ဂျပန်နိုင်ငံတွင် ၆၅ နှစ်ကြာ ထုတ်လွှင့်ပြသသည့် ဟင်းချက်အစီအစဉ်သည် နှစ်အကြာဆုံး ထုတ်လွှင့်ပြသသည့် အချက်အပြုတ်အစီအစဉ်အဖြစ် ဂင်းနစ်ကမ္ဘာ့စံချိန်တင်ခဲ့သည်ဟု NHK သတင်းတွင်ဖော်ပြထားသည်။

NHK ၏ “Kyo no Ryori” သို့မဟုတ် “Today’s Cooking” ဟင်းချက်အစီအစဉ် စတင်ထုတ်လွှင့်ပြသသည့် ၁၉၅၇ ခုနှစ်ကတည်းက ဟင်းအမည်ပေါင်း ၄၆,၆၀၀ ကို ချက်ပြုတ်ပြသခဲ့ပြီးဖြစ်ကာ စီးပွားရေးကျဆင်းမှုမှ အမျိုးသမီးများ၏ စွမ်းဆောင်နိုင်မှုအထိ သမိုင်းခေတ်တစ်ခေတ်၏ အတွေးအခေါ်၊ ယုံကြည်မှု စသည်တို့၏ ထူးခြားသောလက္ခဏာရပ်များကို ထင်ဟပ်လျက်ရှိသည်။

“ဒီနေ့တော့ ညစာကို ဘာချက်သင့်လဲဆိုတာက လူတိုင်းအတွက် မရပ်မနား စဉ်းစားနေတဲ့ မေးခွန်းတစ်ခုဖြစ်မယ်လို့ ကျွန်မ ထင်ပါတယ်”ဟု ပရိုဂျူဆာချုပ် မာယုမီယူနာအီက ဂင်းနစ်မှတ်တမ်းပေးအပ်သည့် အခမ်းအနားတွင် ပြောကြားခဲ့သည်။

“ဒီအစီအစဉ်က ဘာချက်ရမလဲဆိုတဲ့ မေးခွန်းအတွက် အဖြေတစ်ရပ်ဖြစ်စေဖို့ ရည်ရွယ်ထားကာ ကျွန်မတို့ရဲ့ မိသားစုဝင်ပရိသတ်တွေနဲ့ နီးနီးကပ်ကပ်ရှိနေစေဖို့ ရည်ရွယ်ပါတယ်”ဟု ၎င်းကဆိုသည်။ ယင်းဟင်းချက်အစီအစဉ်သည် ဂျပန်၏ ကျုံ့သွားသောလူဦးရေနှင့် မိသားစုပမာဏအပါအဝင် အပြောင်းအလဲဖြစ်ခဲ့သော အချိန်များကို ထင်ဟပ်စေခဲ့သည်။

အစောပိုင်းက မိသားစုငါးဦးစာအတွက် ချက်နည်းပြုတ်နည်းများကို တင်ဆက်ခဲ့သော်လည်း နောက်ပိုင်းတွင် မိသားစုဝင်လေးဦးသည် စံနှုန်းဖြစ်လာခဲ့ပြီးနောက် မိသားစုဝင် နှစ်ဦးစာအတွက် အစားအစာများသည် နေရာယူလာခဲ့သည်။

၁၉၅၇ ခုနှစ်တွင် ထုတ်လွှင့်ခဲ့သည့် ၎င်း၏ ပထမဆုံးအပိုင်းတွင် ကမာကောင်များကို အသုံးပြု၍ အနောက်တိုင်းစတိုင် ဟင်းချက်နည်းကိုပြသခဲ့ပြီး ထိုအချိန်က ဂျပန်နိုင်ငံသား လေးဦးတွင် တစ်ဦးသည် အာဟာရချို့တဲ့မှုနှင့် ရင်ဆိုင်နေရသည်ဟု သိရသည်။

ကမ္ဘာ့ရေနံအကျပ်အတည်း ကြုံတွေ့ခဲ့သည့် ၁၉၇၀ ပြည့်နှစ်ဝန်းကျင်တွင် ၎င်း၏ပရိသတ်များအတွက် ဝင်ငွေနည်းသော ဟင်းချက်နည်းများကို ခင်းကျင်းပြသခဲ့သည်။ ၁၉၈၀ ပြည့်နှစ်ဝန်းကျင်တွင် အမျိုးသမီးများ လုပ်ငန်းခွင်အတွင်းသို့ ပိုမိုဝင်ရောက်လာချိန်၌ ယင်းအစီအစဉ်သည် အလွန်လျင်မြန်စွာ ချက်ပြုတ်နိုင်သော ဟင်းအမည်များကို ပြောင်းလဲ အာရုံစိုက် တင်ဆက်ခဲ့ပြီး “အမျိုးသားများ၏ ဟင်းပွဲများ” ကဲ့သို့ အကြောင်းအရာများကို မီးမောင်းထိုးတင်ဆက်ခဲ့သည်။