ကလပ်အသင်းတွေကြား ဘဏ္ဍာရေးအင်အား ကွာခြားသထက် ကွာခြားလာတာကြောင့်လည်း Shock ဖြစ်တဲ့အခြေအနေမျိုး ချန်ပီယံလိဂ်မှာမြင်ရဖို့ခက်ခဲလာပါပြီ။ အားကြီးသူသာ နိုင်စတမ်းသီအိုရီဟာ ခေတ်ပေါ် ဘောလုံးလောကမှာ ပိုပြီးမှန်ကန်လာတယ်။ မိုနာကိုနဲ့ ပေါ်တို ဖိုင်နယ်မှာ ဆုံတယ်ဆိုတာမျိုးဟာ ပုံပြင်ဆန်သွားပါပြီ။ သိပ်မကြာသေးခင် ၂၀၁၉ ခုနှစ်ကမှ ချန်ပီယံလိဂ်ရဲ့ Shock ဖြစ်စေမယ့် ရလဒ်တွေနဲ့ ဖမ်းစားနိုင်ခဲ့သေးတယ်။ အေဂျက်စ်က ရီးယဲလ်၊ စပါးက ဒေါ့မွန်၊ ပေါ် တိုက ရိုးမားတို့ကို ကျော်ဖြတ်ပြတာမျိုးပေါ့။ တကယ်လို့များ လက်ရှိရာသီရှုံးထွက် (၁၆) သင်းအဆင့်မှာ ပေါ်တိုက အာဆင်နယ်ကို ကျော်ဖြတ်နိုင်ရင်လည်း Shock မဟုတ်ဘူးလို့ စပိန်အားကစားဂျာနယ်လစ် ဘယ်လာဂွယ်သုံးသပ်တယ်။ ကိုပင်ဟေဂင်က မန်စီးတီးကို အနိုင်ယူပြမှသာ Shock လို့ တံဆိပ်ကပ်နိုင်ပါတယ်။