မင်းသမီး ဂျနီဖာအန်နစ်စတန်က ၎င်း၏ ကျန်းမာရေးကောင်းမွန်သော ပုံပန်းသွင်ပြင်အတွက် အနားယူခြင်းသည် အဓိကကျသောအချက်ဖြစ်သည်ဟု ထင်မြင်မိကြောင်း ပြောကြားခဲ့သည်။
ကောင်းမွန်စွာ အနားယူခြင်းသည် ၎င်းကို ကျန်းမာပြီး အားမာန်အပြည့်ဖြစ်နေစေသည်ဟု ယူဆကြောင်း အသက် ၅၄ နှစ်အရွယ် ဂျနီဖာက ပြောကြားခဲ့သည်။
“ကျွန်မ ရေအများကြီးသောက်တယ်။ ကျွန်မရဲ့ခန္ဓာကိုယ်ကို နေ့စဉ်လှုပ်လှုပ်ရှားရှားနေတယ်။ သန့်ရှင်းလတ်ဆတ်တဲ့ အစားအစာတွေကို စားသုံးဖို့ ကြိုးစားတယ်။ ကျွန်မတတ်နိုင်သလောက် အနားယူအိပ်စက်တယ်။ နောက်ဆုံးအပိုင်းကတော့ ကျွန်မအတွက် စိန်ခေါ်မှုဖြစ်ပါတယ်။ ဒါပေမဲ့ ဒီအပိုင်းကအရမ်း အရေးကြီးပါတယ်။ ကျွန်မ လုံလောက်စွာအနားမယူမိရင် ဒီအကျိုးဆက်ကို ကျွန်မခံစား ရပါတယ်”ဟု ၎င်းကဆိုသည်။
ဂျနီဖာသည် နှစ်ပေါင်းများစွာကြာ အိပ်မပျော်နိုင်ခြင်းဝေဒနာနှင့် ရုန်းကန်နေရပြီး လက်ရှိတွင် သူသည် ကောင်းမွန်စွာအိပ်စက်ခြင်းတန်ဖိုးကို ကျေးဇူးတင်ရှိနေပြီဖြစ်ကြောင်း ပြောကြားခဲ့သည်။
“အိပ်စက်ခြင်းဆိုတာက အံ့မခန်းပါပဲ။ အိပ်စက်ခြင်းဆိုတာ လှပတဲ့အရာပါ”ဟု ဂျနီဖာက ပြောကြားခဲ့သည်။
မအိပ်စက်နိုင်ခြင်းသည် အခြားကျန်းမာရေးပြဿနာများကို ဦးတည်နိုင်ကြောင်း ဂျနီဖာက အသိအမှတ်ပြုပြောကြားခဲ့သည်။
“ကျွန်မတို့ရဲ့ ကိုယ်ခန္ဓာတစ်ခုလုံးက နေ့အချိန်မှာ အလုပ်တွေကို ကြိုးစားပမ်းစားလုပ်ခဲ့ရပါတယ်။ အိပ်စက်ခြင်းမရှိတဲ့အခါ ကျန်းမာရေးပြဿနာတွေကို ဦးတည်နိုင်တယ်ဆိုတာကို နားလည်ထားပါတယ်”ဟု ဂျနီဖာက ပြောကြားခဲ့သည်။
