ပရီးမီးယားလိဂ်ပြိုင်ပွဲတွင် လာမည့်ရာသီ၌ ပရိသတ်များကို ကွင်းအတွင်းပြန်လည်ဝင်ရောက်ကြည့်ရှုခွင့်ပေးရန် စီစဉ်ထားသော်လည်း အဝေးကွင်းပရိသတ်များမှာ ကွင်းအတွင်းသို့ ဝင်ရောက်ကြည့်ရှုခွင့်ရရှိလိမ့်မည် မဟုတ်ကြောင်း သိရှိရသည်။
ပရီးမီးယားလိဂ်တာဝန်ရှိသူများသည် ပရိသတ်များပွဲကြည့်ခွင့်ပြန်ရရန်အတွက် အစိုးရတာဝန်ရှိသူများနှင့် ဆွေးနွေးမှုများပြုလုပ်နေဆဲဖြစ်ပြီး အောက်တိုဘာလ (၃)ရက်နေ့မှ စတင်၍ ပရိသတ်များအား ကွင်းအတွင်းကြည့် ခွင့်ပေးရန် ရည်ရွယ်ထားသည်။
သို့သော် ပွဲကြည့်စင်အပြည့် ကြည့်ခွင့်ပေးမည်မဟုတ်ဘဲ ကွင်းဝင်ဆံ့သောလူဦးရေ၏ တစ်စိတ်တစ်ပိုင်းကိုသာ ကြည့်ရှုခွင့်ပြုသွားမည်ဖြစ်သည်။
ဗြိတိန်သတင်းစာ Daily Mail ၏ဖော်ပြချက်အရ ကွင်းဝင်ဆံ့ဦးရေ၏ ၂၀%မှ ၃၀% အထိ ဝင်ရောက်ကြည့်ရှုခွင့်ပြုသွားမည်ဖြစ်ပြီး၊ ပရိသတ်များအနေဖြင့် အစိုးရမှထုတ်ပြန်ထားသော ကိုရိုနာဗိုင်းရပ်စ်ရောဂါကာကွယ်ရေးဆိုင်ရာ ညွှန်ကြားချက်များကို လိုက်နာရမည်ဖြစ်ကြောင်းသိရှိရသည်။
ယင်းကဲ့သို့ ကွင်း အတွင်းဝင်ရောက်ဝင်ခွင့်ပြုရာ၌ တစ်ရာသီစာလက်မှတ်ဝယ်ယူထားသူများကိုသာ ဝင်ခွင့်ပြုရန် စဉ်းစားထားရာ အိမ်ကွင်းပရိသတ်များသာ ကြည့်ခွင့်ရရှိမည်ဖြစ်ပြီး အဝေးကွင်းပရိသတ်များ ဝင်ခွင့်ရမည်မဟုတ်ပေ။
လက်ရှိတွင် ဗြိတိန်အချက်အလက်မှတ်တမ်း၊ ယဉ်ကျေးမှု၊ မီဒီယာနှင့် အားကစားဝန်ကြီးဌာန (DCMS)တာဝန်ရှိသူများနှင့် ပရီးမီးယားလိဂ်တာဝန်ရှိသူများ ဆွေးနွေးလျက်ရှိနေပြီး ပရိသတ်များ ကွင်းအတွင်းဝင်ရောက်ခွင့်ပြုမည့်အစီအစဉ်များကို အသေးစိတ်ရေးဆွဲနေကြောင်း သိရှိရသည်။
ထို့ပြင် ပရိသတ်များ ကွင်းအတွင်း ဝင်ရောက်ကြည့်ရှုသည့်ပုံစံကို အကြိုစမ်းသပ်သွားမည်ဖြစ်ပြီး ဘရိုက်တန်အသင်းက ၎င်းတို့၏ ပရိသတ်များနှင့်အတူ အိမ်ကွင်း AMEX တွင် ပါဝင်ကူညီပေးသွားမည် ဖြစ်ကြောင်း သိရှိရသည်။
