ဘန်ကောက်ရှိ စီယမ်ပါရာဂွန်ကုန်တိုက်အတွင်း အောက်တိုဘာ ၃ ရက်က ကြောက်စရာအပစ်အခတ်တစ်ရပ် ဖြစ်ပွားခဲ့ပြီး အခင်းဖြစ်ပွားနေပုံကို Barbie Jini ဆိုသည့် တောင်ကိုရီးယားအင်တာနက်ဆယ်လီတစ်ဦးက လိုက်ဖ်လွှင့်ပြသခဲ့သည်။
Barbie Jini သည် Afreeca TV ဆိုသည့် အွန်လိုင်းပလက်ဖောင်းတစ်ခုတွင် နာမည်ကြီး လိုက်ဖ်လွှင့်တင်ဆက်သူဖြစ်ပြီး ပစ်ခတ်မှုမဖြစ်မီကတည်းက ဆိုင်တစ်ဆိုင်တွင်ထိုင်ကာ လိုက်ဖ်လွှင့်နေခဲ့သည်။
စားသောက်ဆိုင်တွင် အအေးသောက်နေစဉ် သေနတ်သံနှင့် ပြတင်းပေါက်မှန်ကွဲသံများကို သူကြားလိုက်ရသည်။ ချက်ချင်း ပတ်ဝန်းကျင်ကို ကြည့်လိုက်သည့်အခါ လူများ အပြေးအလွှားဖြစ်နေကြသည်ကို တွေ့လိုက်ရသည်။
“ဘာဖြစ်ကြတာလဲ”ဟု သူရေရွတ်လိုက်သေးသည်။ထို့နောက် သေနတ်သံပင်ဖြစ်မည် ဟုယူဆပြီး ဘေးလွတ်အောင် အခြားသူများ နှင့်အတူ အသက်လုလိုက်ပြေးခဲ့ရသည်။သို့သော် လိုက်ဖ်ထုတ်လွှင့်မှုကို သူမရပ်ခဲ့ပေ။
ဘေးလွတ်ရာသို့ရောက်သည်အထိ သူ စကားပြောသံတွင် ကြောက်ရွံ့သံကသိသာ နေသေးသည်။
“ သိပ်ကြောက်စရာကောင်းတယ်” ဟု သူကပြောသည်။
အစက နောက်ပြောင်မှုတစ်ခုလားဟု သူထင်လိုက်သေးသည်။သို့သော် မိခင်တစ်ဦးက ကလေးလက်တွန်းလှည်းကို ပစ်ထားခဲ့တော့မှ စိုးရိမ်ဖွယ်အခြေအနေကို သူသိလိုက်သည်။
ထိုင်းကုန်တိုက်ပစ်ခတ်မှုအတွင်း လူနှစ်ဦးသေဆုံးခဲ့ပြီး ကျူးလွန်သူ အသက် ၁၄ နှစ် အရွယ်လူငယ်ကို လူသတ်မှုဖြင့်ဖမ်းဆီးစွဲချက်တင်ထားကာ သူ့ကိုသေနတ်ရောင်းခဲ့သည့် အမျိုးသားနှစ်ဦးလည်း ဖမ်းဆီးခံထားရသည်။
