အာဆင်နယ်အသင်းခေါင်းဆောင် ကွင်းလယ်ကစားသမား အော်ဒီဂွါက ၂၀၂၃ ခုနှစ်အတွက် PFA မှ ရွေးချယ်သော ပရီးမီးယားလိဂ်အကောင်းဆုံးအသင်းတွင် ပါဝင်ခဲ့သည့်အတွက် ဂုဏ်ယူကြောင်း ပြောကြားခဲ့သည်။

''ဒါက ကစားသမားအချင်းချင်း မဲပေးရွေးချယ်တာဖြစ်လို့ ဒီအသင်းမှာ ရွေးချယ်ခံရတာ အလွန်ကျေနပ်စရာကောင်းပါတယ်။ ကျွန်တော်က မတူညီတဲ့ လိဂ်(၃)ခုရဲ့ တစ်နှစ်တာအကောင်းဆုံးအသင်းမှာ ရွေးချယ်ခံရဖူးပါပြီ။ စပိန်နဲ့ နယ်သာလန်မှာလည်း ရွေးချယ်ခံခဲ့ရတာကြောင့်ပါ။ ဒီအတွက် အလွန်ဂုဏ်ယူမိပါတယ်။ ကျွန်တော်တို့ အာဆင်နယ်အသင်းက ကစားသမား(၄)ယောက် အထိ ရွေးချယ်ခံရတာလည်း (၁၅)နှစ်အတွင်း ပထမဆုံးလို့ထင်ပါတယ်''ဟု အော်ဒီဂွါက ပြောကြားခဲ့သည်။

အော်ဒီဂွါနှင့်အတူ PFA အကောင်းဆုံးအသင်းတွင် ရွေးချယ်ခံရသည့် အာဆင်နယ်ကစားသမားများမှာ ရမ်းစ်ဒေးလ်၊ ဆာလီဘာနှင့် ဆာကာတို့ဖြစ်ကြောင်း သိရသည်။