သက် ၆၁ နှစ်ရှိပြီဖြစ်သည့် တွမ်ခရုစ်က အထက်တန်းကျကျနေတတ်သည့် အယ်ဆီနာခိုင်ရိုဗာဆိုသူ အမျိုးသမီးနှင့် လတ်တလောတွဲခုတ်နေပြီး ဒီဇင်ဘာ ၁၅ ရက်ညပိုင်းက ခိုင်ရိုဗာနှင့်ဒိတ်ရန် လန်ဒန်ရှိထိပ်တန်းစားသောက်ဆိုင် Novikov တစ်ဆိုင်လုံးကို ငှားပစ်လိုက်သည်။
မျက်မြင်တွေ့သူတစ်ဦးက သူတို့နှစ်ဦးကို မြင်ရသည်မှာ အရမ်းရင်းနှီးပုံရပြီး ခိုင်ရိုဗာက တလက်လက်တောက်နေသည့်ဝတ်စုံနှင့် အနက်ရောင်သားမွေးကုတ်ကို ဝတ်လာသည်ဟု The Sun သို့ပြောသည်။ ဝန်ထမ်းတစ်ဦးက ဓာတ်ပုံရိုက်ခွင့်တောင်းသည့်အတွက် တွမ်ခရုစ်၏လုံခြုံရေးက ဝင်ပါခဲ့ရသည်ဟုလည်း ၎င်းမျက်မြင်က ဆိုသည်။
အလွန်ရက်ရောသည့် တွမ်ခရုစ်က ခိုင်ရိုဗာနှင့်အတူ ဘေးဘက်တံခါးမှ အသင့်စောင့်ဆိုင်းနေသည့်ကားဆီသို့ မသွားမီ ဆိုင်ဝန်ထမ်းကို ဒေါ်လာ ၁၀၀ ကျော် ဘောက်ဆူးပေးခဲ့သေးသည်။ ခရုစ်နှင့်ခိုင်ရိုဗာတို့ ပြီးခဲ့ သည့်တစ်ပတ်က လန်ဒန်တွင်ပြုလုပ်သည့်ပါ တီပွဲတစ်ခုတွင် နီးနီးကပ်ကပ်တွဲမြင်ရပြီးနောက် သူတို့တွဲနေပြီဆိုသည့်သတင်းများ ထွက်လာခဲ့သည်။
ပါတီတက်ရောက်ခဲ့သူတစ်ဦးက ခရုစ်နှင့်ခိုင်ရိုဗာ(အသက် ၃၆ နှစ်)တို့ ပွဲသို့အတူ ရောက်လာကြပြီး ကခဲ့သည့်အချိန်ကများသည်ဟု Daily Mail သို့ဖွင့်ချထားသည်။ ဓာတ်ပုံရိုက်ခွင့်များ မနားတမ်းတောင်းဆိုလာကြသည့်အတွက် ခရုစ်ကဓာတ်ပုံမရိုက်ချင်ပါဟု ဒီဂျေက ရုရှားစကားဖြင့်ပင်ကြေညာခဲ့ရသည်။ မနက်အစောပိုင်းမှ ခရုစ်တို့ပြန်သွားကြသည်။
ရုရှားနိုင်ငံဖွား ခိုင်ရိုဗာသည် ယခင်က မော်ဒယ်ဖြစ်ပြီး ဗြိတိန်နိုင်ငံသားခံယူထားသည်။ သူသည် ရုရှားသူဌေး ဒီမစ်ထရီ စဗတ်ကော့နှင့် အိမ်ထောင်ကျခဲ့သေးသည်။
ခင်ပွန်းဟောင်း စဗတ်ကော့က Daily Mail မှတစ်ဆင့် ခရုစ်ကို သတိပေးသည့်အနေဖြင့် ခိုင်ရိုဗာနှင့်ဒိတ်လိုလျှင် ပိုက်ဆံအိတ်ကို ဖွင့်သာထားလိုက်ဟု ပြောဆိုထားသည်။ “တွမ်ခရုစ်မှ မဟုတ်ဘူး။ ခိုင်ရိုဗာနဲ့တွဲသူမှန်သမျှ သူဟာ ဘဝမှာကောင်းပေ့ဆိုတဲ့အရာတွေ၊ တန်ဖိုးကြီးတဲ့အရာတွေကိုပဲ ကြိုက်တဲ့သူဆိုတာ သိထားသင့်တယ်” ဟုလည်း ခင်ပွန်းဟောင်းက ဆိုသည်။
ခရုစ်သည် ၁၉၈၇ မှ ၁၉၉၀ ခုနှစ်အထိ မင်းသမီး မီမီရော်ဂျာစ်၊ ၁၉၉၀ မှ ၂၀၀၁ ခုနှစ်အထိ နစ်ကိုးကစ်မန်း ၊ ၂၀၀၆ မှ ၂၀၁၂ ခုနှစ်အထိ ကေတီဟုမ်းစ်တို့နှင့်လက်ထပ်ပေါင်းသင်းခဲ့ကာ ယခုနှစ်ထဲတွင် ရှကီရာနှင့်ကော လာဟလများပျံ့ခဲ့သည်။
