ကမာရွတ်မြို့နယ် ၅ ရပ်ကွက်၊ အောင်သုခလမ်းနှင့် ဆရာစံလမ်းထောင့်တွင် ဒေါ်မြင့်မြင့်အေး(ခေါ်) ဒေါ်ပြားကြီးဆိုသူသည် နိုဝင်ဘာ ၉ ရက် နံနက် ၅ နာရီခန့်က သေနတ်ပစ်ခတ်ခံရပြီး သေဆုံးသွားကြောင်း အဆိုပါရပ်ကွက်နေသူများထံမှ သိရသည်။
ထို့ပြင် ဒေါ်ပြားကြီးစီးနင်းလာသည့် ဆိုက္ကားမှ မောင်းနှင်သူလည်း သေနတ်ထိမှန်ဒဏ်ရာရရှိခဲ့ပြီး ဆေးရုံသို့ ပို့ဆောင်ကာ ကုသမှုခံယူနေရကြောင်း သိရသည်။
ဝက်သားရောင်းသူ ဒေါ်ပြားကြီးသည် ဆိုက္ကားဖြင့် ဝက်သားများ သယ်ဆောင်လာစဉ် အောင်သုခလမ်းနှင့်ဆရာစံလမ်းထောင့်အရောက်တွင် အမည်မသိသေနတ်ကိုင်ဆောင်သူက ၅ ချက်ထက်မနည်း ပစ်ခတ်ခဲ့ကြောင်း၊ သေနတ်ပစ်သံကိုလည်း ကြားရကြောင်း အဆိုပါရပ်ကွက်နေသူများထံမှ သိရသည်။
အသက် ၅၆ နှစ်အရွယ် ဒေါ်ပြားကြီးသည် အောင်သုခလမ်းတွင်ပင် နေထိုင်ကြောင်း သိရပြီး ယင်းလမ်းအတွင်းရှိ ၎င်းနေအိမ်တွင် နာရေးအပြင်အဆင်များ ပြုလုပ်ထားသည်ကို တွေ့ရသည်။
သေဆုံးသူ ဒေါ်ပြားကြီးသည် ရင်ညွှန့်တွင် ဒဏ်ရာရရှိခဲ့ပြီး ဆိုက္ကားသမားမှာ ဝမ်းဗိုက်နှင့် ပေါင်တို့တွင် သေနတ်ထိမှန်ဒဏ်ရာရရှိခဲ့ကြောင်း ကနေဦးသိရသည်။
