ဒါဘီနည်းပြအဖြစ် ဆောင်ရွက်နေသည့် မန်ယူဂန္ထဝင်ကစားသမား ရွန်နီက ၎င်း၏အသင်းဖော်ဟောင်း စီရော်နယ်လ်ဒိုအား ပြန်လည်ခေါ်ယူခဲ့သည့် မန်ယူအသင်း၏လုပ်ရပ်မှာ မှားယွင်းကြောင်း ပြောကြားခဲ့သည်။
ရွန်နီသည် မန်ယူအသင်းတွင် စီရော်နယ်လ်ဒိုနှင့်အတူ ၂၀၀၄ ခုနှစ် မှ ၂၀၀၉ ခုနှစ်အထိ တွဲဖက်ကစားခဲ့သူ ဖြစ်သည်။ သို့သော် ရွန်နီက ပြီးခဲ့သည့်နွေတွင် မန်ယူအသင်းအနေဖြင့် အသက် (၃၇) နှစ်ရှိနေပြီဖြစ်သည့် စီရော်နယ်လ်ဒိုကို ပြန်လည်ခေါ်ယူခဲ့ခြင်းမှာ မှားယွင်းကြောင်းနှင့် စီရော်နယ်လ်ဒိုမှာ အနာဂတ်အတွက် အကျိုးမရှိကြောင်း ပြောကြားခဲ့ခြင်းဖြစ်သည်။
စီရော်နယ်လ်ဒိုအား မန်ယူအသင်း ပြန်လည်ခေါ်ယူခဲ့ခြင်းနှင့်ပတ်သက်ပြီး Sky Sports ရုပ်သံတွင် ရွန်နီက "အခုအချိန်မှာတော့ စီရော်နယ်လ်ဒို ခေါ်ယူခဲ့တာ မမှားဘူးလို့ ခင်ဗျားတို့ ပြောကြမှာပါ။ သူက ချန်ပီယံလိဂ်မှာ အရေးပါတဲ့ ဂိုးတွေ သွင်းပေးခဲ့သလို၊ စပါးနဲ့ပွဲမှာလည်း ဟက်ထရစ်သွင်းခဲ့တယ်။ ဒါပေမဲ့ အနာဂတ်ဆိုရင် လူငယ်တွေကို နေရာပေးရမှာဖြစ်ပြီး သူတို့က အသင်းကို ဆွဲတင်မှာပါ။ စီ ရော်နယ်လ်ဒိုအနေနဲ့ ဂိုးသွင်းနိုင်ပေမဲ့ တခြားအပိုင်းတွေမှာ အဆင်မပြေတော့ပါဘူး" ဟု ပြောကြားခဲ့သည်။
