အီရန်နိုင်ငံ၏ အကျော်ကြားဆုံး ရုပ်ရှင် ဒါရိုက်တာများထဲမှ တစ်ဦးဖြစ်သည့် ဒဲရီးယက် မာဂျူနှင့် ဇနီးတို့ အောက်တိုဘာ ၁၄ ရက်ညပိုင်းက မြို့တော်တဟီရန်အနီးရှိနေအိမ်တွင်  အသတ်ခံခဲ့ရသည်။

အယ်ဘော့ဇ်ပြည်နယ်၏ တရားရေးအကြီးအကဲတစ်ဦးကမူ မာဂျူနှင့်ဇနီး  ဗာဟီဒေမိုဟာမာဒီဖာသည် လည်ပင်းနေရာသို့ ဓားချက်များစွာထိုးသွင်းခံရပြီး သေဆုံးသွားခြင်းဖြစ်သည်ဟု ပြောဆိုထားသည်။ဆက် လက်ပြီး တရားရေးအကြီးအကဲကမာဂျူသည် အောက်တိုဘာ ၁၄ ရက်ည ဒေသစံတော်ချိန်   ည ၉ နာရီခန့်တွင် သမီးဖြစ်သူမိုနာထံ ညစာ လာစားရန် စာပို့ဖိတ်ခေါ်ခဲ့ပြီး တစ်နာရီခွဲအကြာတွင် အိမ်သို့  မိုနာရောက်လာသည့်အခါ  မိဘနှစ်ဦး ဒဏ်ရာဒဏ်ချက်များဖြင့် သေဆုံးနေသည်ကို တွေ့ခဲ့သည်ဟု ပြောသည်။

ရဲတပ်ဖွဲ့ထုတ်ပြန်ချက်အရ မာဂျူ၏ နေအိမ်သို့ အတင်းဝင်ရောက်ထားသည့် လက္ခဏာတစ်စုံတစ်ရာ မတွေ့ရ ၊ နေအိမ်တံခါးများ ဖျက်ဆီးခံထားရပုံလည်း မရှိပေ။သို့သော် လူသတ်သမားနှင့် ဆက်စပ်နေမည် ယူဆရသည့်  သဲလွန်စများ တွေ့သည်ဟု ရဲတပ်ဖွဲ့ကပြောသည်။ အီရန်သတင်းဌာန ISNA ကြေညာသွားချက်အရ သံသယဖြစ်ဖွယ်လေးဦးကို ဖော်ထုတ်သိရှိထားပြီးနှစ်ဦးကို ဖမ်းဆီးထားသည်။

အခင်းဖြစ်ပြီး နောက်တစ်နေ့တွင် Etemad သတင်းစာက မာဂျူ၏ဇနီးဖြေထားသည့် အင်တာဗျူးတစ်ခုကို ဖော်ပြခဲ့သည်။ ဇနီးဖြစ်သူပြောထားသည်မှာ ခြိမ်းခြောက်မှုနှင့် သူကြုံနေရပြီး အိမ်လည်းဖောက်ထွင်းခံထား ရသည်ဟူ၍ဖြစ်သည်။

၁၉၃၉ ခုနှစ် ၊ ဒီဇင်ဘာ ၈ ရက်က တဟီရန်မြို့တွင် မွေးဖွားခဲ့သည့် မာဂျူသည်  အမေရိကန်တွင် ဒဿနိကဗေဒကို သင်ယူခဲ့ပြီး အီရန်သို့ပြန်လာပြီးသည့်နောက် မဂ္ဂဇင်းတစ်ခု ထုတ်ဝေခဲ့ကာ ၁၉၆၇ ခုနှစ်တွင် ပထမဆုံးရုပ်ရှင် Diamond 33 ကို ရိုက်ကူးခဲ့သည်။အီရန်ယဉ်ကျေးမှုဝန်ကြီး မိုဟာမက်မက်ဒီက သူ့ကို အီရန်ရုပ်ရှင်လောက၏ ရှေ့ဆောင်တစ်ဦးဟုလည်း ချီးကျူးခဲ့သည်။

Mr Gullible ၊ The Cycle စသည့် နာမည်ကျော်ဇာတ်ကားများစွာ သူဖန်တီးခဲ့ပြီး ၁၉၇၉ ခုနှစ် အစ္စလမ်မစ်တော်လှန်ရေးဖြစ်ပြီးနောက် အီရန်ကို စွန့်ခွာသွားကာ ၁၉၈၀ နှင့်  ၁၉၈၅ ခုနှစ်အကြား ပြင်သစ်တွင်နေထိုင်ခဲ့သည်။အီရန်သို့ပြန်လာပြီးနောက် သူရိုက်ကူးခဲ့သည့် The Tenants ရုံတင်ဇာတ်ကားသည် ၁၉၈၀ ပြည့်လွန်နှစ်များအတွင်း အကောင်းဆုံးအီရန်ဇာတ်မြူးရုပ်ရှင် ဖြစ်လာခဲ့သည်။