ကင်ထယ်ဟီးနှင့် ဆောင်းဟေကိုတို့နှစ်ဦး ၎င်းတို့၏လျှမ်းလျှမ်းတောက်အောင်မြင်မှုကို ယခုနှစ်တွင်လည်း ဆက်လက်ထိန်းထားနိုင်ဖွယ်ရှိနေသည်။ အနုပညာခရီးလမ်းတွင် အနှစ် ၂၀ ကြာလျှောက်လှမ်းပြီးသည့်နောက်  ကိုရီးယားသရုပ်ဆောင်လောက၏ ဘုရင်မများဆိုသည့်ဂုဏ်ပုဒ်ကို ၎င်းတို့နှစ်ဦး ပိုင်ဆိုင်ထားသည်။

မြင်ရခဲသည့်ဇာတ်ကောင်ဖြင့် ဆောင်းဟေကိုပါဝင်ထားသည့် The Glory ဇာတ်လမ်းတွဲ Part 2 သည် ၂၀၂၃ ခုနှစ်အတွက် ပရိသတ်အစောင့်မျှော်ဆုံးဇာတ်လမ်းတွဲ တစ်ခုဖြစ်နေပြီး ဇာတ်လမ်းထဲမှ အေးစက်ခက်ထန်သည့် ဆောင်းဟေကို၏ သရုပ်ဆောင်မှုများသည် ပရိသတ်အကြိုက်နှင့် ထပ်တူကျခဲ့သည်။

ဒီဇင်ဘာ ၃၀ ရက်တွင် Netflix မှ Part 1 စပြပြီးကတည်းက ကိုရီးယားတွင်သာမက ပြည်ပမှာပါ ပရိသတ်ကြည့်ရှုနှုန်းများခဲ့ပြီး Part 2 ကို မတ်လမှ ပြမည်ကြေညာထားသည့်အတွက် ပရိသတ်များ သဘောမကျဖြစ်နေကြသည်။

လူသတ်မှုတစ်ခုကို လက်တွဲဖြေရှင်းကြသည့် အမျိုးသမီးနှစ်ဦးအကြောင်းရိုက်ကူးမည့် The Master of Confession ဇာတ်လမ်းတွဲတွင်လည်း ဆောင်းဟေကိုကိုမြင်ရဖွယ်ရှိသည်။ နောက်မင်းသမီးက ဟန်ဆိုဟီဖြစ်ရန်များသည်။

Hi, Bye Mama ထွက်ပြီးကတည်းက သရုပ်ဆောင်နယ်ပယ်မှ သုံးနှစ်ပျောက်ကွယ်သွားသည့်ကင်ထယ်ဟီးက A House With A Yard ဇာတ်လမ်းတွဲဖြင့် ၂၀၂၃ ခုနှစ်တွင် ပြန်ရောက်လာမည်ဖြစ်ပြီး ယခင်နှင့်မတူသည့် ဇာတ်ရုပ်ဖြင့် ဆွဲဆောင်ဦးမည်ဖြစ်သည်။