ပြီးခဲ့သည့် ဗင်နီဇီယာအသင်းနှင့် စီးရီးအေအဝေးကွင်းပွဲစဉ်တွင် အင်တာမီလန်အသင်းအတွက် ဒုတိယအနိုင်ဂိုးသွင်းယူပေးခဲ့သည့် အာဂျင်တီးနားတိုက်စစ်မှူး လော်တာရိုမာတီနက်ဇ်က အသင်း၏ ဂန္ထဝင်ဖြစ်လိုကြောင်း ပြောကြားခဲ့သည်။
လော်တာရိုမာတီနက်ဇ်ကို ဥရောပထိပ်တန်းအသင်းများစွာက စိတ်ဝင်စားနေသော်လည်း ယခုလိုပြောကြားခဲ့သဖြင့် အင်တာမီလန်တွင် အနာဂတ်တည်မြဲနေမည်ဖြစ်ကြောင်း အီတလီမီဒီယာများက သုံးသပ်နေကြသည်။
လော်တာရိုမာတီနက်ဇ်က ''ကျွန်တော်တို့အသင်းက အပြုသဘောဆောင်နေပါတယ်။ ပွဲကခက်ခဲပြီး မိုးတွေရွာနေတဲ့ ဒီလိုအခြေအနေမျိုးမှာ နိုင်ပွဲရခဲ့တာကျေနပ်စရာပါ။ သုံးမှတ်ရလို့ကျေနပ်မိပြီး အရေးကြီးဆုံးအရာက လက်ရှိပုံစံကောင်းကို ဆက်လက်ထိန်းသိမ်းနိုင်ဖို့ပါ။ ကျွန်တော်က ဒီအသင်းကို ၂၀၁၈ ခုနှစ်မှ ရောက်လာပေမဲ့ အသင်းမှာ နှစ်ကာလများစွာ ကစားလာသလို ခံစားနေရပါတယ်။ အနာဂတ်မှာ ဒီအသင်းရဲ့ သင်္ကေတအထိမ်းအမှတ်ဖြစ်ချင်ပါတယ်။ အရာအားလုံး ပေးဆပ်သွားပါမယ်''ဟု ပြောကြားခဲ့သည်။
အဆိုပါပွဲတွင် အင်တာမီလန်က (၂-၀)ဂိုးဖြင့်အနိုင်ရပြီး ပထမဂိုးကို ချာဟာနိုဂလူးက သွင်းယူခဲ့သည်။
