကောင်းဆုံးပါ။ အဲဒီလိုတွေပါ လုပ်ဆောင်လိုက်မယ် ဆိုရင်တော့ဒီ Interest က ပြန်လည် တိုးတက်နိုင်ပါတယ်။

■ မေး - ပြည်တွင်း ဆောက်လုပ်ရေးလုပ်ငန်း အလားအလာ အခြေအနေများကိုလည်း သုံးသပ်ပေးစေလိုပါတယ်။

■ ဖြေ - ကျွန်တော်တို့ ၂၀၁၈ ကို ပြန်ကောင်းလာနိုင်တယ်လို့ မှန်းရတဲ့ အကြောင်းရင်းကတော့ ပထမ ကွန်ဒို Law ထွက်လာမယ်ပေါ့နော်။ ကောင်းမယ်ဆိုတာက တစ်ခါတည်း ဝုန်းဒိုင်းနဲ့ ကျွန်တော်တို့ ၂၀၁၂ -၂၀၁၃ လိုမျိုး၊ အဲဒီလိုမျိုး ပြန်ကောင်းမယ့် အခြေအနေတော့ မဟုတ်ဘူး။ ဒါပေမဲ့ ထိုက်သင့်တဲ့ ကောင်းမွန်မှု တည်ငြိမ်လာမယ်ပေါ့။ နောက်တစ်ခု ဆောက်လုပ်ရေး လောကသားစစ်စစ် မဟုတ်တဲ့သူတွေကလည်း ဒီလောကထဲက ထွက်ပြီးတော့ တကယ့်ကို လက်ရွေးစင်တွေ ကျန်ခဲ့မယ့် သဘောရှိတာပေါ့။ ကွန်ဒို Law ထွက်လာမယ်။ ဘဏ်အတိုးနှုန်းတွေ  Commercial Tax ကျန်တာတွေလဲ လျှော့ချမယ်လို့ ကျွန်တော်တို့ ကြားနေရတယ်။ ကွန်ဒို Law ကတော့ ကျိန်းသေသွားပြီ။ အခွန်လျှော့ချ မယ်ဆိုတာ တကယ်ဖြစ်မဖြစ်ကတော့ မသိဘူး။ တကယ်လဲ လျှော့ချမယ်။ ကျန်တဲ့မူဝါဒတွေလည်း လျှော့ချနိုင်တယ်လို့ သုံးသပ်ရရှိတဲ့အတွက် ဒါကြောင့်မို့ နောင်လာမယ့်နှစ်တွေမှာ ကောင်းနိုင်တယ်လို့ မျှော်လင့်တာ။ ဒါပေမဲ့ ကျွန်တော်တို့ မျှော်လင့်ထားသလို အခွန်တွေ ကလဲ မလျှော့ချဘူး။ ကွန်ဒို Law က ထွက်တော့ထွက်လာတယ်၊ လုပ်လို့ကိုင်လို့ မလွယ်ဘဲနဲ့ သူတို့ရဲ့ Process တွေက ရှုပ်ထွေးနေရင်တော့ ကျွန်တော်တို့ အချိန်တစ်ခုတော့ စောင့်ဆိုင်းရမှာ။ ဘာပဲဖြစ်ဖြစ် ကျွန်တော်တို့ ရောင်နီလေးတော့ မြင်နေရတဲ့သဘောပါ။

■ မေး - တန်ဖိုးနည်းအိမ်ရာ ဆောက်လုပ်ရေးစီမံကိန်းတွေမှာ ဆောက်လုပ်ရေးလုပ်ငန်းရှင်တွေက ဝင်ရောက်လုပ်ကိုင်နိုင်တာ သိပ်မတွေ့ရဘူး။ ဒီအခြေအနေအပေါ်ကိုလည်း သုံးသပ်ပေးပါ။

■ ဖြေ - တန်ဖိုးနည်းအိမ်ရာက ဘာဖြစ်လဲဆိုရင် ကျွန်တော်တို့ ဆောက်လုပ်ရေးက နှုန်းကိုပဲထား။ တစ်ပေ ပတ်လည်ကို ၂၅၀၀၀ ထား။ ဒီ ၂၅၀၀၀ ဆို Squarefeet ၄၀၀ လောက်ရှိတဲ့ အခန်းဆိုရင် ကျွန်တော်တို့က အရင်းတင် သိန်း ၁၀၀ ကျော်တယ်။ အခြေခံအဆောက်အုံ မပါသေးဘူး။ မြေတန်ဖိုး မပါသေးဘူး။ ဒီလုပ်ငန်းရှင်တွေအနေနဲ့ နိုင်ငံတော်က မြေမပေးဘဲနဲ့ ကိုယ့်မြေသာ စိုက်ထုတ်လိုက်ပြီးရောင်းမယ်ဆိုရင် ဘယ်လောက်ပဲရှိတဲ့နေရာမှာပဲ သွားဆောက်ဆောက် တစ်ခန်းတစ်ခန်းကို သိန်း၂၀၀ နဲ့  ၃၀၀ လောက်ကိုရမှ ရောင်းနိုင်တဲ့ အနေအထားဖြစ်တယ်။ သူလမ်းတွေ မီးပေးတာတွေ၊ ရေပေးတာတွေ၊ အဲဒါတွေနဲ့ တည်ဆောက်တဲ့ စရိတ်တွေနဲ့ ပေါင်းလိုက်လို့ရှိရင် ဘာလို့လဲဆိုတော့ ကျွန်တော်တို့က မြေက ပေ ၁၀၀ ပတ်လည်ဆိုရင် ပေ ၁၀၀ ပတ်လည် အပြည့်သုံးလို့မရဘူး။ ၁၀ ဧကဆို ၁၀ ဧက အပြည့်သုံးလို့မရဘူး။ သူရဲ့ထိုက်သင့်တဲ့ အခြေခံအဆောက်အအုံအတွက် ၂၀ ရာခိုင်နှုန်း၊ ၃၀ ရာခိုင်နှုန်း၊ ၄၀ ရာခိုင်နှုန်းသူအတွက် တကယ်အဆင့် မြင့်လေမြင့်လေ သူအတွက် ရာခိုင်နှုန်းအများကြီး မြေကွက်တွေ၊ လမ်းတွေ၊ လမ်းကြားတွေ အဲဒီအတွက် ချန်ရတာတွေ ရှိတယ်။ အဲဒါကြောင့်မို့ အဲဒီမြေကွက် ရင်းနှီးရတဲ့တန်ဖိုးရယ်၊ အခြေခံအဆောက်အအုံအတွက် ရင်းနှီးရတဲ့တန်ဖိုးရယ်၊ တည်ဆောက်တဲ့ တန်ဖိုးတွေက မြင့်မားနေတဲ့အတွက် အဲဒီဟာက တကယ်တမ်း အိုးအိမ်တို့ ဆောက်လုပ်ရေးတို့ ရောင်းတဲ့ဟာ သိန်း ၁၀၀ ကျော်သည် သူတို့က တိုက်ခန်းဈေးပဲရှိတယ်။ မြေလဲအလကားပေးတယ်။ မြေလဲအလကားရတယ်။ အခြေခံ အဆောက်အအုံအတွက်ကလည်း နိုင်ငံတော်က စိုက်ထုတ်ပေးတဲ့ဟာတောင် သိန်း ၃၀ ပဲ အရင်သွင်းပါဆိုတာတောင် ပြည်သူအများစုက မဝယ်နိုင်သေးဘူး။ ပြည်သူတွေပြန်ပြီး ငွေသွင်းမယ့်စနစ်ကို ဘယ်သူက အာမခံပေးမှာလဲ။ အဲဒီတစ်ခုကလည်း ကျွန်တော်တို့အတွက် စိုးရိမ်စရာ ဖြစ်တယ်ပေါ့နော်။

■ မေး - ဒီတန်ဖိုးနည်းအိမ်ရာ စီမံကိန်းတွေမှာ ပြည်တွင်းဆောက်လုပ်ရေး လုပ်ငန်းရှင်တွေ ပါဝင်လုပ်ကိုင်ပေးဖို့ဆို ဘာတွေလိုအပ်သလဲ။

■ ဖြေ - ကျွန်တော်တို့လည်း ဘာပဲဖြစ်ဖြစ် ကိုယ့်နိုင်ငံသားဖြစ်တဲ့အတွက် ကိုယ့်နိုင်ငံသားတွေအနေနဲ့ ဒီအိမ် ကျူးကျော်တွေ ဖြစ်နေတာတွေကို ကျွန်တော်တို့လည်း စိတ်မကောင်းပါဘူး။ ကျွန်တော်တို့ အနေနဲ့လည်း လုပ်ပေးချင်တဲ့ ဆန္ဒရှိပါတယ်။ နိုင်ငံတော်က ပံ့ပိုးပေးရမယ့်အပိုင်းက မြေပံ့ပိုးပေးရမယ်။ အခြေခံအဆောက်အအုံ ပံ့ပိုးပေးရမယ်။ တန်ဖိုးနည်းအိမ်ရာတွေနဲ့ ပတ်သက်လာလို့ရှိရင် ကျွန်တော်တို့သွင်းတဲ့ ပစ္စည်းတွေကို အခွန်အခ ကင်းခကင်းလွတ်ခွင့်တွေပေးမယ်။ ဒီတန်ဖိုးနည်းအိမ်ရာ ဝယ်တဲ့သူတွေဆို အခွန်မကောက်ဘူး။ ကျွန်တော်တို့တွေလည်း တန်ဖိုးနည်းအိမ်ရာဆောက်ရင် အခွန်တစ်မျိုးဖြစ်မယ်။ စသဖြင့် သူတို့ဘက်ကလဲ ဒီတန်ဖိုးနည်းအိမ်ရာ ပေါ်ပေါက်လာဖို့ အထောက်အပံ့ပေးမယ်ဆိုရင်တော့ ကျွန်တော်တို့ဘက်ကလည်း အရင်းလောက်ရသည့်တိုင်အောင် ကျွန်တော်တို့ ဝန်ထမ်းတွေလဲ အလုပ်ရမယ်။ နိုင်ငံတော်ရဲ့လိုအပ်ချက်ကိုလည်း ဖြည့်ဆည်းပေးတဲ့အနေနဲ့  လုပ်ငန်းရှင်တွေက လုပ်ကိုင်ချင်တဲ့ စေတနာရှိပါတယ်။ လောလောဆယ် အနေအထားကတော့ လုပ်ကိုင်နိုင်စွမ်း မရှိသေးပါဘူး။

■ မေး - တန်ဖိုးနည်းအိမ်ရာသာဆိုတယ် တစ်ခန်းကို သိန်း ၁၀၀ အထက်မှာချည်းပဲ ဖြစ်နေတယ်။ ဒီထက်တန်ဖိုးသက်သာတဲ့ နှုန်းထားများထက် ရောင်းနိုင်အောင် ဘာတွေလုပ်ဆောင်သင့်သလဲ။

■ ဖြေ - ကျွန်တော်တို့ သံချောင်းသွင်းမယ် ဒီသံချောင်းကို အခွန်မကောက် နဲ့။ ဒီအိမ်ရာအတွက် သီးသန့်ပေါ့။ သံချောင်းတန် ၁၀၀၀ ကုန်မယ်၊ တန် ၁၀၀၀၀ ကုန်မယ်။ ဒီအိမ်ရာကလွဲ ပြီးမသုံးနဲ့ လုံးဝအခွန်မကောက်နဲ့။ ထို့နည်းတူစွာ ဘိလပ်မြေအခွန် မကောက်နဲ့၊ ထို့နည်းတူစွာ Developer တွေကို အခွန်မကောက်နဲ့။ နောက်နိုင်ငံတော်က ငွေကိုထုတ်ချေးပေး။ လုပ်ငန်းရှင်က သူ့ငွေနဲ့ သူရင်းနှီးရတယ်ဆိုရင် နောက်ပြီး အတိုးကိုလျှော့ပေး။ နောက်တစ်ခါဝယ်တဲ့ သူတွေကိုလည်း နိုင်ငံတော်က ထုတ်ချေးပေး။ ဝယ်တဲ့သူကလည်း စစဝယ်ချင်းမှာပဲ ကျွန်တော် တို့ကို ၁၀ ရာခိုင်နှုန်း ၂၀ ရာခိုင်နှုန်း သွင်းသွင်းသွားရင် ကျွန်တော်တို့လည်း နိုင်ငံတော်ကို သိပ်ပြီးတော့ ပိုက်ဆံချေးစရာမလိုဘူး။ ကျွန်တော်တို့ အတိုးအတွက် သိပ်မပေးရတော့ဘူး။ ဝယ်တဲ့သူနဲ့ ထိုက်သင့်တဲ့ဟာလေးကို ဝယ်တဲ့သူဘက်ကိုလည်း ဘဏ်တွေက ချေးပေးမယ်ဆိုရင် ဘာပဲပြောပြော တန်ဖိုးနည်းအိမ်ရာက သိန်း ၁၀၀ အောက်ကျသွားနိုင်တယ်။