ကချင်ပြည်နယ်၊ဖားကန့်မြို့၊ ငှက်ပျောတော ရပ်ကွက်ရှိ စင်ကြယ်ရွှေဆိုင်တွင် ဒီဇင်ဘာ ၂၀ ရက် နံနက် ၉ နာရီခွဲဝန်းကျင်က ဓါးပြတိုက်ခံရပြီး ရွှေလက်စွပ်အကွင်း ၁၅၀ အား ယူဆောင်သွားကြောင်း သတင်းရရှိသည်။
'လူငယ်နှစ်ဦးက သေနတ်အတိုနဲ့ ဆိုင်ဝန်ထမ်းနှစ်ဦးကို သေနတ်နဲ့ချိန်ပြီး ဗန်းတစ်ခုထဲက ရွှေလက်စွပ် အကွင်း ၁၅၀ လောက်ယူတယ်။ ၄၀ ကျပ်သားလောက် ပါသွားတယ်။ပြီးတော့ ဆိုင်ကယ်နှင့် မောင်းထွက်သွားတာပဲ။မီးပျက်ချိန် ဆိုတော့ CCTV မှတ်တမ်း မရ လိုက်ကြဘူး''ဟု ဆိုသည်။
ဒီဇင်ဘာ ၂ ရက်နေ့ကလည်း လုံးခင်းကျေးရွာက JL မိုဘိုင်း ဖုန်းဆိုင်ကို အမျိုးသားနှစ်ဦးက AK အမျိုးအစား သေနတ်တစ်လက်၊ဘရီ အမျိုးအစား သေနတ်တစ်လက် ကိုင်ဆောင်ကာသေနတ်ပြ လုယက်ခဲ့ပြီး ကျပ်ငွေ ၁၁ သိန်းကျော်နှင့် ဖုန်းများယူဆောင်သွားခဲ့ပြီး ကာလတန်ဖိုး ကျပ်သိန်း၅ဝကျော် ပါသွားခဲ့ကြောင်း ဒေသခံတစ်ဦးက ပြောကြားသည်။
နိုဝင်ဘာ ၁၁ ရက်နေ့ကလည်း ဆိပ်မူကျေးရွာ ကျောက်ဝိုင်းမှ ပြန်လာသည့် လူငယ်တစ်ဦးကို လူငယ်သုံးဦးက ဓါးထောက်လုယက်ခဲ့ပြီးဆိုင်ကယ်၊ပိုက်ဆံအိတ်နှင့် ဖုန်းလုယူမှုဖြစ်ပွားခဲ့သည်။
ဒီဇင်ဘာ ၂၀ ရက် (ယနေ့) နံနက် ၇ နာရီဝန်းကျင်ခန့်က မန္တလေးမြို့ရှိ မောသစ်ရွှေဆိုင် သုံးကြိမ်မြောက် ဓါးပြတိုက်ခံရမှု ဖြစ်ပွားပြီး ရွှေများ ထည့်ထားသည့် ရွှေခြင်းနှစ်ခြင်းအား ယူဆောင်သွားမှု ဖြစ်ပွားခဲ့ကြောင်း သတင်းရရှိသည်။
