အိန္ဒိယသို့ အလည်အပတ်ရောက်လာ သည့် ဒေးဗစ်ဘက်ခမ်းအတွက် ရှာရွတ်ခန်းက မွမ်ဘိုင်းရှိ Mannat နေအိမ်တွင် ပြီးခဲ့သည့်သီတင်းပတ်က ညစာစားပွဲတစ်ခု ကျင်းပခဲ့သည်။

ရှာရွတ်ခန်း၏ အိမ်သို့အဝင်တွင် ဘက်ခမ်းက စောင့်ဆိုင်းနေသည့် ပါပါရာဇီများအား ပြုံးလျက်လက်ပြနှုတ်ဆက်ခဲ့သည်။ ရှာရွတ်ခန်း၏ဖိတ်ခေါ်မှုမတိုင်မီ ဘောလိဝုဒ်ရုပ်ရှင်မင်းသမီး ဆိုနမ်ကပူးတို့ ဇနီးမောင်နှံလည်း ဘက်ခမ်းကို ညစာဖိတ်ကျွေးလိုက်သေးသည်။

ပါတီပြီးသွားပြီးနောက် ဘက်ခမ်းက သီးသန့်ဂျက်လေယာဉ်ဖြင့် ဗြိတိန်သို့ ပြန်သွားသည်။ ရှာရွတ်ခန်း၏ ညစာစားပွဲသို့ ဆိုနမ်ကပူးတို့ ဇနီးမောင်နှံလည်း တက်ရောက်ခဲ့ပြီး   ဆိုနမ်၏ခင်ပွန်း အနန်အာဟူဂျာက အဖွဲ့ လိုက်ဓာတ်ပုံကို ဆိုရှယ်မီဒီယာတွင်တင်ကာ ရှာရွတ်ခန်းတို့မိသားစုကို Tag တွဲခဲ့သည်။

သူတင်ခဲ့သည့်ပုံက  မျက်နှာများကို ရိုက်ထားသည့်ပုံမဟုတ်၊ ဖိနပ်ပုံများသာဖြစ်သည်။

ဒေးဗစ်ဘက်ခမ်းသည် နိုဝင်ဘာ ၁၅ ရက်က  မွမ်ဘိုင်း၌ပြုလုပ်သည့် ခရစ်ကတ်ကမ္ဘာ့ဖလား ၂၀၂၃ အိန္ဒိယ-နယူးဇီလန် ဆီမီးဖိုင်နယ်ပွဲကို  တက်ရောက်အားပေးပြီးနောက် ဆိုနမ်ကပူး၏ အိမ်တွင် ညစာသွားစားခဲ့သည်။

ဘက်ခမ်းသည် အိန္ဒိယခရီးစဉ်အတွင်း  ဂူဂျာရတ်ပြည်နယ်ရှိ ရွာတစ်ရွာသို့ သွားလည်ခဲ့သေးသည်။ ကလေးများနှင့် ခရစ်ကတ်လည်း ကစားခဲ့သည်။ ၂၀၀၅ ခုနှစ်တွင် ယူနီဆက်ဖ်ချစ်ကြည်ရေးသံတမန်ဖြစ် လာသည့် ဘက်ခမ်း၏ အထူးတာဝန်က ယူနီဆက်ဖ်၏အားကစားဖွံ့ဖြိုးရေး အစီအစဉ်ဖြစ်သည်။ ယူနီဆက်ဖ်၏ အရေးပေါ်လုပ်ငန်းများကို ကူညီသည့်အနေဖြင့် ဘက်ခမ်းက ၂၀၁၄ ခုနှစ်တွင် ဖိလစ်ပိုင်သို့သွားကာ ဟိုင်ယန်တိုင် ဖွန်းဒဏ်သင့် မိသားစုများနှင့် တွေ့ခဲ့သည်။