အစ္စရေး-ဟားမာ့စ်စစ်ပွဲနှင့်သက်ဆိုင်ပြီး ဂျူးဆန့်ကျင်ရေးအဖြစ် ယူဆရသည့်မှတ်ချက်များကြောင့် အော်စကာဆုရမင်းသမီး ဆူဆန်ဆရံဒန်နှင့် Scream ဇာတ်ကားသရုပ်ဆောင် မလစ်ဆာဘရယ်ရာတို့ကို သူတို့နှင့် လက်တွဲလုပ်ကိုင်နေသည့် ဟောလိဝုဒ်ကုမ္ပဏီများက လက်တွဲဖြုတ်လိုက်ကြသည်။
ဆူဆန်ဆရံဒန်သည် အော်စကာဆန်ခါ တင်စာရင်းတွင် ငါးကြိမ်ပါဝင်ခဲ့ပြီး ၁၉၉၅ ခုနှစ်က Dead Man Walking ဇာတ်ကားဖြင့် အကောင်းဆုံးဇာတ်ဆောင်မင်းသမီးဆု အော်စကာတစ်ကြိမ်ရထားသည်။မက္ကဆီကိုရုပ်ရှင် မင်းသမီး မလစ်ဆာဘရယ်ရာက Scream ဇာတ်ကားနှစ်ကားတွင် ပါဝင်ထားသည်။
နိုဝင်ဘာ ၁၇ ရက်က နယူးယော့ခ်တွင်ပြုလုပ်သည့် ပါလက်စတိုင်းထောက်ခံရေးဆန္ဒဖော်ထုတ်မှုတွင် ဆရံဒန်ပြောဆိုခဲ့သည့်မှတ်ချက်များကြောင့် United Talent Agency (UTA) က ဆရံဒန်နှင့်၎င်းတို့ မသက်ဆိုင် တော့ဟု ကြေညာလိုက်သည်။
နယူးယော့ခ်ပို့စ်ဖော်ပြချက်အရ ဆရံဒန်သည် လူအုပ်နှင့်အတူ ပါလက်စတိုင်းတို့ လွတ်မြောက်လိမ့်မည်ဟု ကြွေးကြော်ခဲ့ပြီး ယင်းသို့ ကြွေးကြော်မှုက အစ္စရေးပျက်သုဉ်းသည့် သဘော၊ ဂျူးဆန့်ကျင်ရေးအဖြစ် ရှုမြင်ခံရ သည်။အစ္စရေးကိုဝေဖန်ခြင်းက ဂျူးကိုဆန့်ကျင်ခြင်းမဟုတ်၊ ထိုနှစ်ခုကိုရောထွေးနေကြကြောင်း၊သူက ဂျူးဆန့်ကျင်ရေးကို ရောမွတ်စလင်ဆန့်ကျင်ရေးကိုပါ လက်မခံကြောင်း ဆန္ဒပြပွဲတွင် ဆရံဒန်ကပြောသည်။
လာမည့် ScreamVII ဇာတ်ကားကို ထုတ်လုပ်မည့် Spyglass Medai Group ကလည်း ဇာတ်ကားထဲတွင် ဘယ်ဘရာမပါတော့ကြောင်း ကြေညာလိုက်သည်။ဘယ်ဘရာက ဂါဇာစစ်ပွဲကို မျိုးဖြုတ်သတ်ဖြတ်မှုဟု အင်စတာဂရမ်တွင်ပို့စ်တင်ခဲ့ပြီး ဂါဇာသည် လက်ရှိတွင် အကျဉ်းစခန်းသဖွယ် သဘော ထားခံနေရသည်ဟု ထည့်ရေးခဲ့သည်။
ဘယ်ဘရာနှင့်ပတ်သက်ပြီးSpyglass ဘက်က ဘောင်ကျော်သည့်အမုန်းစကား ပြောဆိုမှုများ၊ မည်သည့်ပုံစံနှင့်မဆို အမုန်းတရားဆွပေးမှုများကို လုံးဝလက်မခံဟု တုံ့ပြန်ထားသည်။
အစ္စရေး-ဟားမာ့စ်စစ်ပွဲက ဟောလိဝုဒ် လောကတွင် စိတ်ဝမ်းကွဲမှုများ ဖြစ်လာစေ သည်။အဖွဲ့အစည်းအများစုက ဟားမာ့စ်၏ အောက်တိုဘာ ၇ ရက်တိုက်ခိုက်မှုကို ရှုတ်ချကြောင်း ထုတ်ပြန်ချက်များထွက်လာသော်လည်း Writers Guild of America အဖွဲ့က အမြင်ကွဲမှုများကြောင့် ယင်းသို့ထုတ်ပြန်မှုမျိုး မထုတ်ခဲ့ပေ။
