လတ်တလောကောက်ယူထားသည့် အွန်လိုင်းစစ်တမ်းတစ်ခုအရ တောင်ကိုရီးယားတွင် အချစ်ရေးနှင့်ပတ်သက်ပြီး ကောလာဟလသတင်းများ အထွက်ဆုံး ထင်ပေါ်ကျော်ကြားသူများထဲ ထိပ်တန်းဘောလုံး ကစားသမားဆွန်ဟောင်မင်က ထိပ်ဆုံးဖြစ်ပြီး မင်းသမီးဆောင်းဟေကိုက ဒုတိယ၊ ကေ ပေါ့အဖွဲ့ BLACKPINK မှအဖွဲ့ဝင်ဂျန်းနီက တတိယနေရာတွင် ရပ်တည်နေသည်။
DC Inside ၏ မေ ၁ ရက် ဖော်ပြချက်အရ လက်ရှိ တော့တင်ဟမ်ဟော့စပါးအသင်းတွင် ကစားနေသည့် ဆွန်ဟောင်မင်က အချစ်ရေးအတင်းအဖျင်းသတင်းများ အထွက်ဆုံး စတားများစစ်တမ်းတွင် ပထမ ရထားသည်။ စစ်တမ်းက ဧပြီ ၂၄ ရက်မှ ဧပြီ ၃၀ ရက်အထိ DC Inside က ကောက်ယူခဲ့သည့်စစ်တမ်း ဖြစ်သည်။
ဆွန်ဟောင်မင်သည် Girl’s Day မိန်းကလေးအဆိုတော်အဖွဲ့မှ အဖွဲ့ဝင် မင်နာ၊ မင်းသမီး ယူဆိုယောင်း၊ BLACKPINK အဖွဲ့ဝင် ဂျီဆူးတို့နှင့် သတင်းများထွက်ခဲ့ပြီး ၎င်း၏ပြောရေးဆိုခွင့်ရှိသူများက ထိုသတင်းများကို ငြင်းဆိုခဲ့သည်။
ဒုတိယသတင်းအထွက်ဆုံးက The Glory ဇာတ်လမ်းတွဲဖြင့် အောင်မြင်မှုသရဖူ ဆောင်းထားသည့် ဆောင်းဟေကိုဖြစ်သည်။ ၎င်းသည် ရုပ်ရှင်တွဲရိုက်သည့် တွဲဖက်မင်းသားများစွာနှင့် ကောလာဟလများ ထွက်လေ့ရှိသူဖြစ်သည်။ ခင်ပွန်းဆောင်းဂျွန်ကီနှင့် ကွာရှင်းပြီးနောက်တွင်လည်း သတင်းထွက် မရပ်ခဲ့ပေ။ လတ်တလောတွင်လည်း ဆောင်းဟေကိုသည် The Glory မှတွဲဖက် ဗီလိန်မင်းသား ပတ်ဆန်ဟွန်းနှင့် သို့လောသို့လောသတင်းများ ထွက်လိုက်သေးသည်။
BLACKPINK အဖွဲ့ဝင်ဂျန်းနီက တတိယမြောက်သတင်းအထွက်ဆုံး အနုပညာရှင်ဖြစ်ပြီး EXO အဖွဲ့ဝင် ကိုင်၊ ဂျီဒရက်ဂွန် (BIGBANG အဖွဲ့ဝင်)တို့နှင့် သတင်းများ ထွက်ထားသည်။
မနှစ်ကလည်း ဂျန်းနီနှင့် BTS အဖွဲ့ဝင် ဗွီတို့ ဒိတ်နေသည်ဆိုသည့် သတင်းများ၊ ပုံများ အွန်လိုင်းတွင် ပျံ့နှံ့ခဲ့သည်။
စစ်တမ်း၏စတုတ္ထနေရာတွင်ရှိနေသူက ဂျီဒရက်ဂွန်ဖြစ်ပြီး Shinsegae Group လုပ်ငန်းစု၏ မြေးနှင့် သတင်းထွက်ခဲ့သည်။ ပဥ္စမနေရာတွင် ရှိနေသူက မင်းသားဂန်ဒေါင်ဝန်ဖြစ်ပြီး BLACKPINK အဖွဲ့ဝင် ရို့စ်နှင့် သတင်းထွက်ထားသည်။
