လီဗာပူးလ်ကွင်းလယ်ကစားသမားသစ် သီယာဂိုက မိမိအနေဖြင့် အသင်းနှင့်အတူ ဆုဖလားများစွာ ရယူသွားလိုသည်ဟု ပြောကြားခဲ့သည်။
လီဗာပူးလ်အသင်းသည် အသက် (၂၉)နှစ်အရွယ်ရှိ စပိန်ကွင်းလယ်ကစားသမား သီယာဂိုကို Add-ons ကြေးအပါအဝင် ပေါင်(၂၅)သန်း ခေါ်ယူခဲ့ပြီး (၄)နှစ်သက်တမ်းရှိ စာချုပ်တစ်ရပ် ချုပ်ဆိုခဲ့သည်။
သီယာဂိုက စိန်ခေါ်မှုသစ်များ ရင်ဆိုင်လိုသည့်အတွက် လီဗာပူးလ်အသင်းကို ပြောင်းရွှေ့ခဲ့ခြင်းဖြစ်ကြောင်း အသင်းဝက်ဆိုက်သို့ ပြောကြားခဲ့သည်။
သီယာဂိုက "ခံစားမှုက အရမ်းကောင်းပါတယ်။ ဒီအခွင့်အရေးကို ကျွန်တော် စောင့်နေခဲ့တာ ကြာပါပြီ။ အခု လီဗာပူးလ်အသင်းသားဖြစ်လာလို့ ကျွန်တော် အရမ်းပျော်နေပါတယ်။ နှစ်တွေကြာလာတော့ အောင်မြင်မှုတွေ ပိုလိုချင်လာတယ်။ ဆုဖလားတွေ ရလေ၊ ပိုလိုချင်လေပါပဲ။ အခု လီဗာပူးလ်အသင်းဟာ ကျွန်တော့်နဲ့ ထပ်တူပါပဲ။ ကျွန်တော့်အနေနဲ့ လီဗာပူးလ်အသင်းနဲ့အတူ ဆုဖလားတွေ ဖြစ်နိုင်သလောက် ရယူသွားချင်ပါတယ်။ ကျွန်တော်က အသင်းနဲ့ ခင်မင်ရင်းနှီးမှုရှိတာကို သဘောကျပြီး လီဗာပူးလ်မှာ ဒီလိုခံစားရပါတယ်"ဟု ပြောကြားခဲ့သည်။
သီယာဂိုသည် ဘာစီလိုနာအကယ်ဒမီထွက် ကစားသမားတစ်ဦးဖြစ်ပြီး ၂၀၀၉ ခုနှစ်တွင် ဘာစီလိုနာအသင်းနှင့်အတူ ပရော်ဖက်ရှင်နယ်ကစားသမားဘဝကို စတင်ခဲ့သူဖြစ်သည်။
၎င်းသည် ဘာစီလိုနာအသင်းတွင် ၂၀၀၉ ခုနှစ်မှ ၂၀၁၃ ခုနှစ်အထိ ကစားခဲ့ပြီး ၂၀၁၃ ခုနှစ်၊ နွေရာသီအပြောင်းအရွှေ့ကာလတွင် ဘိုင်ယန်မြူးနစ်အသင်းသို့ ပြောင်းရွှေ့ခဲ့သည်။ သီယာဂိုသည် ဘိုင်ယန်မြူးနစ်တွင် (၇)ရာသီအတွင်း ပြိုင်ပွဲစုံ (၂၃၅)ပွဲတွင် (၃၁)ဂိုး သွင်းယူခဲ့သည်။
