ကမ္ဘာ့ဖလားခြေစစ်ပွဲများကစားရန် သက်ဆိုင်ရာမိခင်ကလပ်အသင်းများမှ စေလွှတ်ခြင်းမခံရသည့် ဘရာဇီးလ်ကစားသမား ရှစ်ဦးသည် ယခုတစ်ပတ် ပရီးမီးယားလိဂ်တွင် ပါဝင်ကစားခွင့် ပိတ်ပင်ခံရမည်ဖြစ်ကြောင်း သိရသည်။
ဘရာဇီးလ်ဘောလုံးအာဏာပိုင်များက ယင်းကိစ္စအတွက် FIFA ထံ တိုင်တန်းခဲ့ပြီး FIFA၏စည်းမျဉ်းအရ နိုင်ငံအသင်းသို့ မိခင်ကလပ်အသင်းမှ စေလွှတ်ခြင်းမခံရသည့် ကစားသမားသည် ကလပ်အသင်းအတွက် ပွဲကစားခွင့် ငါးရက် ပိတ်ပင်ခံရမည်ဖြစ်သည်။
ယင်းကစားသမားရှစ်ဦးမှာ လီဗာပူးလ်အသင်းမှ ဖေမီနို၊ ဖာဘင်ညိုနှင့် အယ်လစ် ဆန်၊ မန်စီးတီးအသင်းမှ ဂျေးဇူးနှင့် အီဒါဆန်၊ မန်ယူအသင်းမှ ဖရက်ဒ်၊ ချယ်လ်ဆီးအသင်း မှ သီယာဂိုဆေးလ်ဗား၊ လိဒ်စ်အသင်းမှ ရာဖင်ညာတို့ဖြစ်သည်။
ယခုလ တောင်အမေရိကကမ္ဘာ့ဖလားခြေစစ်ပွဲများမှာ စက်တင်ဘာ ၉ ရက် (ယနေ့)တွင်မှ ပြီးဆုံးမည်ဖြစ်သောကြောင့် FIFA ၏ ပြစ်ဒဏ်ကာလမှာ စက်တင်ဘာ ၁၀ ရက်မှ ၁၄ ရက်အထိဖြစ်ကြောင်း သိရသည်။
ယင်းပြစ်ဒဏ်အရမူ စက်တင်ဘာ ၁၄ ရက်တွင် ချန်ပီယံလိဂ်အုပ်စုအဖွင့်ပွဲစဉ် ကစားရမည့် မန်ယူ၊ ချယ်လ်ဆီးအသင်းမှ ကစားသမားများမှာ အဆိုပါပွဲစဉ်ကိုပါ ထပ်မံလွဲချော်ဖွယ်ရှိသည်။
FIFA သို့ကန့်ကွက်သည့် နိုင်ငံဘောလုံးအဖွဲ့ချုပ်မှာ လေးနိုင်ငံအထိ ရှိပြီး ပရီးမီးယားလိဂ်အဖွဲ့ချုပ်၏ အမှုဆောင်ချုပ်ဖြစ်သူ ရစ်ချတ်မာစတာစ်က ယခုကိစ္စအတွက် FIFA နှင့်ဆွေးနွေးသွားမည်ဟု ပြောကြားခဲ့သည်။
