ကေပေါ့အဆိုတော်အဖွဲ့များတွင် နိုင်ငံခြားသားအဖွဲ့ဝင်များ ပါနေတတ်သည်မှာ အဆန်းမဟုတ်သော်လည်း ပွဲဦးထွက်လာမည့် ယောကျ်ားလေးအဆိုတော်အဖွဲ့သစ် တစ်ဖွဲ့အတွက် မြောက်ကိုရီးယားနိုင်ငံသားနှစ်ဦးကို အဖွဲ့ဝင်အဖြစ်ရွေးထားခြင်းသည် ကေပေါ့သမိုင်းတွင် ပထမဆုံးအကြိမ်ဖြစ်သည်။
ကေပေါ့နှင့်ပတ်သက်၍ ကိုရီးယားနှစ်နိုင်ငံ ထိတွေ့မိခြင်းသည် ၂၀၁၈ ခုနှစ်က မြောက်ကိုရီးယားတွင် Red Velvet အဖွဲ့ သွားရောက်ဖျော်ဖြေခဲ့သည့် တစ်ကြိမ်တည်း သာရှိသည်။ယခုကေပေ့ါအဖွဲ့သစ်အတွက် Exo၊ Seventeen စသည့် နာမည်ကျော်အဆိုတော်များအတွက် သီချင်းများရေးစပ်ပေးခဲ့သည့် မစ်ရှဲချို(SM Entertainment အေဂျင်စီနှင့် ယခင်ကလက်တွဲခဲ့သူ) က အလားအလာရှိသူများကို ရွေးချယ်နေပြီး မြောက်ကိုရီးယား လူငယ်နှစ်ဦးပါသည့် ၎င်းအဖွဲ့ကို SB BOYZ ဟု အမည်ပေးထားသည်။၎င်းအဖွဲ့ကို စီမံမည့် Singing Beetle ကလည်း ကေပေါ့ကုမ္ပဏီသစ်ဖြစ်သည်။
အဖွဲ့ဝင်များအတွက် fan page တစ်ခုလည်းရှိပြီး အဖွဲ့ဝင်အချို့၏ ကိုယ်ရေးအချက်အလက်များကို တင်ထားသည်။မြောက်ကိုရီးယားနိုင်ငံသား Seok နှင့် Hyuk တို့နှစ်ဦးစလုံး ၂၀၀၀ ခုနှစ်မွေးသူများဖြစ်သည်။နောက်တစ်ဦးက တရုတ်-အမေရိကန်နိုင်ငံသားဖြစ်ပြီး Asia Super Young (survival show) တွင် ပါဝင်ထားသူဖြစ်ကာ kenny ဟု အချို့က သိကြသည်။
မြောက်ကိုရီးယားလူငယ်နှစ်ဦးအကြောင်းကို Wall Street ဂျာနယ်က နိုဝင်ဘာတွင် ဖော်ပြခဲ့ဖူးသည်။ Hyuk ၏မိဘများက ကွဲသွားပြီး မိခင်က တောင်ကိုရီးယားသို့ပြောင်း ရွှေ့ခဲ့သည်။မိခင်ရှိရာသို့လိုက်လာပြီးနောက် သူသည် ပြည်ပြေးများမဖြစ်မနေတက်ရသည့် သုံးလသင်တန်းကို တက်ခဲ့ရသည်။တောင်ကို ရီးယားနေထိုင်မှုပုံစံနှင့်ကျင့်သားရအောင် ကူညီပေးသည့်သင်တန်းဖြစ်သည်။သူကလေးအရွယ်က မြောက်ကိုရီးယားလမ်းများပေါ်တွင် တောင်းရမ်းအလစ်သုတ်ရင်း ကြီးပြင်းလာခဲ့ရသည်။ Wall Street ဂျာနယ်တွင် သူတို့နှစ်ဦး အကြောင်းရေးထားသည့်သတင်းက တစ်လနီးပါးကြာပြီဖြစ်သော်လည်း ကိုယ်ရေးအချက်အလက်များက ယခုလတ်တလောမှပျံ့လာခြင်းဖြစ်သည်။ကျန်အဖွဲ့ဝင်များ ထပ်ရွေးရန်လည်း မစ်ရှဲချိုက လူတွေ့စစ်ဆေးမှုများပြုလုပ်လျက်ရှိသည်။
