ကမ္ဘောဒီးယားနိုင်ငံတွင် ပြုလုပ်သည့် ခွန်ခမာပြိုင်ပွဲတွင် MMA ထိုးသတ်ခဲ့သည့် မြန်မာဖိုက်တာ ဇင်ဖြိုးသည် အိမ်ရှင်ကမ္ဘောဒီးယားဖိုက်တာ ဆာရို့သ်ကို ရှုံးနိမ့်ခဲ့ကြောင်း သိရသည်။
Kun Khmer Warriors ဟု အမည်ပေးထားသည့် ခွန်ခမာပြိုင်ပွဲကို ပြီးခဲ့သည့် နိုဝင်ဘာ ၉ ရက်က ကမ္ဘောဒီးယားနိုင်ငံ၊ ဖနွမ်းပင်မြို့တွင် ကျင်းပပြုလုပ်ခဲ့ရာ မြန်မာလူငယ်ဖိုက်တာ ဇင်ဖြိုးသည် ယင်းပြိုင်ပွဲတွင် MMA ဝင်ရောက်ယှဉ်ပြိုင်ထိုးသတ်ခဲ့ခြင်း ဖြစ်သည်။
အသက် ၂၂ နှစ်သာရှိသေးသူ မြန်မာလူငယ်ဖိုက်တာ ဇင်ဖြိုးသည် ယင်းပြိုင်ပွဲတွင် ကမ္ဘောဒီးယားဖိုက်တာ ဆာရို့သ်နှင့် ၆၃.၅ ကီလိုတန်း၌ MMA စည်းမျဉ်းအတိုင်း ၅ မိနစ် ၃ ချီ ယှဉ်ပြိုင်ထိုးသတ်ခဲ့ခြင်းဖြစ်သည်။
ဇင်ဖြိုးသည် ယခုပွဲမတိုင်မီ ပရော်ဖက်ရှင်နယ်ပွဲ ၄ ပွဲထိုးသတ်ထားပြီး ၃ ပွဲနိုင်၊ တစ်ပွဲသရေကျကာ ရှုံးပွဲမရှိသေးသူဖြစ်သည်။
ဇင်ဖြိုးနှင့် ထိုးသတ်ခဲ့သည့် ကမ္ဘောဒီးယားဖိုက်တာ ဆာရို့သ်သည် အသက် ၂၅ နှစ်ရှိပြီး ပွဲ ၉၀ ထိုသတ်ထားရာ ၇၆ ပွဲနိုင်၊ တစ်ပွဲသရေ၊ ၁၃ ပွဲရှုံးနိမ့်ထားသည့် ၀ါရင့်ဖိုက်တာတစ်ဦးဖြစ်သည်။
ဇင်ဖြိုးသည် ပထမအချီအစမှာပင် ကမ္ဘောဒီးယားဖိုက်တာ ဆာရို့သ်၏ Takedown မိပြီး လှဲချခံရကာ ရုန်းကန်ခဲ့ရပြီး ပထမအချီပြီးခါနီးစက္ကန့်ပိုင်းအလိုတွင် ချုပ်ကွက်မိကာ အရှုံးပေးခဲ့ရခြင်းဖြစ်သည်။
