ယခင်က ပြည်တွင်း ပြည်ပခရီးသွားများနှင့် ​လူးလွန့်လှုပ်ရှားလျက်ရှိ​သော ​နေရာ။ ကမ္ဘာလှည့်ခရီးသွား​များအတွက် ပုဂံ​ရှေး​ဟောင်းယဉ်​ကျေးမှုအ​မွေအနှစ်​ဒေသပြီးလျှင် အခြား​သောဆွဲ​ဆောင်မှုအရာများစွာထဲမှ နံပါတ်တစ်​​နေရာတစ်​​နေရာဟု တင်စား​ခေါ်​ဝေါ်ရ​သော ​ဒေသ။ ပြည်တွင်း ပြည်ပ ခရီးသွားများအတွက် ဗဟုသုတနှင့် ​လေ့လာမှတ်သားဖွယ်ရာများစွာ တည်ရှိ​နေဆဲ ​နေရာ​ဒေသ။ ယဉ်​ကျေးမှုအ​မွေအနှစ်များ သမိုင်းတန်ဖိုးများ စု​ဝေးတည်ရှိရာ ​နေရာ​ဒေသ။

အင်းဝ သို့်မဟုတ် ရတနာပူရ ...

အင်းဝ​ရှေးမြို့​တော်​ဟောင်း၏ လက်ရှိတည်​နေရာသည် မန္တ​လေးတိုင်း​ဒေသကြီး ​ကျောက်ဆည်ခရိုင်၊ တံတားဦးမြို့နယ်အတွင်း၌ တည်ရှိပြီး ဧရာဝတီမြစ်နှင့်ဒုဌဝတီမြစ် ​ခေါ်  မြစ်ငယ်မြစ်တို့ မြစ်နှစ်စင်းဆုံစည်းရာ​နေရာတွင် တည်ရှိသည်။ အင်းဝမြို့​ဟောင်း၏ ​မြောက်ဘက်တွင် စစ်ကိုင်းမြို့၊ အ​ရှေ့​မြောက်ဘက်တွင် အမရပူရမြို့၊ ​တောင်ဘက်၌ တံတားဦးမြို့နှင့် အ​နောက်ဖက်တွင် ဧရာဝတီမြစ်တို့နှင့် နီးစပ်၊ထိကပ်လျက်လည်း တည်ရှိသည်။

အင်းဝမြို့ကို ပုဂံ​အင်ပါရာ​ခေတ်ကုန်ဆုံးပြီး​နောက် မြန်မာသက္ကရာဇ် ၇၂၆ ခုနှစ်၊ ခရစ်နှစ် ၁၃၆၄ ခုနှစ်တွင် သတိုးမင်းဖျားက စစ်ကိုင်းမြို့နှင့် ပင်းယမြို့တို့အား တိုက်ခိုက်​အောင်နိုင်ခဲ့ပြီး​ စတင်တည်​ထောင်ခဲ့ခြင်းဖြစ်သည်။ သတိုးမင်းဖျားက မြို့​တော်ကို "ရတနာပူရ" နန်း​တော်ကို "​ရွှေဘုံသာ"ဟူ၍ အမည်နာမသမုတ်ခဲ့သည်။ အင်းဝမြို့​သည် သတိုးမင်းဖျား စတင်တည်​ထောင်ခဲ့သည့် ၁၃၆၄ ခုနှစ်မှစတင်၍ ကုန်း​​ဘောင်ခေတ် သာယာဝတီမင်းလက်ထက် ၁၈၄၀ ခုနှစ်အထိ နှစ်​ပေါင်း ၄၀၀ ​ကျော်ကာလအတွင်း၌ ​​လေးကြိမ်တိုင်တိုင် မင်း​နေပြည်​တော်ဖြစ်ခဲ့သည်။ ပထမအင်းဝ​ခေတ်၊ ​ဒုတိယအင်းဝ​ခေတ် ​ခေါ်  ​ညောင်ရမ်း​ခေတ်၊ ကုန်း​ဘောင်​ခေတ်၌ နှစ်ကြိမ် ဟူ၍ ​လေးကြိမ်တိုင်တိုင် မင်း​နေပြည်​​တော်ဖြစ်ခဲ့သည်။

အင်းဝမြို့​ဟောင်းမှာ မင်းဆက်​ပေါင်း သုံးဆက်အတွင်း၌ ​လေးကြိမ်တိုင်တိုင် မင်း​နေပြည်​​တော်အဖြစ် မြန်မာဘုရင်များထီးနန်းစိုးစံခဲ့ကြသဖြင့် မြို့​တော်​ဟောင်းအတွင်း၌ ​ရှေး​ဟောင်းသာသနိကအ​ဆောက်အဦများနှင့် အခြား​ရှေး​ဟောင်းအ​မွေအနှစ်များစွာ ယ​နေ့အချိန်အထိ တည်ရှိကျန်ရှိ​နေဆဲဖြစ်သည်။ အင်းဝမြို့​ဟောင်းမှာ အပြင်မြို့ရိုး၊ အတွင်းမြို့ရိုးနှင့် နန်း​တော်အား ထပ်မံကာရံထားသည့် မြို့ရိုးဟူ၍ မြို့ရိုးသုံးထပ်ကာရံကာ တည်​ဆောက်ခဲ့သည်ကို ယ​​နေ့အချိန်အထိ ​တွေ့မြင်နေရဆဲဖြစ်သည်။

အင်းဝမြို့​ဟောင်းရှိ ​ရှေး​ဟောင်းအ​မွေအနှစ် အထင်ကရ​နေရာများမှာ ​ရှေး​ဟောင်းစေတီပုထိုးများ၊ ​လေးထပ်ကြီး​ကျောင်း၊ နန်းမ​တော်မယ်နုလှူဒါန်းသည့် မဟာ​အောင်​မြေဘုံစံအုတ်​ကျောင်း၊ ဗားကရာ​ကျောင်း၊ မြို့ရိုးနှင့်ကျုံး၊ နန်းမြင့်​​မျှော်စင်၊ ဘုတ်တလုပ်ကန်၊ သစ်လုံးတပ်၊ ဆင်ကျုံးခံတပ် အစရှိသည်တို့ဖြစ်ကြပြီး ယင်းသမိုင်းဝင်​​နေရာများသို့ ပြည်တွင်းပြည်ပခရီးသွားဧည့်သည်များ လာ​ရောက်လည်ပတ်​လေ့လာမှုများရှိသည်။

လတ်တ​လောတွင် အင်းဝမြို့​ဟောင်းမှာ Covid-19 ကပ်​ရောဂါစတင်ဖြစ်ပွားစဉ်ကတည်းကပင် ပြည်ပခရီးသွားဝင်​ရောက်မှုများ ပိတ်ပင်ထားခဲ့ခြင်း​ကြောင့် ပြည်ပခရီးသွားကဏ္ဍမှာ ရပ်ဆိုင်း​နေပြီး လတ်တ​လောတွင် ပြည်တွင်းခရီးသွားများသာ လာ​ရောက်လည်ပတ်လျက်ရှိသည်ကို​ တွေ့ရသည်။ ထိုသို့ ပြည်ပခရီးသွားဝင်​ရောက်မှုမရှိခြင်း​အပါအဝင် လတ်တ​လော နိုင်ငံ​ရေးအ​ပြောင်းအလဲဖြစ်စဉ်များ​ကြောင့်ပါ ခရီးသွားကဏ္ဍအ​ပေါ် မှီခို​နေကြရသည့် ​ဒေသခံများမှာ အခက်အခဲများဖြစ်​ပေါ်လျက်ရှိ​​​နေကြသည်။ အထူးသဖြင့် ပြည်ပခရီးသွားများအား အဓိကမှီခို​နေကြရသည့် အင်းဝ​ဒေသမှ မြင်းလှည်း​​မောင်းသူများလည်း ခရီးသွားများမရှိသဖြင့် မြင်းလှည်းလုပ်ငန်းများရပ်ဆိုင်းထားခဲ့ရသည်မှာ နှစ်နှစ်ခန့်ကြာမြင့်ခဲ့ပြီဟု ​ဒေသခံတို့က ညည်းတွားစကားဆို​နေကြသည်။