ဇွန် ၁၅ ရက်မှ ၂၂ ရက်အထိ ကိုဗစ်ဓာတ်ခွဲနမူနာစုစုပေါင်း ၂၁၉၉ ခုအား စစ်ဆေးခဲ့ရာ အတည်ပြုလူနာ ၂၉ တွေ့ရှိကြောင်း ကျန်းမရေးဝန်ကြီးဌာနက ထုတ်ပြန်သည်။
ကျန်းမာရေးဝန်ကြီးဌာနသည် ကိုဗစ်-၁၉ ရောဂါ စောင့်ကြပ်ကြည့်ရှုခြင်းလုပ်ငန်းများကို စဉ်ဆက်မပြတ်ဆောင်ရွက်လျက်ရှိရာ ဇွန် ၁၅ ရက် ည ၈ နာရီမှ ၂၂ ရက် ည ၈ နာရီအထိ ရက်သတ္တပတ်အတွင်း ဓာတ်ခွဲနမူနာစုစုပေါင်း ၂၁၉၉ ခုအား စစ်ဆေးပြီးစီးခဲ့ရာ ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၂၉ ဦး တွေ့ရှိရကြောင်း သိရသည်။
ထို့ကြောင့် ရောဂါပိုးတွေ့ရှိမှုရာခိုင်နှုန်းမှာ ၁ ဒသမ ၃၂ ရာခိုင်နှုန်းဖြစ်ကြောင်း၊ အစီရင်ခံကာလအတွင်း ပြင်းထန်လူနာ၊ အထူးကြပ်မတ်ကုသမှုပေးရသောလူနာနှင့် ကိုဗစ်-၁၉ ရောဂါဖြင့် သေဆုံးလူနာမရှိကြောင်း ထုတ်ပြန်ချက်တွင် ပါရှိသည်။
လတ်တလောတွင် မိမိတို့နိုင်ငံအတွင်း၌ ကိုဗစ်-၁၉ ရောဂါ ကူးစက်ဖြစ်ပွား/ သေဆုံးမှုနှင့်စပ်လျဉ်း၍ စိုးရိမ်ဖွယ်ရာအခြေအနေမရှိသော်လည်း ရောဂါဖြစ်ပွားမှုမှ ကြိုတင်ကာကွယ်နိုင်ရန်အတွက် တစ်ကိုယ်ရေကာကွယ်ရေးနည်းလမ်းများကို လိုက်နာဆောင်ရွက်ရန်လိုအပ်ပြီး ရောဂါကူးစက်ခံရပါက ရောဂါပြင်းထန်နိုင်ခြေနှင့် အသက်ဆုံးရှုံးနိုင်ခြေမြင့်မားသည့် အသက်အရွယ်ကြီးသူများ (အသက် ၆၀ နှစ်နှင့်အထက်)၊ ဆီးချိုရောဂါ၊ နာတာရှည်အဆုတ်ရောဂါ၊ ကင်ဆာရောဂါရှိသူများ၊ ကိုယ်ဝန်ဆောင်မိခင်များ (ကိုယ်ဝန်ဆောင်ကာလ သုံးလနှင့်အထက်) ကို ဦးစားပေးအစီအစဉ်ဖြင့် ကိုဗစ်-၁၉ ရောဂါ ထပ်ဆောင်းကာကွယ်ဆေး ထိုးနှံပေးသွားမည်ဖြစ်ပါ၍ ကာကွယ်ဆေးထိုးနှံမှုခံယူကြရန် လိုအပ်ကြောင်း ပြည်သူ့ကျန်းမာရေးဦးစီးဌာန၊ ကျန်းမာရေးဝန်ကြီးဌာနက ထုတ်ပြန်သည်။
ဇွန် ၈ ရက်မှ ၁၅ ရက်အတွင်းကလည်း ရောဂါပိုးသံသယရှိသူ ၂၂၈၅ ဦးအား စစ်ဆေးရာ ပိုးတွေ့သူ ၅၂ ဦးရှိခဲ့ပြီး ရာခိုင်နှုန်းအားဖြင့် ၂ ဒသမ ၂၈ ရာခိုင်နှုန်းရှိကြောင်း၊ သေဆုံးသူ မရှိကြောင်း သိရသည်။
အလားတူ ပြီးခဲ့ရက်သတ္တပတ် ဇွန် ၁ ရက်မှ ဇွန် ၈ ရက်အထိ ကိုဗစ်ပိုးသံသယရှိသူ ၂၁၅၄ ဦးအား စစ်ဆေးခဲ့ရာ ပိုးတွေ့ရှိသူ ၃၁ ဦးရှိခဲ့ကြောင်း၊ ရာခိုင်နှုန်းအားဖြင့် ၁ ဒသမ ၄၄ ရာခိုင်နှုန်းရှိကြောင်း၊ သေဆုံးသူမရှိကြောင်း သိရသည်။
ပြီးခဲ့သည့် မေ ၂၅ ရက်မှ ဇွန် ၁ ရက်အထိ ကိုဗစ်ပိုးတွေ့ရှိသူ ၁၇ ဦးရှိခဲ့ပြီး ပိုးတွေ့ရှိသူများမှာ ရန်ကုန်တိုင်းဒေသကြီးအတွင်းရှိ မြို့နယ်များမှ ဖြစ်သည်။
