ဘာစီလိုနာအသင်းသည် ဘိုင်ယန်မြူးနစ်အသင်းတွင် တစ်ရာသီအငှားဖြင့် သွားရောက်ကစားနေသည့် ဘရာဇီးလ်ကွင်းလယ်လူ ကော်တင်ဟိုအား ယူရိုသန်း (၈၀)ရလျှင် ရောင်းချဖွယ်ရှိနေကြောင်း စပိန်အားကစားသတင်းစာ Mundo Deportivo က ဖော်ပြခဲ့သည်။
အသက် (၂၇)နှစ်အရွယ်ရှိ ဘရာဇီးလ်ကွင်းလယ် လူ ကော်တင်ဟိုသည် ၂၀၁၈ ခုနှစ်၊ ဇန်နဝါရီအပြောင်းအရွှေ့ကာလတွင် လီဗာပူးလ်အသင်းမှ ဘာစီလိုနာအသင်းသို့ ယူရိုသန်း (၁၆၀) (Add-ons ကြေးများကို ထည့် ပေါင်းထားခြင်းဖြစ်သည်)ဖြင့် ပြောင်းရွှေ့ခဲ့သူဖြစ်သည်။
ကော်တင်ဟိုသည် ဘာစီလိုနာအသင်းတွင် ကစားခဲ့သည့် တစ်ရာသီခွဲကာလအတွင်း ပုံမှန်ခြေစွမ်းပြနိုင်ခဲ့ခြင်း မရှိသဖြင့် အသင်းပရိသတ်များ၏ လှောင်ပြောင်မှုများကို ခံခဲ့ရသည်။
ထို့ကြောင့် ဘာစီလိုနာအသင်းသည် ၂၀၁၉ ခုနှစ်၊ နွေရာသီအပြောင်းအရွှေ့ကာလတွင် ကော်တင်ဟိုအား ဘိုင်ယန်မြူးနစ်အသင်းထံသို့ တစ်ရာသီအငှားချခဲ့ သည်။
ဘိုင်ယန်မြူးနစ်အသင်းသည် ကော်တင်ဟိုအား အငှားစာချုပ်ဖြင့်ခေါ်ယူရာတွင် ယူရိုသန်း (၁၂၀)ဖြင့် အ ပြီးသတ်ခေါ်ယူခွင့်ရှိသည်ဆိုသောအချက်ကို ထည့်သွင်း ချုပ်ဆိုခဲ့ကြောင်း သိရသည်။
သို့သော် ကော်တင်ဟိုသည် ဘိုင်ယန်မြူးနစ်အသင်း၌ ခြေစွမ်းပြနိုင်ခြင်းမရှိဘဲ နည်းပြသစ် ဖလစ်ခ်လက်ထက်တွင် ပုံမှန်ပွဲထွက်ခွင့်ရရန်ပင် ရုန်းကန်နေရသည်။
ထို့ကြောင့် ဘိုင်ယန်မြူးနစ်အသင်းသည် ကော်တင်ဟိုအား ဝယ်ယူမည့်အစီအစဉ်ကို လက်လျှော့လိုက်ပြီဖြစ်ကြောင်း ဂျာမန်မီဒီယာများက ဖော်ပြခဲ့သည်။
ထို့အတူ ဘာစီလိုနာအသင်းကလည်း ကော်တင်ဟိုကို ပြန်လည် ခေါ်ယူလိုခြင်းမရှိဘဲ လာမည့်နွေရာသီအပြောင်းအရွှေ့ကာလတွင် ယူရိုသန်း (၈၀)ဖြင့် ကမ်းလှမ်းလာသည့် အ သင်းများရှိလျှင်ပင် ရောင်းချဖွယ်ရှိနေကြောင်း Mundo Deportivo က ဖော်ပြခဲ့သည်။
ကော်တင်ဟိုသည် ယင်းအခြေအနေများကို စိတ်ပျက်နေပြီး လာမည့်နွေရာသီအပြောင်းအရွှေ့ကာလ တွင် အသင်းပြောင်းရွှေ့ရန်အတွက် ၎င်း၏အေးဂျင့်ဖြစ်သူအား အသင်းသစ် ရှာဖွေခိုင်းထားကြောင်း Mundo Deportivo က ဖော်ပြခဲ့သည်။
ကော်တင်ဟို၏ အေးဂျင့့်ဖြစ်သူသည် PSG နှင့် ဂျူဗင်တပ်စ်အသင်းများကို ချိတ်ဆက်လျက်ရှိနေပြီး ကော်တင်ဟိုအား ခေါ်ယူရန် ကမ်းလှမ်းမှုများ ပြုလုပ်ဖွယ်ရှိနေကြောင်း သိရသည်။